Numeri
27 Ovanakadona vaSelofad, omonamati waHefer, omonamati waGilead, omonamati waMakir, omonamati waManasse, vomepata laManasse, omonamati waJosef, ove uya kuMoses. Omadina ovanakadona vaye oo: Mahla, Noa, Hogla, Milka naTirsa. 2 Ova li va fikama komesho yaMoses, yomupristeri Eliaser, yomalenga noyongudu aishe oyo ya li poshivelo shetwali lokwoongalela, ndele tava ti: 3 “Tate okwa fila mombuwa, ndele ka li mokati kongudu oyo ya li ya ongala i tukululile Jehova oshibofa, ovayambididi vaKora, ashike okwa fya omolwenyono laye mwene noke na nande ovanamati. 4 Omolwashike edina latate li na okukana mo mepata laye, molwaashi ashike meumbo laye ehe na mo omonamati? Tu pa oshitukulwafyuululo pamwe novamwainamati vatate.” 5 Onghee Moses okwa ka lombwela Jehova eendjovo davo.
6 Opo nee Jehova okwa lombwela Moses, a ti: 7 “Ovanakadona vaSelofad ove li mondjila. Ou na oku va pa filufilu oshitukulwafyuululo pamwe novamwainamati vaxe noku va efa va fyuulule oinima yaxe. 8 Lombwela Ovaisrael kutya, ‘Ngeenge omulumenhu okwa fi ehe na omonamati, omu na okuyandja efyuululo laye komonakadona waye. 9 Ngeenge ke na omonakadona, otamu ka yandja efyuululo laye kovamwainamati. 10 Ndele ngeenge ke na ovamwainamati, otamu ka yandja efyuululo laye kovamwainamati vaxe. 11 Ashike ngeenge xe ke na ovamwainamati, otamu ka yandja efyuululo laye komupambele wopopepi elela mepata laye. Note ke li kufa po li li oshitukulwafyuululo. Etokolo olo otali kala onghedimhango kOvaisrael ngaashi ashike Jehova a lombwela Moses.’”
12 Opo nee Jehova okwa lombwela Moses, a ti: “Inda komhunda oyo yaAbarim, ndele to tale edu olo handi ka pa Ovaisrael. 13 Ngeenge we li mono, naave oto ka pakwa povakweni,* ngaashi ashike omumwaxo Aron, 14 molwaashi eshi ongudu ya li tai tangunine nge mombuwa yaSin, ino dulika kelombwelo lange lokuyapulifa nge moipafi yavo shi na sha nomeva. Oo omeva omuMeriba puKades, mombuwa yaSin.”
15 Moses okwa tya kuJehova: 16 “Jehova, Kalunga keemhepo dovanhu aveshe,* na hoolole mongudu omulumenhu, 17 oo ta kala ta di mo note uya kuvo naao ta kala te va wilike, eshi tava di mo naashi tave uya mo, opo ongudu yoshiwana shaJehova iha kale ngaashi eedi dihe na omufita.” 18 Jehova okwa tya kuMoses: “Kufa Josua, omonamati waNun, oo e na ondjungu,* ndele to mu tenheke eke loye. 19 Mu fikameka moipafi yomupristeri Eliaser nomoipafi yongudu aishe, ndele to mu nangeke po moipafi yavo. 20 Ou na oku mu pa eenghonopangelo* doye dimwe, opo ongudu aishe yOvaisrael i pwilikine kuye. 21 Josua ota ka fikama moipafi yomupristeri Eliaser, oo ta ka pula Jehova, ponhele yaJosua, opo a ulike okupitila moUrim kutya etokolo laye olilipi. Palombwelo laye otava ka dja mo, nopalombwelo laye otave ke uya mo, ye nOvaisrael aveshe ovo e li pamwe navo nosho yo ongudu aishe.”
22 Onghee Moses okwa ninga naanaa ngaashi Jehova e mu lombwela. Okwa kufa Josua, ndele te mu fikameke moipafi yomupristeri Eliaser nomoipafi yongudu aishe 23 nokwe mu tenheka omake, ndele te mu nangeke po, ngaashi ashike Jehova a popya okupitila muMoses.