Hihi Gĩthukĩ No Gĩthundũke Rĩngĩ?

TONDŨ mũtamaiyũ ũkoragwo wĩthiorete na ti mũrũngarũ, ndũkoragwo ũrĩ mũthaka ũringithanĩtio na mũtarakwa wa Lebanoni. O na kũrĩ ũguo, mũtamaiyũ nĩ ũkoragwo na ũhoti wa gwĩtiiria rĩera rĩa mĩthemba yothe. Gũtuĩkaga nĩ kũrĩ na mĩtamaiyũ ĩrĩ na ũkũrũ wa kĩndũ mĩaka 1,000. Nĩ ũndũ wa gũkorũo na mĩri ĩhotaga gũthiĩ kũndũ kũriku, mũtamaiyũ o na ũngĩtemwo nĩ ũhotaga kũringũra rĩngĩ. Angĩkorũo mĩri yaguo ndĩkuĩte, gĩthukĩ kĩaguo nĩ gĩthundũkaga rĩngĩ.

Ayubu eetĩkĩtie biũ atĩ o na angĩkua nĩ agaacoka muoyo rĩngĩ. (Ayub. 14:13-15) Akĩonania wĩtĩkio wake harĩ ũhoti wa Jehova wa kũmũriũkia, aahũthĩrire ngerekano ya mũtĩ, hihi wa mũtamaiyũ. Oigire ũũ: “Mũtĩ-rĩ, nĩwĩrĩgagĩrĩrũo atĩ watemwo nĩũgacoka gũthundũra.” Rĩrĩa kwoira thutha wa riũa inene, gĩthukĩ kĩũmũ kĩa mũtamaiyũ gĩthundũkaga ‘gĩkamera honge o ta mũtĩ wa mũmerano.’​—Ayub. 14:7-9.

O ta ũrĩa mwene mũgũnda eriragĩria kuona gĩthukĩ kĩa mũtamaiyũ gĩgĩthundũka, noguo Jehova Ngai eriragĩria gũcokia muoyo ndungata ciake na andũ angĩ aingĩ arĩa makuĩte. (Mat. 22:31, 32; Joh. 5:28, 29; Atũm. 24:15) Na githĩ gĩtigaakorũo kĩrĩ gĩkeno kĩnene kũnyita ũgeni andũ arĩa makaariũkio na kuona magĩtũũra rĩngĩ!