ITHOMO RĨA 44
Hihi nĩ Ikũngũĩro Ciothe Ikenagia Ngai?
Jehova nĩ endaga tũkenere ũtũũro na nginya tũkũngũyagĩre rĩmwe na rĩmwe. No hihi nĩ thigũkũ kana ikũngũĩro ciothe imũkenagia? Tũngĩonania atĩa wendo witũ harĩ Jehova ũhoro-inĩ wĩgiĩ ikũngũĩro?
1. Nĩ kĩĩ gĩtũmaga Jehova age gũkenio nĩ ikũngũĩro imwe?
No ũmake nĩ kũmenya atĩ ikũngũĩro nyingĩ ciumanĩte na morutani mataringaine na ũrĩa Bibilia ĩrutanaga kana moimanĩte na ndini cia maheeni. No ikorũo ihutanĩtie na maũndũ ma ndaimono, kana rĩciria rĩa atĩ muoyo ndũkuaga. Ikũngũĩro imwe ciumanĩte na mawĩtĩkio mahutanĩtie na mahinya matarĩ ma ndũire kana gwĩtĩkia mũnyaka. (Isaia 65:11) Jehova aheete athathaiya ake mũkaana ũyũ: “Mwĩyamũranie nao . . . ningĩ mũtige kũhutia kĩndũ gĩtarĩ gĩtheru.”—2 Akorintho 6:17.a
2. Jehova aiguaga atĩa igũrũ rĩgiĩ ikũngũĩro iria itũũgagĩria andũ?
Jehova atwĩrĩte twĩtheme mũtego wa “[kwĩhokaga] andũ.” (Thoma Jeremia 17:5.) Thigũkũ imwe itũũgagĩria anene kana njorua cia mbaara. Ingĩ nĩ cia gũkũngũĩra maũndũ ma kĩĩbũrũri kana wĩyathi. (1 Johana 5:21) Ingĩ nacio itũũgagĩria maũndũ ma kĩũteti kana mathondeka ma andũ. Jehova angĩigua atĩa tũngĩtũũgĩria andũ kana ithondeka, makĩria angĩkorũo rĩragaathĩrĩria maũndũ mataringaine na muoroto Wake?
3. Nĩ mĩtugo ĩrĩkũ ĩngĩtũma ikũngũĩro ikorũo itarĩ njega?
Bibilia nĩ ĩkaananĩtie “kũnyua njohi gũkĩria njano, ciathĩ cia kũnyua njohi, [na] maruga makĩrĩtie njano.” (1 Petero 4:3) Ikũngũĩro-inĩ imwe andũ mekaga maũndũ matekwĩgirĩrĩria, na makeingĩria mĩtugo-inĩ ĩtagĩrĩire. Nĩguo tũtũũre tũrĩ arata a Jehova no mũhaka twĩtheme mĩtugo ta ĩyo mĩũru.
THUTHURIA MAKĨRIA
Reke tuone ũrĩa tũngĩkenia Jehova na njĩra ya gũtua matua marĩa magĩrĩire megiĩ thigũkũ na ikũngũĩro.
4. Regana na ikũngũĩro iria itakenagia Jehova
Thomai Aefeso 5:10, mũcoke mwarĩrĩrie ciũria ici:
Nĩ maũndũ marĩkũ tũrabatara gũkũũrana rĩrĩa tũratua itua rĩa kana nĩ tũgũkũngũĩra thigũkũ?
Nĩ thigũkũ irĩkũ ikũngũyagĩrũo kũrĩa ũikaraga?
Nĩ ũkuona ta thigũkũ icio ikenagia Jehova?
Kwa ngerekano, hihi nĩ ũrĩ weciria ũrĩa Ngai onaga ikũngũĩro cia mũthenya wa gũciarũo? Bibilia ndĩgwetete ũhoro wĩgiĩ mũthathaiya o na ũmwe wa Jehova agĩkũngũĩra mũthenya wake wa gũciarũo, no nĩ ĩgwetete ũhoro wa andũ erĩ mataamũthathayagia magĩkũngũĩra mĩthenya yao ya gũciarũo. Thomai Kĩambĩrĩria 40:20-22 na Mathayo 14:6-10, mũcoke mwarĩrĩrie ciũria ici:
Nĩ ũndũ ũrĩkũ ũhaanaine harĩ ikũngũĩro icio cierĩ?
Kũringana na ũhoro ũcio wandĩkĩtwo Bibilia-inĩ wĩgiĩ ikũngũĩro icio-rĩ, ũgwĩciria Jehova aiguaga atĩa igũrũ rĩgiĩ gũkũngũĩra mũthenya wa gũciarũo?
Mũndũ no eyũrie, ‘Hihi Jehova nĩ atindanagĩra kana nĩ ndĩrakũngũĩra mũthenya wa gũciarũo kana thigũkũ ingĩ iria itaringanĩte na Maandĩko?’ Thomai Thama 32:1-8, mũcoke mwĩrorere VIDEO ĩno na mwarĩrĩrie ciũria iria irũmĩrĩire.
Twagĩrĩirũo gũkũũrana maũndũ marĩa metĩkĩrĩkĩte harĩ Jehova nĩkĩ?
Tũngĩka ũguo atĩa?
Ũrĩa tũngĩmenya kana gĩkũngũĩro kĩna nĩ gĩkenagia Ngai
Hihi kiumanĩte na morutani mataringanĩte na Maandĩko? Nĩguo ũmenye, thuthuria kĩhumo gĩa gĩkũngũĩro kĩu.
Hihi nĩ gĩa gũtũũgĩria andũ, mathondeka, kana maũndũ ma kĩĩbũrũri? Tũtũũgagĩria Jehova o we wiki, na nowe twĩhokete atĩ nĩ arĩniina mathĩna thĩinĩ wa thĩ.
Hihi mĩtugo ĩrĩa ĩkagwo hĩndĩ ĩyo nĩ ĩraregana na ithimi cia Bibilia? Twagĩrĩirũo gũikaraga tũrĩ atheru kĩĩmĩtugo.
5. Teithia andũ arĩa angĩ gũtĩa wĩtĩkio waku
No ũkorũo ũtarĩ ũndũ mũhũthũ kũregana na andũ arĩa angĩ rĩrĩa marakũhatĩka ũnyitanĩre nao ikũngũĩro-inĩ iria itakenagia Jehova. Mataarĩrie itua rĩaku na njĩra ya ũũgĩ, ũrĩ na wetereri. Nĩguo muone ngerekano ya ũrĩa mũndũ angĩka ũguo, mwĩrorerei VIDEO ĩno.
Thomai Mathayo 7:12, mũcoke mwarĩrĩrie ciũria ici:
Kũringana na mũhari ũcio-rĩ, hihi nĩ wagĩrĩirũo kwĩra andũ anyu a famĩlĩ arĩa matarĩ etĩkia matigakũngũĩre thigũkũ?
Ũngĩka atĩa nĩguo wonie andũ anyu a famĩlĩ atĩ o na gũtuĩka ndũgũkũngũĩra thigũkũ hamwe nao nĩ ũmendete na nĩ wonaga marĩ a bata?
6. Jehova nĩ endaga tũkene
Jehova nĩ endaga tũkenanĩre hamwe na andũ a famĩlĩ na arata. Thomai Kohelethu 8:15, mũcoke mwarĩrĩrie kĩũria gĩkĩ:
Mũhari ũcio ũronania atĩa atĩ Jehova nĩ endaga tũkene?
Jehova nĩ endaga andũ ake mekenie na makenanĩre hamwe. Mwĩrorerei VIDEO ĩno muone ũrĩa ũndũ ũcio wonekaga wega igomano-inĩ citũ cia kĩĩmabũrũri.
Thomai Agalatia 6:10, mũcoke mwarĩrĩrie ciũria ici:
Hihi nĩ tũrabatara gũkũngũĩra thigũkũ iria ciendetwo nĩ andũ atĩ nĩguo twĩke andũ arĩa angĩ maũndũ ‘mega’?
Hihi nĩ rĩ ũngĩkenera ũkĩheana, nĩ rĩrĩa ũraheana tondũ nĩ ũraigua ũgĩtindĩkĩrĩrio-ĩ, kana nĩ rĩrĩa ũraheana wĩyendeire?
Aciari aingĩ Aira a Jehova rĩmwe nĩ mabangagĩra ciana ciao mahinda ma gwĩkenia o na magacihe iheo iterĩgĩrĩire. Angĩkorũo nĩ ũrĩ ciana-rĩ, nĩ maũndũ ta marĩkũ ma mwanya ũngĩciĩkĩra?
ANDŨ AMWE MOIGAGA: “Kĩhumo gĩa thigũkũ ti kĩa bata. Ũndũ wa bata nĩ gũkenanĩra hamwe na andũ a famĩlĩ na arata.”
Wee ũngiuga atĩa?
ŨRĨA TWERUTA
Jehova nĩ endaga tũkenanĩre hamwe na andũ a famĩlĩ na arata. O na kũrĩ ũguo, nĩ endaga twĩtheme ikũngũĩro iria itamũkenagia.
Ciũria cia gũcokera
Nĩ ciũria irĩkũ tũngĩĩyũria nĩguo tũmenye kana gĩkũngũĩro kĩna nĩ gĩkenagia Jehova?
Tũngĩteithia atĩa andũ aitũ a famĩlĩ na arata gũtaũkĩrũo nĩ matua maitũ megiĩ thigũkũ?
Nĩ kĩĩ kĩragũteithia kũmenya atĩ Jehova nĩ endaga twĩkenie na tũkenanĩre hamwe?
RIKĨRA
Thoma wone itũmi inya iria itũmaga twĩtĩkie atĩ gũkũngũĩra mĩthenya ya gũciarũo gũtikenagia Ngai.
“Aira a Jehova Magaga Gũkũngũĩra Mĩthenya ya Gũciarũo Nĩkĩ?” (Gĩcunjĩ thĩinĩ wa jw.org/ki)
Rora wone ũrĩa ciana iria ciendete Jehova cingĩmũkenia hĩndĩ ya mathigũkũ.
Akristiano milioni nyingĩ nĩ mathuurĩte kwaga gũkũngũyagĩra Krismasi. Maiguaga atĩa nĩ ũndũ wa gũtua itua rĩu?
a Rora Kohoro ga 5 Mũico-inĩ wa Ibuku wone ũrĩa ũngĩka maũndũ-inĩ mamwe marĩa mangĩyumĩria hĩndĩ ya thigũkũ.