CIŨRIA KUUMA KŨRĨ ATHOMI

Nĩ kĩĩ gĩtũmaga Aira a Jehova monanie mũtũmwo Paulo arĩ na kĩhara kana atarĩ na njuĩrĩ nyingĩ?

Ũhoro wa ma nĩ atĩ, ũmũthĩ gũtirĩ mũndũ ũngĩhota kuuga arĩ na ma biũ ũrĩa mũtũmwo Paulo aahaanaga. Mbica na mĩcoro ĩrĩa ĩkoragwo mabuku-inĩ maitũ ikoragwo irĩ cia kuonania tu ũrĩa aahaanaga no ti ũndũ wĩkĩrĩtwo mũkonde nĩ andũ arĩa mathuthuragia indo cia tene.

O na kũrĩ ũguo, nĩ kũrĩ maũndũ mamwe mataaragĩria ũrĩa aahaanaga. Kwa ngerekano, ngathĩti ya Zion’s Watch Tower ya Machi 1, 1902, nĩ yagwetete kaũndũ kamwe. Yoigĩte ũũ: “Ũrĩa Paulo aahaanaga: . . . Thĩinĩ wa ibuku rĩmwe rĩtagwo ‘Acts of Paul and Thecla,’ rĩrĩa rĩandĩkirũo mwaka wa 150 thutha wa Kristo, no gũkorũo nĩrĩo rĩtaarĩirie wega ũrĩa Paulo aahaanaga. Riugĩte atĩ arĩ mũndũ ‘ũtaarĩ na mwĩrĩ mũnene, warĩ na kĩhara, warĩ na mbogoro, warĩ na hinya, warĩ na mbutu nene ciacemanĩtie, na ũtaarĩ na iniũrũ iraihu.’”

Ibuku rĩtagwo The Oxford Dictionary of the Christian Church (rĩa 1997) rĩkĩaria ũhoro ũcio riugaga: Ibuku rĩa ‘Acts’ nĩ rĩkoragwo na ũhoro wa ma wĩgiĩ historĩ. Ibuku rĩa The Acts of Paul and Thecla nĩ rĩaheetwo gĩtĩo mũno karine-inĩ cia mbere tondũ nĩ kũrĩ maandĩko 80 ma Kĩngiriki marĩo, na mangĩ maataũrĩtwo na thiomi ingĩ matũũraga nginya ũmũthĩ. Kwoguo, mbica iria tũcoraga nĩ itwaranaga wega na ũrĩa mũtũmwo Paulo angĩkorũo aahaanaga.

Ririkana atĩ nĩ kũrĩ maũndũ mangĩ ma bata makĩria gũkĩra ũrĩa mũtũmwo Paulo aahaanaga. O na rĩrĩa akoragwo ũtungata-inĩ, andũ amwe maamũkararagia nĩ moigaga ũũ: “Hĩndĩ ĩrĩa we mwene arĩ hamwe na ithuĩ ndakoragwo na hinya o na ciugo ciake nĩ cia tũhũ.” (2 Kor. 10:10) No tũtiagĩrĩirũo kũriganĩrũo atĩ aatuĩkĩte Mũkristiano kũgerera kĩama kĩrĩa aaringĩirũo nĩ Jesu. Ningĩ no twĩcirie maũndũ marĩa Paulo aahingirie tondũ ‘athuurĩtwo atuĩke wa gũtwara rĩĩtwa rĩa Jesu kũrĩ ndũrĩrĩ.’ (Atũm. 9:3-5, 15; 22:6-8) Ningĩ ta wĩcirie ũrĩa tũngĩgunĩka nĩ ũndũ wa mabuku ma Bibilia marĩa Jehova aatongoririe Paulo kwandĩka.

Paulo ndeetũgĩririe nĩ maũndũ marĩa aahingĩtie atatuĩkĩte Mũkristiano, na ndoigire ũrĩa aahaanaga. (Atũm. 26:4, 5; Afil. 3:4-6) Oigire ũũ: “Nĩ niĩ mũnini mũno harĩ atũmwo, na ndiagĩrĩire gwĩtwo mũtũmwo.” (1 Kor. 15:9) Aacokire akĩandĩka ũũ: “Niĩ, mũndũ mũnini kũrĩ andũ arĩa othe aamũre, ndaaheirũo ũtugi ũcio mũnene nĩguo hunjĩrie andũ a ndũrĩrĩ ũhoro ũrĩa mwega wĩgiĩ ũtonga ũrĩa ũtangĩtuĩrĩka wa Kristo.” (Ef. 3:8) Hatarĩ nganja, ũhoro ũcio nĩ wa bata mũno gũkĩra gũtindanĩra na ũrĩa Paulo aahaanaga.