Eehamba dotete
6 Momudo omuti-480, konima eshi Ovaisrael* va dja mo medu laEgipiti, modula onhine, konima eshi Salomo a ninga ohamba yaIsrael, momwedi Sif* (sha hala okutya, omwedi omutivali), okwa hovela okutunga eumbo laJehova.* 2 Eumbo, olo ohamba Salomo ya li ya tungila Jehova, oli na oule womukokomoko womaludimbo* 60, ounene womaludimbo 20 noule wopombada womaludimbo 30. 3 Okalupale kokufikila, oko ka li komesho yotembeli, oka li ke na oule* womukokomoko womaludimbo 20, u fike pomutamo weumbo. Oka li ka londa okudja komesho yeumbo nomaludimbo omulongo.
4 Okwa tunga omakende eumbo a andjuka meni, ndele kombada okwa fa a pata. 5 Natango, okwa tunga etungo limwe momunghulo weumbo, netungo olo ola li la dingilila otembeli* nosho yo Ouyapuki elela, nokwa li a tungila mo eenduda dokutuvikila da londafana. 6 Eenduda dopedu elela domeenduda odo da londafana oda li di na ounene womaludimbo atano, odo di li pokati oda li di na ounene womaludimbo ahamano, naado dopombada oda li di na ounene womaludimbo aheyali. Okwa tunga ekuma* la dingilila eumbo, opo paha kale sha sha kwatafana nekuma leumbo.
7 Eumbo ola li la tungwa nomamanya oo a pwa nale okulongekidwa, opo paha udike omaweelelo eehamala, omakuva nosho yo oilongifo ya longwa moshivela shilaula, eshi eumbo tali tungwa. 8 Oshivelo shonduda yopedu osha li sha ama kolukadi* leumbo, nopa li eetalapa da ngenuka, odo da yuka monduda yopokati, nokudja ponduda oyo yopokati, oda ya fiyo oponduda onhinhatu. 9 Okwa twikila okutunga eumbo, nokwe li mana filufilu, ndele te li uvilikifa oiti noipilangi yomisederi, i li melandulafano. 10 Okwa tunga eenduda da londafana meumbo alishe, nonduda keshe oya li i na oule wopombada womaludimbo atano, noda li da kwatakanifwa kumwe neumbo noiti yomisederi.
11 Mokweendela ko kwefimbo, ondjovo yaJehova oye uya kuSalomo, tai ti: 12 “Omolweumbo olo to tungu, ngeenge owa kala metwokumwe nomifindalandu dange, nokuwanifa po omatokolo ange nosho yo okudiinina oipango yange aishe, ohandi ke ku wanifila yo eudaneko, olo nda li nda udanekela xo David, 13 nohandi ka kala mokati kOvaisrael, noitandi ka efa po oshiwana shange Israel.”
14 Salomo okwa twikila okutunga eumbo, fiyo osheshi la pwa. 15 Okwa tunga meni lomakuma eumbo noipilangi* yomisederi. Okwa dengela meni lomakuma oiti, okudja pedu leumbo fiyo omeembuli, nokwa yala pedu leumbo oipilangi yomudjenipa. 16 Opo nee okwa tunga edimo li na omaludimbo 20 lokofindo yeumbo, e li tunga noipilangi yomisederi, okudja pedu fiyo omeembuli; edimo olo lomeni elela layo* ohali ifanwa Ouyapuki elela. 17 Otembeli,* sha hala okutya oshitukulwa shokomesho yeumbo, oya li i na omaludimbo 40. 18 Oipilangi yomisederi, oyo ya li meni leumbo, oya li ya fanekwa oitila nosho yo eengala da sheneka. Omamanya kaa li e wetike, molwaashi okwa li a uvikwa noipilangi yomisederi.
19 Okwa li a longekida Ouyapuki elela meni leumbo, omo a tula oshikefa shehangano laJehova. 20 Ouyapuki elela owa li u na oule womukokomoko womaludimbo 20, ounene womaludimbo 20 nosho yo oule wopombada womaludimbo 20. Okwe u vaeka noshingoli elela; noaltari okwe i uvika noiti yomisederi. 21 Salomo okwa vaeka meni leumbo noshingoli elela nokwa tula omalyenge oshingoli komesho yedimo lomeni elela, olo la vaekwa noshingoli. 22 Okwa vaeka eumbo alishe noshingoli fiyo la pwa ko, ndele ta vaeke yo oaltari noshingoli, oyo i li popepi nedimo lomeni elela.
23 Medimo lomeni elela okwa hongela mo ovakerubi vavali, e va honga momuti womupaina,* nakeshe umwe okwa li e na oule wopombada womaludimbo omulongo. 24 Evava limwe lomukerubi ola li li na omaludimbo atano, nalikwao ola li li na omaludimbo atano. Okudja koxulo yevava limwe fiyo okoxulo yevava likwao, ope na omaludimbo omulongo. 25 Omukerubi omutivali naye okwa li e na omaludimbo omulongo. Ovakerubi ovo vavali ova li ve na ounene neholokepo la faafana. 26 Ovakerubi aveshe ovo ova li ve na oule womaludimbo omulongo. 27 Okwa tula ovakerubi meni leumbo.* Omavava ovakerubi okwa li a xwaanana, opo evava limwe lomukerubi li dule okuhanga ombinga imwe yekuma, nevava lomukerubi mukwao li dule okuhanga ombinga ikwao yekuma. Omavava avo makwao okwa xwaanana a yuka pokati keumbo, opo omavava oo e likume. 28 Okwa vaeka ovakerubi noshingoli.
29 Momakuma aeshe eenduda mbali deumbo, okwa honga mo ovakerubi, omilunga nosho yo eengala da sheneka. 30 Okwa vaeka pedu leenduda mbali domeumbo noshingoli. 31 Poshivelo shedimo lomeni elela, okwa tula po omivelo da longwa moiti yomupaina, eengudimanya domomunghulo neengudimanya dopomuvelo. Ekuma ola li li na oitukulwa itano i fike pamwe, noshivelo osha li shimwe shomoitukulwa oyo. 32 Omivelo odo mbali oda li da hongwa moiti yomupaina, nokwa honga mo ovakerubi, omilunga neengala, nokwe i vaeka noshingoli. Ovakerubi nosho yo omilunga okwe di vaeka oshingoli. 33 Oshivelo shotembeli* nasho osho a li e shi ningila ngaho, e shi ningila eengudi da hongwa moiti yomupaina, naasho osha li oshitine shomoitukulwa oyo.* 34 Okwa ninga omivelo mbali da hongwa moiti yomudjenipa. Oshivelo shimwe osha li shi na omivelo mbali di li komakandula, noshivelo shikwao osha li shi na omivelo mbali di li komakandula. 35 Okwa honga ovakerubi, omilunga neengala da sheneka, ndele te i vaeke noshingoli.
36 Okwa tunga oshihale shomeni nomikweyo nhatu domamanya a kweywa, ndele kombada ta tula ko oiti yomisederi.
37 Momudo omuti-4, momwedi Sif,* ekanghameno leumbo laJehova ola li la tulwa po, 38 ndele modula onhi-11, momwedi Bul* (sha hala okutya omwedi omutihehatu), eumbo ola li la pwa okutungwa she likolelela kouyelele aushe, oo a li a pewa, nokondungefaneko i na sha nalo. Onghee okwa tunga etungo olo oule weedula heyali.