Omafimbo omativali
31 Diva eshi va mana oinima aishe oyo, Ovaisrael aveshe, ovo va li po, ova ya moilando yaJuda, ndele tava teyaula po eengudimanya diyapuki nokutetaula po eepala diyapuki,* va hanauna po eenhele dokoikulundudu neealtari muJuda nomuBenjamin ashishe nosho yo muEfraim nomuManasse, fiyo osheshi ve i hanauna po filufilu. Konima yaasho, Ovaisrael aveshe ova shuna koilando yavo, keshe umwe konhele yaye.
2 Opo nee Hiskia okwa unganeka ovapristeri nOvalevi paengudu davo, opo va dule okuwanifa po oilonga yavo, oyo va pewa. Ova yamba omaxwikiloyambo nomayambo oukumwe; ova yakula nova pandula nokuhambelela moivelo yoihale* yaJehova. 3 Oshitukulwa shoinima yohamba osha li sha yandjwa shi li omaxwikiloyambo, mwa kwatelwa omayambo ongula nookonguloshi nosho yo omaxwikiloyambo Omashabata, eemwedi dipe noivilo, she likolelela kwaasho sha shangwa mOmhango yaJehova.
4 Natango, okwa li a yandja elombwelo kovakalimo vomuJerusalem, va yandje oshitukulwa osho shi na okupewa ovapristeri nOvalevi, opo va dulike filufilu* komhango yaJehova. 5 Diva eshi omhango oyo ya yandjwa, Ovaisrael ova yandja oinima, oyo ya pya tete, momuvalu muhapu; oilya, omaviinyu mape, omaadi, omaadi eenyiki noilikolomwa aishe ikwao yomepya; ova yandja oshitimulongo shihapu shomoilikolomwa keshe. 6 Ovaisrael nOvajuda, ovo hava kala moilando yaJuda, ova eta yo oitimulongo yeengobe, yeedi, noitimulongo yoinima iyapuki, oyo ya li ya yapulilwa Jehova, Kalunga kavo. Ove i eta, ndele tave i tula meenduba dihapu. 7 Momwedi omutitatu, ova hovela okwoongela omayambidido avo meenduba, nova mana momwedi omutiheyali. 8 Eshi Hiskia nomalenga ve uya nova mona eenduba odo, ova hambelela Jehova, nova nangeka noupuna oshiwana shaye Israel.
9 Hiskia okwa pula ovapristeri nOvalevi kombinga yeenduba odo, 10 na Asaria, omupristeri omukulunhu, womeumbo laSadok, okwe mu nyamukula, a ti: “Okudja ashike eshi ovanhu va hovela okweeta omayambidido keumbo laJehova, ovanhu ova hovela okulya tava kuta, nope na natango oinima ihapu, molwaashi Jehova okwa nangeka noupuna oshiwana shaye, noinima aishe ei ihapu oya xupa po.”
11 Opo nee Hiskia okwe va lombwela va longekide eemhungulilo* meumbo laJehova, nove di longekida. 12 Ova diinina okweeta omayambidido, oitimulongo noinima iyapuki; Konania, Omulevi, okwa li a tulwa po a pashukile oinima aishe oyo e li omupashukili, nomumwaina, Simei, okwa li omutivali. 13 Jehiel, Asasia, Nahat, Asahel, Jerimot, Josabad, Eliel, Ismakia, Mahat naBenaia ova li eendjai tava kwafele Konania nomumwainamati, Simei, pashipango shohamba Hiskia, na Asaria okwa li omupashukili weumbo laKalunga kashili. 14 Kore, omonamati waImna, Omulevi oo ha pashukile poshivelo shokoushilo, okwa li ta pashukile omayambo ehalo liwa aKalunga kashili, nokwa tukula omayambidido, oo a pewa Jehova, nosho yo oinima iyapuki elela. 15 Ovo va li koshi yepashukilo laye oEden, Miniamin, Jesua, Shemaia, Amaria naSekania, ve li moilando yovapristeri, tava longo oilonga, oyo ve lineekelelwa, yokutukulila vamwaina paengudu oitukulwa i fike pamwe, kutya nee omukulunhu, ile omunyasha. 16 Shikwao vali, ova li yo hava tukulile oinima oyo ovo va li ve lishangifa pashikulafano lavo, ovalumenhu ovo va li have uya okulonga efiku keshe keumbo laJehova, nokuwanifa po oinakuwanifwa yavo paengudu davo, nosho yo ovanamati vavo, okudja peedula nhatu okuyuka pombada.
17 Ovapristeri ova li ve lishangifa pashikulafano lomaukwaneumbo omapata avo, ngaashi ashike Ovalevi, ovo va li ve na eedula okudja 20 okuyuka pombada, painakuwanifwa yeengudu davo. 18 Omusholondodo womadina oo owa li wa kwatela mo ovana vavo aveshe, ovakulukadi vavo, ovanamati vavo novanakadona vavo, eongalo lavo alishe, molwaashi ove likoshola omolwoilonga iyapuki, oyo ve lineekelelwa, 19 nosho yo oludalo laAron, ovapristeri, ovo va li hava di moitukulwa, oyo ya dingilila oilando yavo. Moilando aishe, ovalumenhu ova li va hoololwa pamadina va yandje oitukulwa komulumenhu keshe mokati kovapristeri, nokukeshe umwe oo e li momusholondodo womadina Ovalevi.
20 Hiskia osho a ninga ngaho muJuda ashishe, nokwa twikila okuninga osho shiwa nosha yuka momesho aJehova, Kalunga kaye, nokwa kala omudiinini kuye. 21 Oilonga aishe oyo a longa, opo a longele Kalunga kaye, kutya nee oi na sha noilonga yomeumbo laKalunga kashili, ile onOmhango nosho yo oipango, okwe i longa nomutima aushe, nokwa li a pondola.