Ndeciragia nĩ ndakenagĩra ũtũũro biũ

MŨTŨŨRĨRE WAKWA WA HAU KABERE:

Ndaciarĩirũo gataũni-inĩ kanini thĩinĩ wa Poland, hakuhĩ na mũhaka wa Njĩrĩmani. Kwarigicĩirio nĩ mĩgũnda na mĩtitũ na ndaiguaga ndĩ na thayũ. Aciari akwa nĩ manyendete na nĩ maanjĩkagĩra ngoro ngorũo ndĩ mũndũ mwega, ndĩrutanĩrie cukuru, na thingate wĩra ũrĩ na mũcara mũnene.

Mathĩna makwa maambĩrĩirie hĩndĩ ĩrĩa ndathiire yunivasĩtĩ gũthomera watho taũni-inĩ ya Wrocław. Tondũ ndaarĩ haraihu na aciari akwa, nĩ ndaathuurire arata oru. Nĩ ndendete mũbira, no nĩ ũndũ wa gũceera na arata acio, ngĩwenda gũkĩria njano. Timũ ĩrĩa ndendete mũno yoimĩte Warsaw, na wikendi ciothe ndarũmanagĩrĩra nao kũrĩa guothe maathiaga gũthaaka. Mahinda-inĩ macio, twanyuaga njohi gũkĩria gĩthimi, tũkahũthĩra ndawa cia kũrebia, na rĩmwe na rĩmwe tũkarũa na andũ a timũ ĩyo ĩngĩ. Ndonaga gwĩka ũguo ta arĩ kũũrĩra mathĩna ma ũtũũro, no nĩ ndaamenyaga ingĩanyitirũo nĩ thigari, ũndũ ũcio nĩ ũngĩatũmire thũkie gĩthomo gĩakwa.

Niĩ na arata akwa nĩ tweendete gũthiĩ irabu-inĩ na ndaci. Kaingĩ tũrĩ kũu, nĩ tweingĩragia mbaara-inĩ. Nĩ ndaanyitirũo maita maigana ũna nĩ thigari, no hingo ciothe nĩ ndahotaga gwĩthema kuohwo, rĩmwe na rĩmwe na njĩra ya kũruta ihaki. Ndeciragia nĩ ndakenagĩra ũtũũro biũ. O na kũrĩ ũguo, ngoro-inĩ nĩ ndamenyaga atĩ ndireka ũrĩa kwagĩrĩire. O mũthenya wa Kiumia nĩ ndathiaga kanitha nĩguo ngerie kũhooreria thamiri.

ŨRĨA BIBILIA YAGARŨRIRE MŨTŨŨRĨRE WAKWA:

Mwaka-inĩ wa 2004, nĩ ndaceereirũo nĩ Aira a Jehova erĩ, na ngĩtĩkĩra kwĩruta Bibilia nao. Rĩrĩa ndamenyire maũndũ maingĩ megiĩ Akristiano a ma, thamiri yakwa ĩkĩambĩrĩria gũthĩnia mũno. Nĩ ndamenyaga atĩ nĩ ndaagĩrĩirũo gũtiga kũnyua njohi gũkĩria gĩthimi, kũhũthĩra ndawa cia kũrebia, na kũnyitanĩra na andũ mataatũũraga kũringana na ithimi cia Bibilia. Ningĩ nĩ ndonire atĩ nĩ ndabataraga kũgarũrĩra ngumo iria ndaarĩ nacio ta marakara na kwenda ũhinya. O na gũtuĩka nĩ ndamenyaga nĩ ndĩrabatara kũgarũrĩra, ndathiaga o na mbere gwĩka maũndũ macio mataagĩrĩire.

Ũtũũro wakwa wagarũrũkire ũtukũ ũmwe rĩrĩa ndarũire na athuri anana. Nĩ ndirikanaga ngomete njĩra-inĩ, ngĩhũrũo mũtwe na ngundi na mateke. Rĩrĩa ndonire ndĩ hakuhĩ gũkua, ngĩhoya ũũ: “Nĩ sori Jehova nĩ kwaga kuoya na ũritũ Kiugo gĩaku. Ingĩaga gũkua, nĩ ngwĩruta Bibilia na Aira a Jehova na thondeke ũtũũro wakwa.” Ũndũ wa kũgegania nĩ atĩ ndiakuire, na nĩ ndaahingirie ũrĩa ndoigĩte ũhoro wĩgiĩ kwĩruta Bibilia.

Mwaka wa 2006, nĩ ndathaamĩire Ngeretha. Muoroto wakwa warĩ thũkũme mbeca nyingĩ nĩguo njoke Poland ngathomere ndingirii ĩngĩ ya watho. O ngĩthiĩ na mbere kwĩruta Bibilia, harĩ rĩandĩko rĩahutirie mũno. Mũtũmwo Paulo aandĩkire ũũ: “Maũndũ mothe-rĩ, ndĩmatuaga ma tũhũ, kuona atĩ rĩu nĩ’menyete Kristo Jesu Mwathani wakwa na ũmenyi ũrĩa ũkĩrĩte kũna maũndũ macio mangĩ mothe. Nĩ tondũ wake ndorĩirũo nĩ indo ciothe, na ngacitua o ta mahuti ma gũteo, nĩ getha ndĩĩgĩĩre na Kristo.” (Afilipi 3:8) O ta niĩ, mũtũmwo Paulo aathomeire watho na ningĩ aarĩ mũndũ wahũthagĩra ũhinya. (Atũmwo 8:3) No nĩ aacokire akĩona atĩ nĩ kũrĩ njĩra ĩngĩ njega makĩria ya ũtũũro: gũtungatĩra Ngai na kwĩrutanĩria kwĩgerekania na Jesu. Rĩrĩa ndecũranirie ũhoro wa kĩonereria kĩa Paulo, nĩ ndonire atĩ wĩra ũrĩ na mũcara mũnene na kũhũthĩra ũhinya gũtingĩndehera gĩkeno. Ngĩgĩa na ma atĩ angĩkorũo Paulo nĩ aagarũrũkire, o na niĩ no ngarũrũke. Kwoguo ngĩtua itua rĩa gũikara Ngeretha na ngĩtiga gũthingata ndingirii ĩngĩ ya watho.

O ũrĩa nderutaga maũndũ maingĩ megiĩ Jehova, noguo ndaiguaga ngĩmũkuhĩrĩria makĩria. Nĩ ndaahutirio mũno nĩ kĩĩranĩro gĩake gĩa kuohera arĩa matuĩte na ngoro yothe kũgarũrũka. (Atũmwo 2:38) Ningĩ rĩrĩa ndecũũranirie ũhoro wa rĩandĩko rĩa 1 Johana 4:16, rĩrĩa riugaga atĩ “Ngai nĩwe wendani,” ngĩambĩrĩria gũtaũkĩrũo kĩrĩa gĩtũmaga Ngai athũũre ũhinya.

Ningĩ nĩ ndakenirio nĩ mĩthiĩre ya Aira a Jehova. Nĩ ndonire wega atĩ nĩ merutanagĩria gũtũũra kũringana na ithimi cia Bibilia cia mĩtugo. Nĩ ndendaga gũkorũo ndĩ ũmwe wao nĩguo ngenere ũrũmwe ũrĩa makenagĩra. Thutha wa kwĩrutanĩria na gwĩka mogarũrũku ũtũũro-inĩ wakwa, nĩ ndabatithirio mwaka-inĩ wa 2008, ngĩtuĩka Mũira wa Jehova.

ŨRĨA NGʼUNĨKĨTE:

Bibilia nĩ ĩndeithĩtie kũgarũrũka ngatiga gũtuĩka mũndũ wendete maũndũ manene, ũhinya, kũhũthagĩra ndawa cia kũrebia, kũnyua njohi gũkĩria gĩthimi, kwenda mũbira gũkĩria njano, na ngatuĩka ndungata ya Ngai na ngakenera kũruta andũ arĩa angĩ Bibilia. O na rĩu no nyendete kwĩrorera mũbira, no nĩ nduĩte itua rĩa kũigaga maũndũ ma gwĩkenia ta macio harĩa magĩrĩire.

Rĩu nĩ tũkoragwo na gĩkeno na Esther, mũtumia wakwa, ũrĩa tũthathayagia Jehova hamwe nake. Nĩ tũgĩaga na gĩkeno kĩa ma nĩ ũndũ wa kwĩruta Bibilia na andũ arĩa maragia rũthiomi rwa Polish gũkũ mwena wa rũgongo wa Ngeretha. Rĩu nĩ njiguaga njiganĩire biũ ũtũũro-inĩ wakwa. Ngoragwo na thamiri theru, na ũtũũro ũrĩ na muoroto.