Nyitaga Mbaru Ũnene wa Jehova!
“Wee Jehova Ngai witũ, nĩ wagĩrĩire rũgooco na riri na gĩtĩo o na hinya, nĩ gũkorũo nĩwe wombire indo ciothe.”—KŨG. 4:11.
1, 2. Nĩ ũũma ũrĩkũ o ũmwe witũ agĩrĩirũo gũkorũo naguo? (Rora mbica kĩambĩrĩria-inĩ gĩa gĩcunjĩ gĩkĩ.)
O TA ŨRĨA harĩrĩirio gĩcunjĩ-inĩ kĩu kĩhĩtũku, Mũcukani oigaga atĩ Jehova ndathanaga na njĩra njega na atĩ andũ no makorũo na ũtũũro mwega makĩyatha. Hihi Shaitani oigire ũrĩa kũrĩ? Ta wĩcirie ũrĩa kũngĩthiĩ korũo andũ arĩa mangĩthuura kwĩyatha no matũũre tene na tene. Hihi no makorũo na ũtũũro mwega mategwathwo nĩ Ngai? Hihi wee no ũkorũo ũrĩ na gĩkeno ũngĩkorũo ũheetwo wĩyathi ũtarĩ na gĩthimi wa gwĩkaga ũrĩa ũkwenda na ũtũũre tene na tene?
2 Gũtirĩ mũndũ ũngĩcokia ciũria icio handũ-inĩ haku. O mũndũ agĩrĩirũo nĩ gwĩciria ũhoro ũcio. Na njĩra ĩyo, mũndũ agĩrĩirũo kuona hatarĩ nganja atĩ wathani wa Ngai nĩguo wagĩrĩire. Nĩguo wathani ũrĩa mwega biũ. Na twagĩrĩirũo kũũnyita mbaru na ngoro itũ yothe. Bibilia nĩ ĩheanaga itũmi cia gũkorũo na ũũma ũcio. Kwa ngerekano, ta wĩcirie ũrĩa Maandĩko moigaga ũhoro-inĩ wĩgiĩ ũnene wa Jehova gũkorũo arĩ guo wagĩrĩire.
JEHOVA ARĨ NA KĨHOOTO GĨA GWATHANA
3. Nĩkĩ Jehova nowe ũrĩ na kĩhooto gĩa gũkorũo arĩ Mwathani Mũnene?
3 Jehova nĩwe ũrĩ na kĩhooto gĩa gũkorũo arĩ we Mwathani Mũnene wa igũrũ na thĩ tondũ we nĩ Ngai mwene hinya wothe na Mũũmbi. (1 Maũ. 29:11; Atũm. 4:24) Thĩinĩ wa Kũguũrĩrio 4:11, arĩa 144,000 magathana hamwe na Kristo kũrĩa igũrũ monanĩtio kĩoneki-inĩ makiuga ũũ: “Wee Jehova Ngai witũ, nĩ wagĩrĩire rũgooco na riri na gĩtĩo o na hinya, nĩ gũkorũo nĩwe wombire indo ciothe, na tondũ wa wendi waku ikĩgĩa kuo na ikĩũmbwo.” Tondũ Jehova nĩwe wombire indo ciothe, nĩwe ũrĩ na kĩhooto gĩa gwatha andũ o hamwe na ciũmbe cia roho.
4. Nĩkĩ kũregana na ũnene wa Ngai nĩ kũhũthĩra ũũru wĩyathi wa gwĩthuurĩra?
4 Gũtirĩ kĩndũ Shaitani ombĩte. Nĩ ũndũ ũcio, ndarĩ na kĩhooto o na kĩrĩkũ gĩa kwenda gũkorũo agĩathana igũrũ na thĩ. Rĩrĩa Shaitani hamwe na Adamu na Hawa maaremeire ũnene wa Jehova, meekire ũndũ wa mwĩtĩo. (Jer. 10:23) Nĩ ma, marĩ ciũmbe irĩ na wĩyathi wa gwĩthuurĩra nĩ mangĩathuurire kwaga gũtongorio nĩ Ngai. No hihi ũndũ ũcio nĩ wamaheire kĩhooto gĩa gwĩka ũguo? Aca. Wĩyathi wa gwĩthuurĩra nĩ ũteithagia andũ gũtua matua maingĩ mega o mũthenya. No ũndũ ũcio ndũmaheaga kĩhooto gĩa kũremera Mũũmbi wao na Mũmahei muoyo. Hatarĩ nganja, kũregana na Jehova nĩ kũhũthĩra ũũru wĩyathi wa gwĩthuurĩra. Tũrĩ andũ, twagĩrĩirũo gũkorũo tũrĩ rungu rwa wathani wa Jehova wa ũthingu.
5. Tũngĩkorũo na ma nĩkĩ atĩ matua ma Ngai nĩ ma kĩhooto?
5 Harĩ na gĩtũmi kĩngĩ kĩa Jehova gũkorũo arĩ we ũrĩ na kĩhooto gĩa gũtuĩka Mwathani Mũnene. Athanaga na kĩhooto gĩkinyanĩru. Oigaga ũũ: “Nĩ niĩ Jehova, o niĩ njĩkaga maũndũ ma ũtugi, na ngatuanĩra cira na kĩhooto, o na ngarũmia maũndũ ma ũthingu gũkũ thĩ; nĩ ũndũ . . . maũndũ macio nĩmo mangenagia.” (Jer. 9:24) Ndarũmagĩrĩra watho o na ũmwe ũthondeketwo nĩ andũ matarĩ akinyanĩru ũrĩ mũthingi wa gũtua ũndũ ũrĩa wa kĩhooto kana mwega. We mwene nĩwe ugaga kĩhooto kĩrĩa gĩkinyanĩru nĩ kĩĩ, na nĩkĩo aaheire andũ mawatho mandĩkĩtwo. No tũkorũo na ma atĩ mawatho make mothe, motaaro, na matua make makoragwo marĩ ma ũthingu tondũ “ũthingu o na kĩhooto nĩcio gĩtina gĩa gĩtĩ [gĩake] kĩa ũnene.” (Thab. 89:14; 119:128) Ngũrani na ũguo, Shaitani nĩ aremetwo kũrehe kĩhooto thĩinĩ wa thĩ o na gũtuĩka oigĩte atĩ ũnene wa Jehova ti mwega.
6. Gĩtũmi kĩmwe kĩa Jehova gũkorũo arĩ na kĩhooto gĩa gũtongoria thĩ nĩ kĩrĩkũ?
6 Makĩria ma ũguo, Jehova nĩwe ũrĩ na kĩhooto gĩa gũkorũo arĩ Mwathani Mũnene tondũ nĩ akoragwo na ũmenyo na ũũgĩ ũrĩa ũbataranagia harĩ kũrũmbũiya igũrũ na thĩ. Kwa ngerekano, Ngai nĩ aateithirie Mũrũ wake kũhonania mĩrimũ ĩrĩa nginya ndagĩtarĩ matangĩahotire kũhonia. (Mat. 4:23, 24; Mar. 5:25-29) Harĩ Jehova, maũndũ macio Jesu eekaga matiarĩ ciama. Jehova nĩ ataũkagĩrũo nĩ ũrĩa mwĩrĩ wa mũndũ ũhaana na nĩ arĩ ũhoti wa kũhonia thĩna o wothe ũrĩa ũrĩ ho. Na noguo kũrĩ ũhoro-inĩ wĩgiĩ ũhoti wake wa kũriũkia arĩa makuĩte na kũgirĩrĩria icanjama cia ndũire.
7. Ũũgĩ wa Jehova nĩ mũnene na gĩkĩro kĩrĩkũ ũkĩringithanio na wa thĩ ĩno ĩratongorio nĩ Shaitani?
7 Thĩ ĩno ĩrĩa ĩrĩ rungu rwa Shaitani no ĩretha njĩra cia kũniina njũkanĩrĩro iria irĩ gatagatĩ-inĩ ka mabũrũri, ĩndĩ no Jehova wiki ũrĩ na ũũgĩ wa kũrehe thayũ thĩinĩ wa thĩ. (Isa. 2:3, 4; 54:13) Tũkĩĩruta ũhoro wa ũmenyo na ũũgĩ wa Jehova, tũiguaga ta mũtũmwo Paulo ũrĩa woigire ũũ atongoretio nĩ roho: “Kaĩ ũtonga wa Ngai nĩ mũnene-ĩ, o na ũmenyo na ũũgĩ wake-ĩ! Matuĩro make o na njĩra ciake gũtirĩ mũndũ ũngĩhota gũtaũkĩrũo nĩcio.”—Rom. 11:33.
WATHANI WA JEHOVA NĨGUO MWEGA BIŨ
8. Nĩkĩ gĩgũkenagia mũno ũhoro-inĩ wĩgiĩ njĩra ya Jehova ya gwathana?
8 Bibilia to kuonania yonanagia tu atĩ Jehova arĩ na kĩhooto gĩa gwathana. Nĩ yonanagia nĩkĩ wathani wake nĩguo mwega biũ gũkĩra ũngĩ wothe. Gĩtũmi kĩmwe nĩ atĩ athanaga na njĩra ya wendo. Hatirĩ nganja atĩ ngoro citũ nĩ ihutagio nĩ ũrĩa Jehova athuuraga kũhũthĩra ũnene wake. Nĩ “Ngai ũrĩa ũiguanagĩra tha mũno, na agakinyĩria andũ wega wake, na ndahiũhaga kũrakara, na nĩaiyũirũo nĩ tha, na ũhoro-wa-ma.” (Tham. 34:6) Ngai arũmbũyagia ndungata ciake na njĩra ya gĩtĩo. Atũrũmbũyagia na njĩra njega o na gũkĩra ũrĩa tũngĩĩrũmbũiya ithuĩ ene. Ngũrani na ũrĩa Mũcukani oigaga, gũtirĩ ũndũ o na ũmwe mwega Jehova aimaga athathaiya ake ehokeku. Nĩ aarutire nginya Mũriũ wake endete mũno nĩguo tũgĩe na kĩĩrĩgĩrĩro gĩa gũkagĩa muoyo wa tene na tene.—Thoma Thaburi 84:11; Aroma 8:32.
9. Tũmenyaga atĩa atĩ Jehova nĩ arũmbũyagia nginya mũndũ ũmwe ũmwe?
9 Jehova ndarũmbũyagia andũ ake marĩ o gĩkundi tu. Nĩ arũmbũyagia nginya mũndũ ũmwe ũmwe. Kwa ngerekano, ta wĩcirie ũhoro wa ihinda rĩa mĩaka 300 rĩrĩa Jehova aaheaga hinya acirithania, nĩguo mahonokie rũrĩrĩ rwa Isiraeli kuuma kũrĩ arĩa maamaherithagia. Ihinda-inĩ rĩu iritũ, ndaagire kuona mũirĩtu ũmwe ũtaarĩ Mũisiraeli wetagwo Ruthu. Ruthu nĩ eetĩkĩrire kwĩima maũndũ maingĩ nĩguo agarũrũke aingĩre ũthathaiya-inĩ wa ma. Jehova nĩ aamũrathimire akĩmũhe mũthuri na mwana wa kahĩĩ. No to ũguo tu. Rĩrĩa Ruthu akaariũkio, nĩ akamenya atĩ mũrũ wake aatuĩkire wa rũciaro rũrĩa Mesia oimanire naruo. Na ta wĩcirie ũrĩa akaigua rĩrĩa akamenya atĩ rũgano rwake nĩ rwandĩkirũo thĩinĩ wa ibuku rĩa Bibilia rĩrĩa rĩtanĩtio na rĩĩtwa rĩake!—Ruth 4:13; Mat. 1:5, 16.
10. Nĩkĩ ũnene wa Jehova ndũimaga andũ wĩyathi?
10 Jehova ndathanaga na njĩra ya kũhinyanĩrĩria kana ya gĩthũri. Athanaga na njĩra ĩheaga andũ mweke wa gũkorũo na wĩyathi na magakorũo na gĩkeno. (2 Kor. 3:17) Daudi oigire ũũ: “Mbere-inĩ yake [Ngai] hatũũraga ũtĩĩku o na ũkaru, kũu gwake gũgagĩtũũra hinya o na gĩkeno.” (1 Maũ. 16:7, 27) O ũndũ ũmwe na ũcio, mwandĩki wa Thaburi wetagwo Ethani aandĩkire ũũ: “Gũkena-rĩ, nĩ kĩrĩndĩ kĩrĩa kĩmenyete riugĩrĩrio rĩrĩa rĩa gĩkeno; kĩu nĩgĩthiaga o na ũtheri wa gĩthiithi gĩaku, wee Jehova. Gĩtindaga gĩcanjamũkĩte mũthenya wothe nĩ ũndũ wa rĩĩtwa rĩu rĩaku, na tondũ wa ũthingu waku gĩgagĩtũũgĩra.”—Thab. 89:15, 16.
11. Tũngĩkĩra hinya atĩa ũũma witũ wa atĩ ũnene wa Jehova nĩguo mwega biũ?
11 Gwĩcũranagia kaingĩ ũhoro wĩgiĩ wega wa Jehova no gwĩkĩre hinya ũũma witũ atĩ wathani wake nĩguo mwega. Tũiguaga ta ũrĩa mwandĩki wa Thaburi aaiguaga rĩrĩa oigire ũũ: “Amu mũthenya ũmwe ũtindĩtwo nja ciaku nĩ mwega kũrĩ ĩrĩa ĩngĩ o na ĩngĩrĩ ngiri.” (Thab. 84:10) Na githĩ ũguo tiguo tũngĩĩrĩgĩrĩra gũkorũo? Jehova, arĩ we Mũtũũmbi na Mũtũthondeki, nĩ amenyaga kĩrĩa tũrabatara nĩguo tũkorũo na gĩkeno kĩa ma na ahingagia wendi ũcio na gĩkĩro kĩnene mũno. Ũndũ ũrĩa wothe atwĩraga twĩke ũkoragwo ũrĩ wa gũtũguna na thutha-inĩ ũgatũma tũkorũo na gĩkeno kĩingĩ. Ũguo noguo kũrĩ o na angĩkorũo nĩ harĩ maũndũ tũkũbatara kwĩima nĩguo twĩke wendi wake.—Thoma Isaia 48:17.
12. Gĩtũmi gitũ kĩnene gĩa kũnyita mbaru ũnene wa Jehova nĩ kĩrĩkũ?
12 Bibilia nĩ yonanagia atĩ thutha wa Wathani wa Mĩaka Ngiri wa Kristo andũ amwe nĩ magathuura kũregana na ũnene wa Jehova. (Kũg. 20:7, 8) Nĩ kĩĩ hihi gĩkamatindĩka gwĩka ũguo? Mũcukani, ũrĩa ũgakorũo ahingũrĩirũo kuuma kĩoho-inĩ gĩake atuĩte itua rĩa kũhĩtithia andũ, nĩ akamatindĩkĩrĩria makũrie mwĩyendo. Ũguo nĩguo atũũrĩte ekaga. No gũkorũo nĩ akageria kũiguithia andũ atĩ nĩ kũrĩ ũndũ mangĩka na mahote gũtũũra tene na tene mategwathĩkĩra Jehova. No gũtirĩ hĩndĩ ũndũ ta ũcio ũngĩkorũo ũrĩ wa ma. No kĩũria nĩ rĩrĩ: Hihi ũndũ ta ũcio wa maheeni nĩ ũgatũgucĩrĩria? Tũngĩkorũo twendete Jehova na tũmũtungatĩre nĩ ũndũ wa wega wake na tondũ nĩwe ũrĩ na kĩhooto gĩa gũkorũo arĩ Mwathani Mũnene wa igũrũ na thĩ, maheeni ta macio ma Mũcukani matingĩtũgucĩrĩria. Gũtirĩ hĩndĩ tũkerirĩria ũtũũro tũtarĩ rungu rwa wathani wa kĩhooto na wa wendo wa Jehova.
NYITA MBARU ŨNENE WA JEHOVA ŨRĨ MWĨHOKEKU
13. Kwĩgerekania na Ngai kuonanagia atĩa atĩ nĩ tũmũnyitaga mbaru?
13 Hatarĩ nganja twagĩrĩirũo kũnyita mbaru ũnene wa Jehova na ngoro itũ yothe. O ta ũrĩa tuona, arĩ na kĩhooto gĩa gwathana, na njĩra yake ya gwathana nĩyo njega biũ. No tũnyite mbaru ũnene wa Jehova kũgerera gũtũũria wĩkindĩru witũ na kũmũtungatĩra tũrĩ ehokeku. Tũngĩnyita mbaru ũnene wa Jehova na njĩra ĩrĩkũ ĩngĩ? No twĩke ũguo na njĩra ya gwĩka maũndũ ũrĩa Jehova endaga. Rĩrĩa tweka maũndũ na njĩra ya Jehova, tuonanagia atĩ nĩ tũmwendete na nĩ tũnyitaga mbaru njĩra yake ya gwathana.—Thoma Aefeso 5:1, 2.
14. Athuri a ciũngano na ciongo cia famĩlĩ mangĩĩgerekania atĩa na Jehova?
14 Kuumana na wĩruti witũ wa Bibilia nĩ tuonaga atĩ Jehova athanaga na njĩra ya wendo. Nĩ ũndũ ũcio, ciongo cia famĩlĩ na athuri a ciũngano arĩa mendete ũnene wa Jehova matirĩĩrĩgagĩrĩra maũndũ manene kuuma kũrĩ arĩa angĩ makahaana ta o nao marĩ na kaũnene kao. Handũ ha ũguo, marĩĩgerekanagia na Jehova. Paulo noguo eekaga, eegerekanagia na Ngai na Mũrũ wake. (1 Kor. 11:1) Paulo ndaaconorithagia andũ arĩa angĩ kana akamatindĩkĩrĩria nĩguo meke ũndũ mũna ũrĩa ũrabatarania. Handũ ha ũguo, nĩ kũmathaitha aamathaithaga. (Rom. 12:1; Ef. 4:1; Filem. 8-10) Ĩyo nĩyo njĩra ya Jehova ya gwĩka maũndũ. Nĩ ũndũ ũcio, arĩa othe manyitaga mbaru na mendete wathani wa Jehova magĩrĩirũo nĩ gwĩka o ũguo.
15. Gũtĩa ũnene wa gĩtheokrasi kuonanagia atĩa wendo witũ harĩ njĩra ya Jehova ya gwathana?
15 Tũiyũkagia atĩa ũtongoria ũrĩa ũheanagwo nĩ arĩa mamũrĩtwo nĩ Jehova? Twanyitanĩra nao tũrĩ na gĩtĩo, tuonanagia atĩ nĩ tũranyita mbaru ũnene wa Jehova. O na angĩkorũo tũtirataũkĩrũo biũ kana tũtĩretĩkania na itua rĩna, tũngĩenda kũnyita mbaru mĩbango ya gĩtheokrasi. Ũndũ ũcio nĩ ngũrani na ũrĩa thĩ ĩno ĩkaga maũndũ, no ĩyo nĩyo njĩra ya ũtũũro harĩ arĩa makoragwo rungu rwa wathani wa Jehova. (Ef. 5:22, 23; 6:1-3; Ahib. 13:17) Nĩ tũgunĩkaga nĩ ũndũ wa gwĩka ũguo, tondũ Ngai atwendagĩra maũndũ mega.
16. Arĩa manyitaga mbaru ũnene wa Jehova matuaga matua na njĩra ĩrĩkũ?
16 Ningĩ no tuonanie nĩ tũnyitaga mbaru ũnene wa Jehova kũgerera matua maitũ. Jehova ndatũheaga watho mũna maũndũ-inĩ mothe. Handũ ha ũguo, rĩrĩa aratũtongoria atũteithagia kũmenya mwĩcirĩrie wake. Kwa ngerekano, ti maũndũ maingĩ oigĩte megiĩ nguo iria Akristiano magĩrĩirũo kwĩhumba. Ithenya rĩa ũguo, onanagia atĩ wendi wake nĩ twĩhumbe na njĩra ĩtakĩrĩtie njano na yagĩrĩire Mũkristiano. (1 Tim. 2:9, 10) Ningĩ ndendaga tũhĩnge andũ arĩa angĩ kana tũmaiguithie ũũru nĩ ũndũ wa matua maitũ. (1 Kor. 10:31-33) Rĩrĩa twatongorio nĩ mwĩcirĩrie na maũndũ marĩa Jehova endaga handũ ha marĩa ithuĩ ene twendaga, tuonanagia nĩ twendete na nĩ tũnyitaga mbaru njĩra yake ya gwathana.
Nyita mbaru ũnene wa Jehova ũgĩtua matua, na maũndũ-inĩ megiĩ famĩlĩ (Rora kĩbungo gĩa 16-18)
17, 18. Njĩra imwe arĩa marĩ thĩinĩ wa kĩhiko mangĩonania nacio atĩ nĩ maranyita mbaru ũnene wa Jehova nĩ irĩkũ?
17 Ta wĩcirie ũndũ-inĩ ũmwe Akristiano marĩ thĩinĩ wa kĩhiko mangĩnyita mbaru njĩra cia Jehova na nĩ ũndũ ũcio makorũo makĩnyita mbaru ũnene wake. Kwa ngerekano, ĩ kĩhiko kĩngĩkorũo na moritũ kũrĩ ũrĩa meerĩgagĩrĩra, o na makaigua ta megũkua ngoro? Nĩ wega gwĩcũrania ũrĩa Jehova aahiũranagia na rũrĩrĩ rwa Isiraeli. Jehova eeringithanagia na mũthuri ũrĩ kĩhiko-inĩ na rũrĩrĩ rwa Isiraeli. (Isa. 54:5; 62:4) Kĩu kĩarĩ “kĩhiko” kĩritũ mũno! No Jehova ndakuire ngoro nĩ kĩo na ihenya. Aathire na mbere kũmonia tha na gũkorũo arĩ mwĩhokeku harĩ kĩrĩkanĩro gĩake nao. (Thoma Thaburi 106:43-45.) Na githĩ tũtigucagĩrĩrio harĩ Jehova nĩ ũndũ wa wendo ũcio mwĩhokeku?
18 Ũndũ ũmwe na ũcio, arĩa marĩ thĩinĩ wa kĩhiko na mendete njĩra cia Jehova nĩ megerekanagia nake. Matiethaga njĩra itarĩ cia Kĩĩmandĩko cia kuuma kĩhiko-inĩ kĩrĩ na mathĩna. Nĩ mamenyaga atĩ Jehova amohithanĩtie hamwe na endaga “manyitane.” Mũthingi wa Kĩĩmaandĩko ũrĩa ũngĩtũma matigane na mũndũ aingĩre kĩhiko-inĩ kĩngĩ no ũtharia tu. (Mat. 19:5, 6, 9) Na njĩra ya kwĩrutanĩria kwagĩria kĩhiko kĩao, makoragwo makĩnyita mbaru njĩra ya gwathana ya Jehova ya ũthingu.
19. Twagĩrĩirũo nĩ gwĩka atĩa tũngĩka ũndũ ũtaranyita mbaru ũnene wa Jehova?
19 Rĩmwe nĩ tũrĩkaga maũndũ marĩiguithagia Jehova ũũru tondũ tũtirĩ akinyanĩru. Nĩ amenyaga ũguo na nĩ atũteithĩtie kũgerera igongona rĩa ũkũũri rĩa Kristo. Kwoguo, rĩrĩa twahĩtia twagĩrĩirũo kũhoya Jehova atuohere. (1 Joh. 2:1, 2) Handũ ha gũthiĩ na mbere kwĩhũũra, twagĩrĩirũo kwĩrutanĩria twĩrute kuumana na ihĩtia rĩu. Twathiĩ na mbere gũkuhĩrĩria Jehova, nĩ egũtuohera na atũteithie tũcokwo nĩ hinya na tũkaahota kũhiũrania na ũndũ ta ũcio na njĩra njega ũngĩkoimĩra rĩngĩ.—Thab. 103:3.
20. Twagĩrĩirũo kũnyita mbaru ũnene wa Jehova nĩkĩ mahinda-inĩ maya?
20 Thĩinĩ wa thĩ njerũ, andũ othe magakorũo rungu rwa ũnene wa Jehova na merute njĩra ciake cia ũthingu. (Isa. 11:9) No ithuĩ nĩ tũramũkĩra gĩthomo kĩingĩ kĩgiĩ njĩra cia Jehova o na rĩu. Na thitango ya Shaitani ĩgiĩ ũnene wa Jehova no ĩrathiĩ na mbere gũcokio. Rĩrĩ nĩrĩo ihinda rĩa kũnyita mbaru ũnene wa Jehova kũgerera wĩkindĩru witũ, ũtungata witũ, na kĩyo gitũ gĩa kwenda kwĩgerekania nake maũndũ-inĩ mothe marĩa twĩkaga.