Hesekiel
1 Momudo omuti-30, mefiku etitano lomwedi omutine, ofimbo nda li mokati kovanhu, ovo ve li moukwatwa, pomulonga Kebar, eulu* ola yeuluka, nonda hovela okumona omamoniko aKalunga. 2 Mefiku etitano lomwedi, sha hala okutya, modula onhinhano youkwatwa wohamba Jehoiakin, 3 ondjovo yaJehova oye uya kuHesekiel,* omonamati womupristeri Busi, pomulonga Kebar moshilongo shOvakaldea. Ofimbo e li oko, eke laJehova ole uya kombada yaye.
4 Eshi nda li handi tale, onda mona oshikungulu shomhepo tashi di kolundume, nopa li oshilemo shinene nomundilo tau shela,* ya dingililwa kouyelele wa twa, nomokati komundilo omwa li oshinima tashi monika sha fa tashi taima.* 5 Musho omwa li oshinima tashi monika sha fa oishitwa ine, neholokepo lakeshe shimwe ola li la fa lomunhu. 6 Keshe shimwe osha li shi na oipala ine nomavava ane. 7 Eemhadi dayo oda li da yukilila, nomeni leemhadi dayo omwa li mwa fa koshi yomakondo okatana, noda li tadi vema ngaashi ongopolo tai vadima. 8 Oya li i na omake omunhu koshi yomavava ayo keembinga adishe nhee, naaishe ine oya li i na oipala nomavava. 9 Omavava ayo okwa li a kumafana namakwao. Ihai tanauka, ngeenge tai i; keshe shimwe ohashi i sha yukilila komesho.
10 Oipala yayo oya li i na eholokepo eli: Keshe shimwe shomwiine osha li shi na oshipala shomunhu nosho yo oshipala shonghoshi kolulyo, oshipala shongobe yomhedi kolumosho, nakeshe shimwe shomwiine osha li shi na oshipala shonhwa. 11 Oipala yayo osho ya li ngaho. Omavava ayo okwa li a xwaananekwa e li kombada yayo. Keshe shimwe osha li shi na omavava avali oo a li a kumafana nosho yo omavava avali a uvika omalutu ayo.
12 Keshe shimwe ohashi i sha yukilila komesho, tashi i keshe apa omhepo tai shi wilike shi ye. Ihai tanauka, eshi tai i. 13 Noishitwa oya li tai monika ya fa omakala omundilo a xwama, noshinima tashi monika sha fa eenyika da tema omundilo wa twa, osha li tashi linyenge sha yuka komesho nokonima pokati koishitwa, nokashelu oka shela okudja momundilo. 14 Nongeenge oishitwa tai i komesho nokwaaluka, elinyengo layo ola li li na eholokepo lokashelu taka shela.
15 Eshi nda li handi tale oishitwa, onda mona elola limwe kombada yedu li li polwamba loshishitwa keshe osho shi na oipala ine. 16 Omalola nomutungilo wao owa li tau vema ngaashi okamanya kokrisolit, naaeshe ane otaa monika a faafana. Eholokepo nomutungilo wao otai monika ya fa elola li li melola likwao.* 17 Ngeenge okwe linyenge, ohaa dulu okuya keembinga adishe nhee nopehe na okutanauka, eshi taa i. 18 Omawaaluku ao okwa li e na oule wopombada mukumwifi neenghono, nomawaaluku omalola oo aeshe ane okwa li e yadi omesho keembinga adishe. 19 Ngeenge oishitwa oye linyenge, omalola nao ohae linyenge pamwe nayo, nongeenge oishitwa oya i pombada okudja kedu, omalola nao ohaa i pombada. 20 Ohai i keshe apa omhepo tai i wilike i ye, keshe apa omhepo tai i. Omalola ohaa i pombada pamwe nayo, osheshi omhepo oyo tai longo moishitwa* oya li yo momalola. 21 Ngeenge tai linyenge, nao ohae linyenge; nongeenge oya kanghama, nao ohaa kanghama; nongeenge oya i pombada okudja pedu, omalola ohaa i pombada pamwe nayo, osheshi omhepo oyo tai longo moishitwa oya li yo momalola.
22 Kombada yomitwe doishitwa okwa li ku na oshinima sha fa oshilyatelo, tashi vema ngaashi oikangwameva iwa, sha yalwa kombada yomitwe dayo. 23 Koshi yoshilyatelo, omavava ayo okwa li a yukilila* a kumafana. Keshe shimwe osha li shi na omavava avali a uvika ombinga imwe yolutu layo, naavali a uvika ombinga ikwao. 24 Eshi nda uda epapamo lomavava ayo, ola li ngaashi epopomo lomeva taa endelele, ngaashi ewi lOmunaenghono adishe. Ngeenge ya li tai linyenge, oya li ya fa ewi letangakwaita. Ngeenge oya kanghama, ohai endjeleleke omavava ayo.
25 Opa li ewi li li pombada yoshilyatelo pomitwe dayo. (Ngeenge oya kanghama, ohai endjeleleke omavava ayo.) 26 Kombada yoshilyatelo, osho sha li kombada yomitwe dayo, okwa li ku na oshinima tashi monika sha fa okamanya kosafir, notashi monika sha fa olukalwapangelo. Kolukalwapangelo okwa li ku liwe omutumba kuumwe, oo a li e na eholokepo la fa lomunhu. 27 Onda mona oshinima tashi monika sha fa tashi taima sha fa omundilo tau di moshinima osho tashi monika sha fa oshiya shaye okuyuka pombada; nokudja moshiya shaye okuyuka pedu, onda mona oshinima tashi monika sha fa omundilo. Okwa li a dingililwa kouyelele tau twiya 28 ngaashi oo wouta wodula u li moshilemo mefiku olo taku lokwa. Ouyelele wa twa we mu dingilila, osho wa li tau monika ngaho. Owa li tau monika wa fa eholokepo loshinge shaJehova. Eshi nde shi mona, onde linyongamena pedu, nonda hovela okuuda ondaka yaumwe ta popi.