Omafimbo omativali
9 Ohambakainhu yokuSheba oya uda kombinga yaSalomo, onghee oye uya kuJerusalem i yeleke Salomo nomapulo a kitakana.* Oye uya pamwe nongudu inene yovapiya vayo, neengamelo da humbata omaadi o-balsam, oshingoli shihapu nosho yo omamanya ondilo. Opo nee oya ya kuSalomo, ndele tai mu lombwele oinima aishe oyo ya li momutima wayo. 2 Onghee Salomo okwa nyamukula omapulo ayo aeshe. Kapa li sha shidjuu* kuSalomo oku i yelifila.
3 Eshi ohambakainhu yokuSheba ya mona ounongo waSalomo, eumbo olo a tunga, 4 oikulya yoposhitaafula shaye, nghee ovapiya vaye hava kala omutumba, nghee ovayakuli voposhitaafula va unganekwa nosho yo omidjalo davo, ovapindili vaye nomidjalo davo nosho yo omaxwikiloyambo, oo ha yambe pandjikilile keumbo laJehova, oya li ya kumwa neenghono. 5 Ohambakainhu oya tya kohamba Salomo: “Ehokololo olo nda uda koshilongo shetu kombinga yaasho wa pondola* nosho yo kombinga younongo woye oloshili. 6 Ashike kanda li nda itavela omahokololo oo, fiyo osheshi nde uya, nonde shi mona nomesho ange mwene. Tala, kanda li nda lombwelwa ehokololo le lixwa po kombinga younongo woye muhapu. Ove ou dule kokule osho nda uda kombinga yoye. 7 Ovalumenhu nosho yo ovapiya voye, ovo hava kala alushe pamwe naave, nohava pwilikine kounongo woye, otava kala va hafa. 8 Jehova, Kalunga koye, na tangwe, oo e ku hokwa nokwe ku tula kolukalwapangelo u li ohamba yaJehova, Kalunga koye. Molwaashi Kalunga koye oku hole Israel, opo a kale po fiyo alushe, okwe ku hoolola u ninge ohamba yaIsrael, opo u tokole sha yuka nou pangele pauyuki.”
9 Opo nee ohambakainhu oya pa ohamba Salomo oitalenti* yoshingoli 120, omaadi mahapu o-balsam nosho yo omamanya ondilo. Kape na nande oumwe a eta omaadi o-balsam e fike pwaao ohambakainhu yokuSheba ya etela ohamba Salomo.
10 Natango, ovapiya vaHiram novapiya vaSalomo, ovo va eta oshingoli okudja kuOfir, ova etelela yo omiti domi-algum nomamanya ondilo. 11 Moiti yomi-algum, ohamba oya honga mo oiti yokuyambidida eumbo laJehova nosho yo eumbo* lohamba. Oya honga mo yo ouxumbafeta nosho yo oishikomwa yeengodi yovaimbi. Oiti ya tya ngaho inai monika mo nande onale medu laJuda.
12 Ohamba Salomo oya pa yo ohambakainhu yokuSheba keshe osho ya li ya hala noya pula, shi dulife* pwaasho ya etela ohamba. Opo nee ohambakainhu oya dja po, ndele tai shuna koshilongo shavo, pamwe novapiya vayo.
13 Oshingoli osho sha li sha pewa Salomo moule wodula imwe, osha li shi na ondjudo i fike poitalenti yoshingoli 666, 14 osho inashi kwatela mo oinima oyo ya etwa mo kovashingifi ovaendi noinima oyo ya etwa mo pamangeshefelo nosho yo oinima oyo ya etwa mo keehamba adishe dokuAraba nokoongoloneya vomoshilongo, ovo va li hava etele Salomo oshingoli noshisilveri.
15 Ohamba Salomo oya ninga oikelelifo 200 ya kula, ya vaekwa noshingoli (oshikelelifo keshe osha tulwa eesekeli* 600 da vaekwa noshingoli) 16 noikelelifo* 300 ya vaekwa noshingoli (nokoshikelelifo keshe okwa tulwa eemina* nhatu doshingoli). Opo nee ohamba oye i tula meumbo hali ifanwa Omufitu waLibanon.
17 Ohamba oya tunga yo olukalwapangelo linene, ya longifa omayoo eendjaba, ndele tai li vaeke noshingoli elela. 18 Okwa li ku na eetalapa hamano da yuka kolukalwapangelo, nopa li oshilyatelo sheemhadi shoshingoli sha kwatafana nolukalwapangelo. Oshipundi sholukalwapangelo osha li shi na oikwatelo keembinga adishe mbali, nopa li eenghoshi mbali di li ofika komunghulo woikwatelo yoshipundi. 19 Keetalapa hamano okwa li kwa fikama eenghoshi 12, koxulo yotalapa keshe yomeetalapa hamano oku na onghoshi. Kape na nande ouhamba umwe wa li wa ninga oshinima sha tya ngaho. 20 Oikwatelwa aishe yokunwina yohamba Salomo oya li ya longwa moshingoli, noilongifo aishe yomeumbo, olo hali ifanwa Omufitu waLibanon, oya li ya longwa moshingoli elela. Kamwa li mu na sha sha longwa moshisilveri, molwaashi pefimbo laSalomo, oshisilveri osha li sha talika ko shihe na ongushu. 21 Ovapiya vaHiram ova li hava i neeskepa dohamba kuTarsis. Konima yeedula nhatu keshe, eeskepa dokuTarsis ohadi uya da humbata oshingoli noshisilveri, omayoo eendjaba, oomunghima nosho yo eedila domaluvala mawa.*
22 Onghee ohamba Salomo oya li i dule eehamba adishe dokombada yedu moupuna nomounongo. 23 Eehamba dokombada yedu alishe oda li hadi i* kuSalomo, opo di ka pwilikine ounongo oo Kalunga kashili a tula momutima waye. 24 Keshe umwe okwa li ha eta eeshali, oinima ya longwa moshisilveri, oinima ya longwa moshingoli, oikutu, oinima yokuliamena molwoodi, omaadi o-balsam, eenghambe nomamwili, naasho osha kala hashi ningwa omudo keshe. 25 Salomo okwa li e na oyuunda yeenghambe 4 000, omatemba neenghambe* 12 000; okwa kala e i tula moilando, omo hamu kala omatemba, popepi naye, muJerusalem. 26 Okwa pangela eehamba adishe, okudja komulonga* fiyo okedu lOvafilisti nosho yo fiyo okeengaba daEgipiti. 27 Ohamba oye likongela oshisilveri shihapu muJerusalem ngaashi omamanya mahapu, nomuShefela oye likongela mo omiti domisederi dihapu neenghono, ngaashi omiti da fa omikwiyu.* 28 Ova li hava etele ohamba Salomo eenghambe da dja kuEgipiti nosho yo koilando ikwao aishe.
29 Ondjokonona aishe yaSalomo, okudja pehovelo fiyo opexulilo, mbela inai shangwa meendjovo domuprofeti Natan, momaxunganeko aAhia, Omusilo, nosho yo mondjokonona yomamoniko aIddo, omumonikokule, i na sha naJerobeam, omonamati waNebat? 30 Salomo okwa pangela Ovaisrael aveshe muJerusalem oule weedula 40. 31 Opo nee Salomo okwa nangekwa pooxekulululwa. Onghee ove mu paka mOshilando shaDavid, xe; omonamati waye, Rehabeam, okwa ninga ohamba ponhele yaye.