Omafimbo otete
13 David okwa kundafana nomalenga taa pashukile omayovi nomafele nosho yo novawiliki aveshe. 2 Opo nee David okwa lombwela eongalo alishe laIsrael, a ti: “Ngeenge otashi mu wapalele nosha yuka kuJehova, Kalunga ketu, natu tumeni ondjovo kovamwatate, ovo va fyaala moitukulwa aishe yaIsrael, nosho yo kovapristeri nOvalevi, moilando yavo pamwe nomaulifilo ayo, ve uye ve tu waimine. 3 Natu aluleni Oshikefa shaKalunga ketu.” Molwaashi inava kala tave shi file oshisho pefimbo laSaul. 4 Eongalo alishe ola dimina okuninga ngaho, molwaashi osha li tashi monika sha yuka kovanhu aveshe. 5 Onghee David okwa ongela Ovaisrael aveshe, okudja komulonga* waEgipiti fiyo okuLebo-hamat,* va ete Oshikefa shaKalunga kashili okudja kuKiriat-jearim.
6 David nOvaisrael aveshe ova ya kuBaala, kuKiriat-jearim, shOvajuda, va ka tale ko Oshikefa shaKalunga kashili, Jehova, oo e li omutumba kolukalwapangelo pombada* yovakerubi, oko haku ifanenwa edina laye. 7 Onghee ova londeka Oshikefa shaKalunga kashili metemba lipe, ve shi kufa keumbo laAbinadab. Ussa naAhio ova li tava shingi eengobe, odo tadi nane etemba. 8 David nOvaisrael aveshe ova li va hafa neenghono, tava imbi omaimbilo, tava shiki ouxumbafeta, noishikomwa imwe yeengodi, oungoma, omayaxa nomanghuma koshipala shaKalunga kashili. 9 Ndele eshi ve uya poshipale shaKidon, Ussa okwa yelula eke laye nokwa kwata Oshikefa, molwaashi eengobe, odo da li tadi nane etemba, hanga de shi ufa ko. 10 Onghee Jehova okwa li a handukila unene Ussa, nokwe mu denga, molwaashi okwa yelula eke laye, ndele ta kwata Oshikefa, nokwa fila koshipala shaKalunga. 11 Ashike David okwa li a handuka* omolwehandu laJehova, olo la li la hanga Ussa. Onhele oyo oya kala hai ifanwa Peres-ussa* fiyo okunena.
12 Mefiku olo, David okwa li a tila Kalunga kashili, ndele ta ti: “Ongahelipi handi dulu okweeta Oshikefa shaKalunga kashili kwaame?” 13 David ina twala Oshikefa konhele oko a li ha di mOshilando shaDavid, ndele okwa ti nashi twalwe keumbo laObed-Edom, Omugat. 14 Oshikefa shaKalunga kashili osha kala noukwaneumbo waObed-Edom; osha kala meumbo laye oule weemwedi nhatu, na Jehova okwa kala ta nangeke noupuna oukwaneumbo waObed-Edom naashishe osho a li e na.