Exodus

28 “Ou na okulombwela omumwaxo Aron a dje mo mOvaisrael, pamwe novanamati vaye, opo a dule okulongela nge e li omupristeri pamwe naNadab naAbihu nosho yo Eliaser naItamar, ovanamati vaye. 2 Ou na okuningila omumwaxo Aron oikutu iyapuki i kale efimano newapalo laye. 3 Ou na okupopya novanhu aveshe ovo ve na ounghulungu,* ovo nda yadifa nomhepo younongo, notava ka ningila Aron oikutu oyo tai ulike kutya okwa yapulwa, opo a longele nge e li omupristeri.

4 “Ove na okuninga oikutu ei: okapapa koponhulo, okatetahema, okandjafa kehe na omaoko, oshikutu, elapi lokulimanga komutwe nomwiya; oikutu oyo iyapuki otave ke i ningila omumwaxo Aron novanamati vaye, opo a dule okulongela nge e li omupristeri. 5 Ovanailonga ovo ve na ounghulungu otava ka longifa oshingoli, eengodi dimbulau, olududi leedi lipeepela, oshiyata shitilyana neengodi diwa doliina.

6 “Ove na okuninga okatetahema koshingoli, tava longifa eengodi dimbulau, olududi leedi lipeepela, oshiyata shitilyana neengodi diwa doliina da hodilwa, noi na okuhondjelwa ko. 7 Oke na okukala ke na oitukulwa ivali komapepe oyo ya hondjelwa pombada yomapepe aeshe avali. 8 Omwiya,* oo wa hondjelwa kokatetahema, woku ka manga ka kale ponhele, ou na okukala wa longwa moinima ya faafana naayo yokatetahema: moshingoli, meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa.

9 “Ou na okukufa oumanya vavali vaonikis, ndele to shange ko omadina ovanamati vaIsrael, 10 omadina ahamano okokamanya kamwe, nomadina ahamano oo a xupa ko okokamanya kakwao, melandulafano ngaashi va dalwa. 11 Oo ta shange koumanya oku na okushanga omadina ovana vaIsrael koumanya vavali ngaashi oshihako, nou na oku va tula mouhakifo voshingoli. 12 Ou na okutula oumanya ovo vavali koitukulwa yokomapepe yokatetahema va kale oudimbulukifomanya kovanamati vaIsrael, na Aron oku na okuhumbata omadina avo komapepe aye avali koshipala shaJehova ve li edimbulukifo. 13 Ou na okuninga ouhakifo voshingoli 14 nosho yo oulyenge vavali voshingoli elela va hodilwa ngaashi ongodi, nou na okutula oulyenge ovo va fa eengodi mouhakifo.

15 “Ou na okulombwela omuhondji a ninge okapapa koponhulo ketokolo. Oke na okuningwa ngaashi okatetahema, moshingoli, meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa. 16 Oke na okukala ke na eehuke nhee di fike pamwe, ngeenge ka tulwa kumwe, noule wako ou na okukala u fike peke la xwaananekwa* nounene wako ou na okukala u fike peke la xwaananekwa. 17 Ou na okunateka ko oumanya, omikweyo nhee doumanya. Momukweyo wotete oto tula mo okamanya korubi, kotopas nokoemerald. 18 Momukweyo omutivali okamanya kotekois, kosafire nokoyasper. 19 Momukweyo omutitatu okamanya koleshema,* koagate nokoametisti. 20 Momukweyo omutine okamanya kokrisolit, kaonikis nokojadi. Ove na okupatelwa mouhakifo voshingoli. 21 Oumanya ovo ove lile po omadina ovanamati vaIsrael 12. Omadina oku na okushangwa ngaashi oshihako, nedina keshe oli na okukala li lile po limwe lomomapata 12.

22 “Kokapapa koponhulo ou na okuningila ko oulyenge va pandwa, ngaashi eengodi doshingoli elela. 23 Okapapa koponhulo ou na oku ka ningila oukongo vavali voshingoli, noukongo ovo vavali ou na oku va tula keexulo mbali dokapapa koponhulo. 24 Ou na okutula eengodi mbali doshingoli moukongo vavali ovo ve li keexulo dokapapa koponhulo. 25 Ou na okutula eexulo mbali deengodi mbali mouhakifo vavali, nou na oku di patela moitukulwa yokomapepe, komesho yokatetahema. 26 Ou na okuninga oukongo vavali voshingoli noku va tula keexulo mbali, odo di li meni komungenge wokapapa koponhulo, da taalela okatetahema. 27 Ou na okuninga vali oukongo vavali voshingoli komesho yokatetahema, pedu loitukulwa ivali yokomapepe, popepi naapo tai shakene, pombada yomwiya* oo wa hondjwa wokatetahema. 28 Okapapa koponhulo oke na okumangelwa ponhele kongodi imbulau, ya mangelwa moukongo vako nosho yo moukongo vokatetahema. Osho otashi ka ningifa okapapa koponhulo ka kale ponhele imwe kokatetahema, pombada yomwiya* oo wa hondjwa.

29 Aron oku na okuhumbata omadina ovanamati vaIsrael, oo e li kokapapa koponhulo ketokolo oko haka kala pomutima waye ngeenge te uya mouyapuki, opo Jehova a kale he va dimbuluka alushe. 30 Kokapapa koponhulo ketokolo ou na okutula ko Urim naTummim* nove na okukala pomutima waAron, ngeenge te uya koshipala shaJehova. Aron oku na okuhumbata pomutima waye oinima yokutokolifa Ovaisrael alushe, ngeenge te uya koshipala shaJehova.

31 “Ou na okuninga okandjafa kehe na omaoko akeshe ka ningwa meengodi dimbulau. 32 Oke na okukala ka patuluka pombada* pokati kako. Omuhondjo oo wa dingilila ombululu yofingo yako ou na okukala wa hondjwa, ngaashi omuhondjo wofingo yokandjafa komukwaita, opo kaha pomboke noupu. 33 Ou na okuhondjela ko oinima ya fa oiimati yomuti wogranati, ya ningwa neengodi dimbulau, nolududi leedi lipeepela noshiyata shitilyana, ya dingilila omungenge wako aushe nosho yo oungedjo voshingoli pokati kayo. 34 Ou na okulumbakanifa oungedjo voshingoli noinima oyo ya fa oiimati yomuti wogranati, oungedjo voshingoli noinima oyo ya fa oiimati yomuti wogranati, komungenge aushe wokandjafa oko kehe na omaoko. 35 Oke na okudjalwa kuAron, opo a dule okuyakula, nomukwelengedjo wako ou na okuudika, eshi ta i monhele iyapuki koshipala shaJehova naashi ta di mo, opo aha fye.

36 “Ou na okuninga okapapa moshingoli elela, taka vema, noku ka shanga ngaashi omunhu ta shange oshihako: ‘Ouyapuki owaJehova.’ 37 Ou na oku ka mangela kelapi lokulimanga komutwe nongodi imbulau; oke na okukala komesho yelapi olo. 38 Oke na okukala ke li mombaba yoshipala shaAron, na Aron oye e na okupulwa, ngeenge umwe a nyona shi na sha noinima iyapuki oyo Ovaisrael hava yapula, ngeenge tave i yandje i li eeshali diyapuki. Oke na alushe okukala mombaba yoshipala shaye, opo va dule okukala va hokiwa kuJehova.

39 “Ou na okuhondja oshikutu meengodi diwa doliina, nokuhondja elapi lokulimanga komutwe meengodi diwa doliina nosho yo okuhondja omwiya.

40 “Ou na yo okuningila ovanamati vaAron oikutu, eemwiya nomambale, omolwefimano newapalo. 41 Ou na okudika omumwaxo, Aron, novanamati vaye, nou na oku va vaeka, oku va nangeka po* noku va yapula, notava ka longela nge ve li ovapristeri. 42 Va ningila yo oumbulukweva va xupi voliina* vokutuvikila epenge lavo. Ove na okukala va dja moshiya fiyo opomatundji. 43 Ove na okudjalwa kuAron nokovanamati vaye, ngeenge tave uya metwali lokwoongalela, ile ngeenge tava i koaltari va ka yakule monhele iyapuki, opo vaha kale ve na ondjo novaha fye. Oyo onghedimhango yaalushe kuye nokoludalo laye olo tali mu shikula.