Omafimbo otete
10 Ovafilisti ova li tava lwifa Ovaisrael, nOvaisrael ova li va faduka po Ovafilisti, navahapu vomuvo ova fila pomhunda yaGilboa. 2 Ovafilisti ova kala tava taataa Saul novanamati vaye, ve va li popepi elela, nova dipaa ovanamati vaSaul, Jonatan, Abinadab naMalkisua. 3 Ova li tava lwifa Saul olwoodi la kwata moiti, novaumbi ove mu hanga, ndele tave mu ehameke. 4 Opo nee Saul okwa lombwela omuhumbati woilwifo yaye, ta ti: “Pweya mo eongamukonda loye, ndele to li twifa nge, opo ovalumenhu ovo inava pita etanda vehe uye, ndele tava hepeke nge nonyanya.” Ashike omuhumbati woilwifo yaye ka li a hala, molwaashi okwa li a tila unene. Onghee Saul okwa kufa eongamukonda, ndele ta wile kulo. 5 Eshi omuhumbati woilwifo yaye a mona kutya okwa fya, naye okwa wila keongamukonda laye, ndele naye ta fi. 6 Saul novanamati vaye vatatu osho va fya ngaho, naaveshe ovo vomeumbo laye ova fila pamwe. 7 Eshi Ovaisrael aveshe, ovo va li mefilu, va mona kutya ovanhu ova faduka po, nonokutya Saul novanamati vaye ova fya, ova dja mo moilando yavo, ndele tava faduka po. Opo nee Ovafilisti ove uya, ndele tava nangala oilando oyo.
8 Efiku la shikula ko, eshi Ovafilisti va li ve uya okukufa ko oinima yaavo va fya, ova hanga omudimba waSaul nomidimba dovanamati vaye da nangala komhunda yaGilboa. 9 Opo nee ove mu dula, ndele tava tete ko omutwe waye nova kufa ko oinima yaye yokuliamena; ova tumina etumwalaka moshilongo ashishe shOvafilisti, ve li andjakaneke koikalunga yavo nokovanhu. 10 Ova tula oinima yaye yokuliamena meumbo* loshikalunga shavo, ndele tava mangele ekolotwe laye keumbo laDagon.
11 Eshi ovakalimo aveshe vomuJabes shomuGilead va uda ashishe osho Ovafilisti va ningila Saul, 12 ovakwaita aveshe ova fikama, ndele tava humbata oshimhu shaSaul noimhu yovanamati vaye. Ove i eta kuJabes, ndele tava pake oipongolo yavo momuti wa kula muJabes, nove lidilika oule womafiku aheyali.
13 Saul okwa fya omolwokuhenoudiinini kwaye kuJehova, molwaashi ina dulika kondjovo yaJehova, naashi a konga ekwafo keemhepo doonakufya, 14 ponhele yokukonga ekwafo kuJehova. Onghee okwe mu dipaa, ndele ta yandje ouhamba kuDavid, omonamati waIsai.