Numeri

4 Jehova okwa popya naMoses naAron, ta ti: 2 “Valuleni ovanamati vaKohat, ovo ve li mokati kovanamati vaLevi, pamaludi avo, pamaukwaneumbo omapata avo, 3 aveshe ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela.

4 “Ei oilonga oyo tai ka longwa kovanamati vaKohat metwali lokwoongalela. Oi li oshinima shiyapuki elela: 5 Aron novanamati vaye otave ke uya mo, ngeenge onhanda tai tembuka, notava ka kufa po etukulifolapi, ndele tave li uvikifa oshikefa shOipelende yOumbangi. 6 Otava ka yala ko oshipa shombwa yomomeva nosho yo elapi la kola limbulau, ndele tava tula eepala doku shi humbatifa ponhele.

7 “Otava ka yala yo elapi limbulau poshitaafula shomungome wokutalika, notava ka tula po oiyaxa, oukopi, ouyaxa nomakopi oshikunwayambo; ope na okukala omungome oo hau yambwa pandjikilile. 8 Koinima oko otava ka yala ko elapi litilyana, ndele tava uvike ko oshipa shombwa yomomeva nokutula ponhele eepala dokuhumbatifa oshitaafula. 9 Opo nee otava ka kufa elapi limbulau, ndele tava uvike oshikwatelwalamba shokuminikila, pamwe neelamba dasho, oidimifo* yasho, oikwatelwa yomundilo yasho, noikwatelwa yasho aishe yomahooli, oo haa kaleke oshikwatelwalamba sha tema. 10 Oshikwatelwalamba nosho yo oilongifo yasho aishe otave ke i dingila moshipa shombwa yomomeva, ndele tave shi tula komutengi woku shi humbatifa. 11 Otava ka yala elapi limbulau koaltari yoshingoli, ndele tave i uvike noshipa shombwa yomomeva, nokutula ponhele eepala doku shi humbatifa. 12 Opo nee otava ka kufa oilongifo aishe oyo hava longifa moilonga oyo hava longo alushe monhele iyapuki noku i tula melapi limbulau, ndele tave i uvike noshipa shombwa yomomeva noku i tula komutengi wokuhumbatifa.

13 “Otava ka kufa mo omute* moaltari, ndele tava yale ko elapi la longwa molududi leedi lipeepela. 14 Otava ka tula ko oilongifo yavo aishe, oyo hai longifwa, ngeenge ovanhu tava yakula koaltari: oikwatelwa yomundilo, omafoloko, oixupulo nouyaxa, oilongifo aishe yoaltari; otava ka yala ko oshipa shombwa yomomeva, ndele tava tula ponhele eepala doku i humbatifa.

15 “Ngeenge onhanda tai tembuka, Aron novanamati vaye ove na okumanifa oilonga yokuuvika onhele iyapuki nosho yo oilongifo aishe yomonhele iyapuki. Ngeenge ova mane, ovanamati vaKohat otave ke uya mo va humbate po oinima oyo, ashike kave na okukuma onhele iyapuki, ngeenge ove shi ningi, otava fi. Oinima oyo oi li oshinakuwanifwa* shovanamati vaKohat shi na sha netwali lokwoongalela.

16 “Eliaser, omonamati womupristeri Aron, oku na oshinakuwanifwa shokupashukila omahooli okutemifa, oitwimifo yedimba liwa, eendjayambo, odo hadi yambwa pandjikilile, nomaadi okuvaeka. Oku na okupashukila etwalihangano alishe noinima aishe oyo i li mo, mwa kwatelwa onhele iyapuki noilongifo yamo.”

17 Jehova okwa popya vali naMoses naAron, a ti: 18 “Inamu efa epata lOvakohat li dimwe mo mokati kOvalevi. 19 Omu na oku va ningila ngaha, opo va kale nomwenyo, novaha fye omolwokukuma oinima iyapuki elela. Aron novanamati vaye ove na okuya mo noku pa keshe umwe oshinakuwanifwa shaye, noku va ulikila osho ve na okuhumbata. 20 Kave na okuuya mo va mone oinima iyapuki, kutya nee okanini. Ngeenge ova ningi ngaho, otava fi.”

21 Opo nee Jehova okwa lombwela Moses, a ti: 22 “Ovanamati vaGerson nava valulwe pamaukwaneumbo omapata avo nopamaludi avo. 23 Ou na okushanga aveshe, ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela. 24 Omapata Ovagerson okwa pewa oshinakuwanifwa shokufila oshisho nokuhumbata oinima ei: 25 Otava ka humbata omalapi etwalihangano, etwali lokwoongalela, elapi loku li uvika, nofaila ya longwa moipa yeembwa domomeva, oyo i li kombada yalo, oshiidilifoyata* shoposhivelo shetwali lokwoongalela, 26 omalapi, oo a endjelela momunghulo woshihale, oshiidilifoyata* shoposhivelo shoshihale, osho sha dingilila etwalihangano noaltari, eengodi dayo noilongifo yayo aishe nakeshe shimwe osho hashi longifwa moilonga yamo. Osho osho oshinakuwanifwa shavo. 27 Oilonga aishe noinakuwanifwa yOvagerson oi na okupashukilwa kuAron nokovanamati vaye; ou na oku va pa oilonga aishe oyo i li oshinakuwanifwa shavo. 28 Oyo oilonga oyo omapata Ovagerson e na okulonga metwali lokwoongalela, noinakuwanifwa yavo oi na okupashukilwa kuItamar, omonamati womupristeri Aron.

29 “Ovanamati vaMerari ou na oku va shanga pamapata nopamaukwaneumbo omapata avo. 30 Ou na okushanga ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela. 31 Oinima oyo ve na okuhumbata i na sha noilonga yavo yoketwali lokwoongalela oyo ei: eelama detwalihangano, eenghambo dalo, eengudi dalo, oikwatelwamhadi yalo, 32 eengudi doshihale osho she li dingilila, oikwatelwamhadi yado, ouhakifo vado, neengodi dayo pamwe noilongifo yayo aishe, nokulonga oilonga aishe oyo ya kwatela mo oinima oyo. Ou na oku va lombwela kondadalunde osho keshe umwe ta ka humbata. 33 Omapata ovanamati vaMerari osho e na okulonga ngaho metwali lokwoongalela, koshi yewiliko laItamar, omonamati womupristeri Aron.”

34 Onghee Moses naAron nosho yo omalenga ongudu yovanhu ova shanga ovanamati vOvakohat pamaludi avo nopamaukwaneumbo omapata avo, 35 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 36 Omuvalu waavo ve lishangifa pamaludi avo owa li 2 750. 37 Ovo va li ve lishangifa ova dja momapata Ovakohat; aveshe ovo va li tava longo metwali lokwoongalela. Moses naAron ove va shanga palombwelo laJehova okupitila muMoses.

38 Ovanamati vaGerson ova shangwa pamaludi avo, nopamitwe domaukwaneumbo avo, 39 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 40 Omuvalu waavo ve lishangifa pamaludi avo nopamaukwaneumbo omapata avo owa li 2 630. 41 Oo okwa li omalishangifo omapata ovanamati vaGerson, aveshe ovo va li tava longo metwali lokwoongalela. Moses naAron ove va shanga palombwelo laJehova.

42 Ovanamati vaMerari ova shangwa pamaludi avo nopamaukwaneumbo omapata avo, 43 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 44 Omuvalu waavo ve lishangifa pamaludi avo owa li 3 200. 45 Oo okwa li omalishangifo omapata ovanamati vaMerari, ovo Moses naAron va shanga palombwelo laJehova okupitila muMoses.

46 Moses, Aron nomalenga aIsrael ova shanga Ovalevi aveshe pamaludi avo nopamaukwaneumbo omapata avo; 47 ovo va li va shangwa ovovo ve na eedula okudja po 30 fiyo 50, aveshe ovo va li va pewa oshinakuwanifwa noilonga i na sha netwali lokwoongalela. 48 Omuvalu waavo ve lishangifa owa li 8 580. 49 Ova li va shangwa palombwelo laJehova okupitila muMoses, keshe umwe she likolelela koshilonga shaye nokoshinakuwanifwa shaye osho a pewa. Ova li va shangwa ngaashi naanaa Jehova a li a lombwela Moses.