Embo lotete lOvakorinto
10 Ovamwatate, onda hala mu shiive kutya ootatekulululwa aveshe ova li momudile woshilemo naaveshe ova taulula efuta. 2 Ndele aveshe ova ninginifwa ve li ovashikuli vaMoses eshi va li momudile woshilemo nova taulula efuta. 3 Kalunga okwe va palula aveshe noikulya ya faafana 4 nokwe va pa oikunwa ya faafana. Ova kala hava nu omeva okudja memanya molweendo lavo, nemanya olo ola li tali faneke Kristus. 5 Ashike vahapu vomuvo kava li va hokiwa kuKalunga, nova li va fila mombuwa.
6 Oinima oyo oi li oihopaenenwa oyo tai tu londwele tuha kale twa hala okulonga owii ngaashi venya. 7 Inatu longela oikalunga ngaashi vamwe va li va ninga, osheshi Omishangwa oda ti: “Ovanhu ova lya nova nwa nokuhafela pamwe.” 8 Inatu haela* ngaashi vamwe vomuvo va li va haela,* novanhu 23 000 ova li va fya mefiku limwe. 9 Inatu yeleka Jehova ngaashi vamwe vomuvo va li ve mu yeleka, nova lika komayoka ndele tava fi. 10 Inatu ngongota ngaashi vamwe vomuvo va li va ngongota, nova dipawa komweengeli waKalunga.* 11 Oinima oyo ye va ningilwa oya shangwa i kale elondwelo kufye ovo tu li pexulilo lounyuni.*
12 Onghee hano, ou ta diladila kutya oku li ofika a pama na lungame aha wile po. 13 Eyeleko keshe tali mu hange oha li hange yo ovanhu aveshe. Ashike Kalunga omudiinini, noita efa mu yelekwe neyeleko olo itamu dulu okulididimikila, ndele ote mu kwafele mu dule okulididimika ngeenge mu li momayeleko.
14 Onghee hano, ovamwatate ovaholike, indeni onhapo okulongela oikalunga. 15 Ohandi popi novanaendunge, onghee tokoleni nye vene ngeenge eshi handi popi oshi li mondjila ile osha puka. 16 Mbela eholo lomanangeko noupuna olo hatu ilikanene kali fi omanangeko noupuna oo hatu mono omolwohonde yaKristus? Hano omungome ou hatu pambula kau fi omanangeko noupuna oo hatu mono omolwolutu laKristus? 17 Ndele molwaashi ope na omungome umwe auke, nonande otu vahapu, fye olutu limwe shaashi atushe ohatu li komungome umwe.
18 Diladileni kOvaisrael: Mbela ovo va li hava yakula koaltari kava li hava li oinima oyo ya li hai yambwa koaltari? 19 Nandi tye ngahelipi hano? Mbela oihongwafano noinima oyo ya yambelwa oikalunga oya fimana? 20 Ahowe; onda hala kutya, oiwana ohai yambele eendemoni, ndele haKalunga, ashike inandi hala mu kwatafane neendemoni. 21 Itamu dulu okunwa meholo laJehova nomeholo leendemoni; itamu dulu okulya “poshitaafula shaJehova” noposhitaafula sheendemoni. 22 Ile ‘otwa hala okuhandukifa Jehova’? Mbela otu na eenghono tu mu dule?
23 Oinima aishe oya pitikwa pamhango, ndele haaishe i na ouwa. Oinima aishe oya pitikwa pamhango, ndele haaishe tai tungu. 24 Inapa kala ou ta lalakanene ouwa waye mwene, ndele keshe umwe na lalakanene ouwa wamukwao.
25 Lyeni ombelela keshe tai landifwa pomalandifilo; inamu pulapula omolweliudo leni, 26 osheshi “edu olaJehova nakeshe osho shi li ko.” 27 Ngeenge mwa shivwa mu ka lye keumbo laao ehe fi omwiitaveli, ndele omwa tokola okuya, lyeni keshe osho te mu pe; inamu mu pulapula omolweliudo leni. 28 Ndele ngeenge umwe okwe mu lombwele ta ti, “Ombelela ei oya yambelwa oikalunga,” inamu i lya omolwaau e mu lombwela nomolweliudo. 29 Itandi popi eliudo loye, ndele olamukweni. Omolwashike emanguluko lange li na okutokolwa keliudo laumwe? 30 Ngeenge ohandi pandula Kalunga eshi handi li, omolwashike vamwe ve na okushekela nge osho nda yandjela olupandu?
31 Onghee hano, ngeenge tamu li ile tamu nu ile keshe tuu eshi tamu shi ningi, aishe i ningeni okufimanekifa Kalunga. 32 Lungameni muha pundukife Ovajuda, Ovagreka nosho yo eongalo laKalunga, 33 ngaashi ashike ame handi kendabala ndi wapalele ovanhu aveshe moinima aishe, hakulalakanena ouwa wange mwene, ndele owavahapu opo va xupifwe.