Eehamba eenhivali
10 Ahab okwa li e na ovanamati 70 muSamaria. Onghee Jehu okwa shanga eenhumwafo, ndele te di tumine kuSamaria, komalenga omuJisreel, kovakulunhu nokovatekuli vovana* vaAhab, tadi ti: 2 “Ngeenge eenhumwafo edi oda fiki kunye, ovanamati vomwene weni otava ka hangika pamwe nanye nosho yo omatemba oita, eenghambe, oshilando sha dingililwa komakuma a pama nosho yo oilwifo. 3 Hoololeni oo a wana filufilu* womovanamati vomwene weni, ndele tamu mu tula kolukalwapangelo laxe. Opo nee lwileni eumbo lomwene weni.”
4 Ashike ova li va kwatwa koumbada, ndele tava ti: “Tala, ngeenge eehamba mbali oda nyengwa oku ku kondjifa, ongahelipi hatu dulu oku ku kondjifa?” 5 Opo nee ovapashukili vomombala,* oongoloneya voshilando, ovakulunhu novatekuli ova tuma etumwalaka kuJehu, tava ti: “Fye ovapiya voye, nohatu ka ninga keshe osho to tu lombwele. Itatu ka ninga nande oumwe ohamba. Ninga osho u wete tashi ku wapalele.”
6 Jehu okwe va shangela onhumwafo onhivali tai ti: “Ngeenge nye omwa ama kombinga yange, nomwa hala okudulika kwaame, etelei nge omitwe dovanamati vomwene weni, ndele tamu uya kwaame mongula pefimbo eli, kuJisreel.”
Ovanamati vohamba 70 ova hangwa ve li povalumenhu ovo va hoololwa moshilando ve va tekule. 7 Eshi eenhumwafo de va hanga, ova kufa ovanamati vohamba, ndele tave va dipaa, ovalumenhu 70. Ova tula omitwe davo moimbaba, ndele tave di tumine kuye, kuJisreel. 8 Omutumwa okwe uya mo, ndele te mu lombwele, ta ti: “Ova eta omitwe dovanamati vohamba.” Onghee okwe mu lombwela, a ti: “Di ongeleni meenduba mbali, poshivelo shoshilando fiyo ongula.” 9 Ongula eshi a penduka, okwa kala ofika komesho yovanhu aveshe, ndele ta ti: “Nye kamu na ondjo.* Oshoshili onda kengelela omwene wange nonde mu dipaa, ndele olyelye a dipaa ovanhu aveshe ava? 10 Onghee hano, shiiveni kutya, kape na nande ondjovo imwe yaJehova, oyo Jehova a popya shi na sha neumbo laAhab, tai kala inai wanifwa.* Jehova okwa wanifa po osho a popya okupitila momupiya waye, Elia.” 11 Shikwao vali, Jehu okwa dipaa aveshe ovo va li va fyaala po vomeumbo laAhab, muJisreel, nosho yo ovalumenhu vaye aveshe, ovo va hoololwa, ookaume kaye novapristeri vaye, noinapa fyaala nande oumwe.
12 Opo nee okwa ya nondjila yaye kuSamaria. Eumbo,* omo ovafita hava kululile eedi, ola li pondjila. 13 Jehu oko a shakeneka ovamwainamati vaAhasia, ohamba yaJuda, ndele te va pula, ta ti: “Onye oolyelye?” Ove mu nyamukula, va ti: “Fye ovamwainamati vaAhasia, nohatu i tu ka pule, ngeenge ovanamati vohamba nosho yo ina yohamba* ove li tuu nawa.” 14 Opo nee okwa tya: “Va kwateni ve na omwenyo.” Onghee ove va kwata nomwenyo, ndele tave va dipaele pondungu, oyo i li peumbo lokukululila eedi, ovalumenhu 42. Ina efa nande oumwe womuvo a kale nomwenyo.
15 Eshi a dja oko, okwa shakeneka Jonadab, omonamati waRekab, oo a li te uya oku mu shakeneka. Eshi e mu popifa,* okwe mu pula, a ti: “Oto yambidida nge ngoo nomutima woye aushe,* ngaashi handi ku yambidida nomutima wange aushe?”
Jonadab okwa nyamukula, a ti: “Heeno.”
“Ngeenge osho, pe nge eke loye.”
Onghee okwe mu pa eke laye, na Jehu okwe mu nanena kuye metemba. 16 Opo nee okwa ti: “Ila pamwe naame, opo u tale kutya itandi lididimikile ovo* va tukululila Jehova oshibofa.” Onghee ova londa pamwe metemba laye loita. 17 Okwe uya kuSamaria, ndele ta dipaa aveshe, ovo va li va fyaala po, vomeumbo laAhab, muSamaria, fiyo osheshi e va hanauna po aveshe, ngaashi Jehova a popya okupitila muElia.
18 Natango, Jehu okwa ongaleka ovanhu aveshe pamwe, ndele te va lombwele, ta ti: “Ahab okwa longela Baal kanini, ashike Jehu ote ke mu longela unene. 19 Onghee ifanenei nge ovaprofeti aveshe vaBaal, ovalongeli vaye aveshe novapristeri vaye aveshe. Inapa kala nande oumwe ehe po, molwaashi ohandi ka yambela Baal eyambo linene. Keshe oo ita ka kala po ota dipawa.” Ashike Jehu okwa li te va kengelele, opo a hananune po ovalongeli vaBaal.
20 Jehu okwa twikila ko vali, a ti: “Shiivifeni* oshoongalele shiyapuki shaBaal.” Onghee ove shi shiivifa. 21 Konima yaasho, Jehu okwa tuma etumwalaka muIsrael ashishe, novalongeli vaBaal aveshe ove uya. Inapa fyaala nande oumwe oo ine uya. Ova ya meumbo* laBaal, neumbo laBaal ola li li yadi, okudja kombinga imwe fiyo okombinga ikwao. 22 Okwa lombwela oo ha pashukile onhele omo hamu kala oikutu, a ti: “Etela ovalongeli aveshe vaBaal oikutu.” Onghee okwe va etela oikutu. 23 Opo nee Jehu naJonadab, omonamati waRekab, ova ya meumbo laBaal. Okwa lombwela ovalongeli vaBaal, a ti: “Kongeni nawanawa mokati keni, mu shilipaleke kutya kamu na ovalongeli vaJehova, ndele ovalongeli ashike vaBaal.” 24 Lwanima, ove uya mo, opo va yandje omayambo nomaxwikiloyambo. Jehu okwa tula pondje ovalumenhu vaye 80, ndele ta ti kuvo: “Ngeenge umwe womovalumenhu, ovo nda yandja momake eni, okwa faduka po, otamu ka fya ponhele yaye.”*
25 Eshi va mana okuyamba omaxwikiloyambo, Jehu okwa lombwela ovanangeli* novayakuli vovakwaita, a ti: “Ileni mo, ndele tamu va dipaa. Inamu efa nande oumwe womuvo a ye onhapo.” Onghee ovanangeli novayakuli vovakwaita ove va dipaa neongamukonda, ndele tava kupula omidimba davo pondje, nova twikila oku va dipaa fiyo omonduda yomeni elela* yeumbo laBaal. 26 Opo nee ova kufa mo eengudimanya diyapuki domeumbo laBaal, ndele tave di xwike po adishe. 27 Ova ngumauna po eengudimanya daBaal, va hanauna po eumbo laBaal, ndele tave li ningi onhele yokulivatelela, naasho osho li li fiyo okunena eli.
28 Kungaho, Jehu okwa hanauna po Baal muIsrael. 29 Ashike Jehu naye okwa kala ta nyono, omolweenhana doshingoli, odo da li muBetel nomuDan, ngaashi ashike Jerobeam, omonamati waNebat, a ningifa Israel shi nyone. 30 Onghee Jehova okwa lombwela Jehu, a ti: “Molwaashi owa katuka pandunge, nowa ninga osho sha yuka momesho ange mokuwanifa po aishe, oyo ya li momutima wange, shi na sha neumbo laAhab, omapupi ane omovanamati voye, otaa ka kala omutumba kolukalwapangelo laIsrael.” 31 Ashike Jehu ka li a pashukila okweenda kwaye mOmhango yaJehova, Kalunga kaIsrael, nomutima waye aushe. Ina kanduka mo meendjila daJerobeam, oo a ningifa Israel shi nyone.
32 Pefimbo opo, Jehova okwa efa oitukulwa yaIsrael i ende tai kwatwa ko* kanini nakanini. Hasael okwa twikila oku va ponokela moitukulwa aishe yaIsrael, 33 okudja koushilo womulonga waJordan, edu alishe laGilead, lOvagat, lOvaruben nolOvamanasse, okudja kuAroer, osho shi li mEfilu laArnon fiyo okuGilead naBasan.
34 Ondjokonona aishe yaJehu, ashishe osho a ninga nosho yo eenghono daye adishe, mbela inai shangwa membo londjokonona yopefimbo leehamba daIsrael? 35 Opo nee Jehu okwa nangekwa pooxekulululwa, nove mu paka muSamaria. Omonamati waye, Joahas, okwa ninga ohamba ponhele yaye. 36 Efimbo* olo Jehu a pangela Israel, muSamaria, ola li eedula 28.