Hosea
7 “Pefimbo opo handi ka velula Israel,
Enyono laEfraim nalo otali hololwa,
Nosho yo owii waSamaria.
Osheshi ohava kengelele;
Eembudi ohadi liteyele mo, neengudu dovanyeki ohadi nyeke ovanhu momapandavanda.
2 Ihave lipula momitima davo kutya ohandi ka dimbuluka owii wavo aushe.
Paife, oilonga yavo oye va dingilila;
Oi li lelalela koshipala shange.
3 Ohava hafifa ohamba nowii wavo,
Nosho yo omalenga noukengeleledi wavo.
4 Aveshe ovahaeli,
Tava pi ngaashi efiya la temwa komuteleki,
Oo iha ehele vali omundilo, konima ngeenge a mane okulunga olumbololo, fiyo la fula.
5 Mefiku lohamba yetu, omalenga okwa hovela okuvela;
Okwa handuka unene omolwomaviinyu.
Oya kwata ovasheki neke layo.
6 Osheshi ohave uya nomitima tadi pi ngaashi efiya.*
Oufiku aushe omuteleki oha kofa;
Ongula, efiya ola xwama ngaashi omalaka omundilo.
7 Aveshe ova pyu ngaashi efiya,
Nohava xwake po ovapangeli* vavo.
Eehamba davo adishe oda wila po;
Kape na umwe mokati kavo ha ifana nge.
8 Efraim ota lumbakana noiwana.
Efraim okwa fa oshikuki shongonga inashi angulwa.
9 Ovanailongo ove mu mana eenghono, ndele ine shi shiiva.
Neenghwakutoka daye oda ninga ditoka tootoo, ndele ine shi didilika.
10 Ounhwa waIsrael otau mu vele ombedi,
Ashike inava alukila kuJehova, Kalunga kavo,
Noinave mu konga, nonande opa ningwa oinima aishe oyo.
11 Efraim oku li ngaashi onghuti ilai, ihe na eendunge.*
Ova ifana Egipiti; ova ya kuAssiria.
12 Keshe opo tava i, ohandi umbile onete yange kuvo.
Ohandi va eta pedu ngaashi eedila dokeulu.
Ohandi va pe outekuduliko she likolelela kelondwelo, olo nda shiivifila oshoongalele shavo.
13 Woo kuvo, osheshi ova fiya nge po!
Ehanauno kuvo, osheshi ova nyona kwaame.
Onda li nde lilongekida oku va kulila, ashike ova popya oipupulu kombinga yange.
14 Inava ifana nge tashi di komitima davo, va pule nge ekwafo,
Nonande ova kala nokwaangauka keembete davo.
Ova kala nokulilengaula vo vene omolwoilya nomaviinyu avo mape;
Ova pilukila nge po.
15 Nonande onde va pa outekuduliko nonda pameka omaoko avo,
Ove li omhinge naame, tava pangele omhangela yaasho shii.
16 Ova lundulula ondjila yavo, ashike hakoshinima sha tumbala;*
Kava li ve shii okulineekelwa, ngaashi ashike outa wa yululuka.
Omalenga avo otaa wile po keongamukonda omolweendjovo dao dii.
Omolwoinima ei, otava ka ninga oshinima shokushekwa medu laEgipiti.”