Omafimbo omativali
4 Okwa ninga oaltari yongopolo i na oule womukokomoko womaludimbo 20, ounene womaludimbo 20, noule wopombada omaludimbo 10.
2 Okwa hambula etemba* lomeva moshivela. Ola li li li ongonga, okudja komungenge umwe fiyo okomungenge mukwao omaludimbo 10, oule wopombada omaludimbo 5, nounene walo otau dulu okushakenwa kongodi youle womaludimbo 30. 3 Koshi yalo, okwa li kwa fanekwa oitila ye li dingilila alishe. Moludimbo limwe omu na oitila omulongo, oyo ya dingilila etemba. Oitila oyo oya li momikweyo mbali i li oshitukulwa shetemba. 4 Etemba ola li la tenhekwa keengobe 12 doshingoli; 3 oda taalela kolundume, 3 oda taalela kouninginino, 3 oda taalela kolukadi, na 3 oda taalela koushilo; adishe oda li da pilamena pokati ketemba. 5 Ounene walo owa li u fike pomutamo weke;* omungenge walo owa li wa fa omungenge wekopi, wa li u li ngaashi ongala yedo ya sheneka. Ola li hali humbata omeva e fike peebata* 3 000.
6 Okwa li a ninga eembaali omulongo dokukoshela, nhano okwe di tula kolulyo, nanhano okwe di tula kolumosho. Ova li hava koshele mo oinima oyo ya longifwa, eshi kwa li taku yambwa omaxwikiloyambo. Ndele metemba omwa li hamu likoshele ovapristeri.
7 Opo nee okwa ninga oikwatelwalamba omulongo yoshingoli, ngaashi sha popiwa kondadalunde, nokwe i tula motembeli, itano okolulyo, naitano okolumosho.
8 Okwa ninga yo oitaafula omulongo, ndele te i tula motembeli, itano okolulyo, naitano okolumosho. Okwa ninga vali ouyaxa voshingoli 100.
9 Okwa ninga oshihale shovapristeri, oshihale* shinene nosho yo omivelo doshihale. Omivelo dayo okwe di vaeka nongopolo. 10 Etemba okwe li tula kolulyo, lwokoushilolukadi.
11 Hiram okwa ninga yo oikwatelwa, oixupulo nouyaxa.
Opo nee Hiram okwa manifa oilonga oyo a li ta longele ohamba Salomo meumbo laKalunga kashili; 12 eengudi mbali nomitwe da fa ouyaxa, odo da li koxulo yeengudi odo mbali, ounete vavali vokuuvika omitwe mbali da fa ouyaxa, odo da li koxulo yeengudi; 13 oiimati yomuti wogranati 400, oyo ya li kounete vavali, omikweyo mbali doiimati yomuti wogranati yokanete keshe, yokuuvika omitwe mbali da fa ouyaxa, odo da li koxulo yeengudi mbali; 14 Outemba omulongo nosho yo eembaali omulongo, odo da li koutemba; 15 etemba nosho yo eengobe deemhedi 12, odo da tenhekwa etemba; 16 oikwatelwa, oixupulo, omafoloko noilongifo aishe ikwao, oyo Huram-abiv a hambulila ohamba Salomo mongopolo omolweumbo laJehova. 17 Ohamba oya longela oinima oyo moshitukulwa shaJordan, pokati kaSukkot naSereda, ya longifa edu lelova. 18 Oilongifo aishe oyo Salomo a ninga oya li ihapu neenghono; ondjudo yongopolo, oyo ya longifwa, kaya li i shiivike.
19 Salomo okwa ninga oilongifo aishe yomeumbo laKalunga kashili tai landula: oaltari yoshingoli, oitaafula kwa tenhekwa omingome dokutalika; 20 oikwatelwalamba neelamba dayo doshingoli elela, opo di kale da tema komesho yedimo lomeni elela, she likolelela koiteelelwa; 21 nosho yo eengala, eelamba, noidimifo,* ya longwa moshingoli, oshingoli elela; 22 oidimifo yomundilo, ouyaxa, oukopi noikwatelwa yomundilo yoshingoli elela; oshivelo sheumbo, omivelo dalo domeni domOuyapuki elela nosho yo omivelo deumbo lotembeli, ya longwa moshingoli.