Kĩĩranĩro gĩa thĩ gũgaatuĩka paradiso nĩ kĩagarũrire mũtũũrĩre wakwa!

MŨTŨŨRĨRE WAKWA WA HAU KABERE:

Ndaciarĩirũo Riga, mũciĩ mũnene wa bũrũri wa Latvia. Mami nĩwe waatũrerire tũrĩ na mwarĩ wa maitũ. O na gũtuĩka Mami aarĩ Mũgatoreki, twathiaga kanitha o rĩrĩa kũrĩ na thigũkũ cia ndini. Nĩ ndetĩkĩtie nĩ kũrĩ Ngai, no tondũ ndaarĩ mwĩthĩ, ndarũmbũyanagia mũno na maũndũ mangĩ ndendete.

O ũrĩa ndaakũraga, mami nĩ onaga atĩ nĩ ndendete kũrutania indo na gũcicokania, na kwoguo nĩ eetigagĩra kũndiga mũciĩ ndĩ wiki, tondũ gwakoragwo na indo nyingĩ mũno ingĩarutanirie. Nĩ ũndũ ũcio, akĩndehera tũcuma twa kũrutania na kũgathĩkania, na nĩ ndakenagĩra mũno gũthaka natwo. Ũndũ ũcio nĩ watwaranire na ũndũ ũngĩ ndendete, wa gũtwarithia nduthi. Mami nĩ aacokire akĩnyandĩkithia mahenya-inĩ meetagwo The Golden Moped ma tũtuthi twa gũcocerũo na magũrũ. Ngĩambĩrĩria gũthiaga mahenya ma tũtuthi tũu, na thutha-inĩ ngĩingĩra mahenya-inĩ ma nduthi nene.

Nĩ nderutire na ihenya gũtwarithia nduthi icio, na kwoguo ngĩambĩrĩria kũhotanaga mahenya-inĩ macio marĩa maakoragwo marĩ ũgwati mũnene. Nĩ ndahotanire maita matatũ mahenya ma Latvia, na ngĩhotana maita merĩ Mahenya ma Nduthi ma Mabũrũri ma Baltic.

ŨRĨA BIBILIA YAGARŨRIRE MŨTŨŨRĨRE WAKWA:

Ihinda-inĩ rĩu, mũirĩtu ũrĩa twarĩ ndũgũ nake wetagwo Evija (ũrĩa twacokire kũhikania) nĩ aaceereirũo nĩ Aira a Jehova. Hau kabere, nĩ onete ibuku rĩarĩ na handũ angĩaihũririe kũhoya arutwo Bibilia. Akĩihũria na agĩtũma. Thutha wa kahinda, agĩceererũo nĩ Aira erĩ a Jehova na makĩambĩrĩria kwĩrutaga nake Bibilia. Ndiarĩ na thĩna na ũguo, o na gũtuĩka ndiatindanagĩra mũno na maũndũ ma ndini.

Hĩndĩ ĩmwe, Aira acio a Jehova nĩ maanjũririe kana no njikare thĩ, thikĩrĩrie makĩĩruta Bibilia na Evija. Ngĩtĩkĩra, na maũndũ marĩa ndaiguire makĩngenia mũno. Ũndũ ũrĩa wahutirie ngoro mũno nĩ kĩĩranĩro kĩa Bibilia kĩgiĩ paradiso gũkũ thĩ. Kwa ngerekano, nĩ maanyonirie rĩandĩko rĩa Thaburi 37:10, 11, rĩrĩa riugaga ũũ: “Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho. No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.” Nĩ ndakenirio mũno nĩ kĩĩranĩro kĩu.

Ngĩambĩrĩria kũrũmbũyania na maũndũ ma kĩĩroho, na ngĩmenya atĩ ndini nĩ ciarutanaga maũndũ maingĩ ma maheeni. No maũndũ marĩa ndeerutaga kuuma Bibilia-inĩ, nĩ mangenirie tondũ maarĩ ma kwĩhokeka.

O ũrĩa nderutaga Bibilia, nĩ ndamenyire atĩ Jehova nĩ atĩĩte muoyo mũno, na nĩ awonaga ũrĩ wa bata. (Thaburi 36:9) Ngĩambĩrĩria gwĩciria mũno ũhoro wĩgiĩ mahenya ma nduthi, tondũ ndingĩendire kũiga muoyo wakwa ũgwati-inĩ rĩngĩ. Ithenya rĩa ũguo, rĩu ndendaga kũhũthĩra ũtũũro wakwa kũgoocithia Jehova. Nĩ ũndũ ũcio, kũgĩa igweta, na gũkenera mathako ma nduthi ngĩona ti maũndũ ma bata.

Kũrĩ mwaka wa 1996, nĩ ndaathire gĩthomo-inĩ kĩnene gĩa kĩĩmabũrũri kĩa Aira a Jehova, taũni-inĩ ya Tallinn, Estonia, hakuhĩ na kĩhaaro kĩrĩa twekagĩra mathako ma nduthi. Kũu, kwarĩ na andũ aingĩ mũno maagomanĩte kuuma mabũrũri matiganĩte, na maaikaranirie na thayũ mũingĩ na ũrũmwe. Kwa ngerekano, rĩrĩa Mũira ũmwe wa Jehova aateire gĩbeti gĩake, ndeciririe ndangĩkĩona rĩngĩ. No thutha wa kahinda, Mũira ũngĩ wa Jehova nĩ aakĩonire, na agĩgĩcokia na indo ciothe iria ciarĩ ho. Ũndũ ũcio nĩ wangegirie mũno! Hĩndĩ ĩyo nĩrĩo ndetĩkirie atĩ, Aira a Jehova marũmagĩrĩra biũ maũndũ marĩa merutaga kuuma Bibilia-inĩ. Tũrĩ na Evija, nĩ twathire na mbere kwĩruta Bibilia, na tũgĩbatithio mwaka wa 1997 tũgĩtuĩka Aira a Jehova.

ŨRĨA NGʼUNĨKĨTE:

Arata amwe akwa nĩ maakuĩrĩire mahenya-inĩ macio ũgwati ma nduthi. Thutha wa kwĩruta Bibilia, nĩ ndaamenyire atĩ nĩ ndabataraga kũmenyerera muoyo wakwa o ta ũrĩa Jehova, o we Mũheani wa muoyo endaga. Kũmenya ũguo no gũkorũo nĩkuo gũtũmĩte ngorũo ndĩ muoyo ũmũthĩ.

Nĩ twakeneire mũno tũrĩ na Evija, gũtungata kwa ihinda rĩa mĩaka ĩna wabici-inĩ ya Aira a Jehova ya Latvia, tũrĩ ndungata cia mahinda mothe. Nĩ tũkenagĩra mũno kũrera mũirĩtu witũ Alise, na kũmũteithia ende Jehova. Ningĩ nĩ ngenagĩra mũno kũruta wĩra mũthenya ũmwe o kiumia, gũthondeka ngaari na indo ingĩ wabici-inĩ ya ũtaũri ya Latvia. Nĩ ngĩaga na gĩkeno kĩnene kuona atĩ maũndũ marĩa ndeerutire ndĩ mũnini matirorĩra thĩ! O na ũmũthĩ ũyũ, no ndutanagia indo ngĩcigathĩkanagia.

Nĩ ũndũ wa maũndũ marĩa ndĩrutĩte kuuma Bibilia-inĩ, nĩ nyonaga arĩ gĩtĩo kĩnene mũno, niĩ na famĩlĩ yakwa kũmenyithia andũ ũhoro wĩgiĩ Ngai ũrĩa ũmwe wa ma. Hatarĩ nganja, kĩĩranĩro gĩa thĩ gũgaatuĩka paradiso, nĩ kĩagarũrire mũtũũrĩre wakwa!