2 | “Kũũmĩrĩrio nĩ Maandĩko”

BIBILIA YUGAGA ŨŨ: “Maũndũ mothe marĩa maandĩkirũo tene maandĩkirũo marĩ ma gũtũruta, nĩgetha kũgerera ũkirĩrĩria witũ na kũgerera kũũmĩrĩrio nĩ Maandĩko tũgĩe na kĩĩrĩgĩrĩro.” —AROMA 15:4.

Ũguo nĩ Kuuga Atĩa?

Bibilia nĩ ĩtũheaga hinya kũgerera ciugo cia gũtũũmĩrĩria iria ingĩtũteithia rĩrĩa tũreciria na njĩra ĩrĩa ĩtagĩrĩire. Ningĩ Bibilia nĩ ĩtũheaga kĩĩrĩgĩrĩro atĩ ruo rwa ngoro nĩ rũrĩthira ica ikuhĩ.

Kũhũthĩra Ũtaaro wa Rĩandĩko Rĩu Kũngĩteithia Atĩa?

Ithuothe nĩ tũhinyĩrĩrĩkaga kĩĩmeciria rĩmwe na rĩmwe, no andũ arĩa makoragwo na thĩna wa depression kana wa mĩtangĩko no mekore marĩ na ruo rwa ngoro o mũthenya. Bibilia ĩngĩteithia atĩa?

Bibilia nĩ ĩkoragwo na ciugo nyingĩ njega ingĩtũteithia kweheria meciria moru. (Afilipi 4:8) No ĩtũteithie kũiyũria meciria maitũ maũndũ ma kũũmĩrĩria na ma kũhooreria na kwoguo tũkaaga gũtoorio nĩ ruo rwa ngoro.—Thaburi 94:18, 19.
Bibilia no ĩtũteithie kweheria rĩciria rĩa atĩ tũtirĩ a bata.—Luka 12:6, 7.
Mĩhari mĩingĩ ya Bibilia nĩ ĩtũheaga ũũma atĩ tũtirĩ oiki na atĩ Ngai o we Mũũmbi witũ, nĩ ataũkagĩrũo biũ nĩ ũrĩa tũiguaga.—Thaburi 34:18; 1 Johana 3:19, 20.
Bibilia ĩranĩire atĩ Ngai nĩ akeeheria maũndũ moru marĩa tũngĩkorũo tũkĩririkana. (Isaia 65:17; Kũguũrĩrio 21:4) Kĩĩranĩro kĩu no gĩtũhe hinya wa gũthiĩ na mbere gũkirĩrĩria rĩrĩa tũrĩ na thĩna wa kĩĩmeciria na ruo rwa ngoro.

Ũrĩa Bibilia Ĩteithĩtie Jessica

Ũrĩa Hutagio nĩ Mũrimũ wa Depression

“Rĩrĩa ndarĩ na mĩaka 25, nĩ ndaremirũo kũhingagia maũndũ marĩa ndamenyerete gwĩka o mũthenya na ngĩmenyeka atĩ ndarĩ na mũrimũ mũnene wa depression. Maũndũ moru marĩa ndagereire ũtũũro-inĩ nĩ mookaga o rĩmwe meciria-inĩ o na iterĩgĩrĩire, na ũndũ ũcio ũgatũma thumbũke mũno. Mandagĩtarĩ nĩ maandeithirie gũtaũkĩrũo atĩ mũrimũ wakwa wa depression waumanĩte na meciria matagĩrĩire ma maũndũ moru marĩa ndagereire ũtũũro-inĩ. Makĩria ma kũnyua ndawa, nĩ ndabataraga kwaria na ndagĩtarĩ ũngĩandeithirie kũmenya na kũrũnga mwĩcirĩrie ũtarĩ mwega.”

Ũrĩa Bibilia Ĩndeithagia

“Rĩrĩa depression yakwa yathiĩ igũrũ, nĩ ndaikaraga ngĩhahũkaga, ngagĩa na mĩtangĩko mĩnene, na ngorũo nĩ toro. Kaingĩ nĩ ndakoragwo na mĩtangĩko mĩnene ũtukũ na ndiahotaga kũmĩgirĩrĩria. O ta ũrĩa Thaburi 94:19 ĩtaarĩirie, Ngai no atũmĩrĩrie na atũhoorerie rĩrĩa twagũmĩrũo nĩ mĩtangĩko. Kwoguo nĩ ndaigaga Bibilia na kabuku karĩa ndandĩkĩte maandĩko ma kũnyũmĩrĩria hakuhĩ na ũrĩrĩ wakwa. Ingĩorirũo nĩ toro, nĩ ndathomaga maandĩko maigana ũna, na njĩra ĩyo ngetĩkĩria meciria ma Ngai manyũmĩrĩrie.

“Bibilia ĩtwĩkagĩra ngoro tweherie meciria marĩa mataratwarana na maũndũ marĩa tũũĩ megiĩ Ngai. Na hau kabere ndetĩkĩtie atĩ ndarĩ mũndũ ũtarĩ kĩene, ũtangĩendeka, na wa tũhũ. No nĩ ndĩrutĩte atĩ mawoni ta macio nĩ mũgarũ na ũrĩa Bibilia ĩrutanaga atĩ Ngai nĩ Ithe witũ ũtwendete na ũrĩ tha, na nĩ arũmbũyagia o ũmwe witũ. O kahora kahora nĩ ndahotire kũgirĩrĩria meciria makwa handũ ha kũreka meciria macio mandoorie. Nĩ ndĩrutĩte kwĩyona ta ũrĩa Ngai anyonaga. Ikinya rĩu rĩarĩ rĩa bata tondũ nĩ rĩandeithirie kweheria mwĩcirĩrie mũũru ũrĩa ndarĩ naguo kwĩyerekera.

“Nĩ ndĩriragĩria mũno hĩndĩ ĩrĩa tũkeehererio maũndũ mothe moru tũririkanaga o hamwe na mwĩcirĩrie ũtagĩrĩire. Nĩ njũĩ atĩ mahinda marĩa mokĩte gũtigaakorũo na mathĩna ma kĩĩmeciria. Ũndũ ũcio nĩ ũndeithagia gũkirĩrĩria ihinda-inĩ rĩrĩ o njetereire ihinda rĩũkĩte rĩrĩa itagaathumbũrũo rĩngĩ nĩ mũrimũ wa depression.”