Omafimbo otete
7 Ovanamati vaIsaskar ovo: Tola, Pua, Jasub naSimron. Aveshe kumwe vane. 2 Ovanamati vaTola ovo: Ussi, Refaja, Jeriel, Jahmai, Ibsam naSemuel, omitwe domaukwaneumbo omapata avo. Oludalo laTola ola li ovakwaita ovanaenghono, ovo va li 22 600 pefimbo laDavid. 3 Oludalo* laUssi oIsrahia, novanamati vaIsrahia ovo: Mikael, Obadja, Joel naIsshia. Aveshe vatano ova li omalenga.* 4 Moludalo lavo, pamaukwaneumbo omapata avo, metangakwaita lavo omwa li ovakwaita 36 000, ve lilongekidila oita, molwaashi ova li ve na ovakulukadi novanamati vahapu. 5 Ovamwaxe vomoludi alishe laIsaskar ova li ovakwaita ovanaenghono 87 000, ngaashi va shangwa pashikulafano lomapata avo.
6 Ovanamati vaBenjamin ovo: Bela, Beger naJediael. Aveshe kumwe vatatu. 7 Ovanamati vaBela ovo: Esbon, Ussi, Usiel, Jerimot naIri. Aveshe kumwe vatano, omitwe domaukwaneumbo omapata avo, ovakwaita ovanaenghono, nomomusholondodo womapata avo omwa li 22 034. 8 Ovanamati vaBeger ovo: Semira, Joas, Elieser, Elioenai, Omri, Jeremot, Abia, Anatot naAlemet. Aveshe ovo ovanamati vaBeger. 9 Omusholondodo womapata avo pamaludalo avo, she likolelela komitwe domaukwaneumbo omapata avo, ova li ovakwaita ovanaenghono 20 200. 10 Ovanamati vaJediael ovo: Bilhan; ovanamati vaBilhan ovo: Jehus, Benjamin, Ehud, Kenaana, Setan, Tarsis naAhisahar. 11 Aveshe ovo ovanamati vaJediael, she likolelela komitwe dooxekulululwa, ovakwaita ovanaenghono 17 200 ve lilongekida okuya metangakwaita va ye koita.
12 Ovasuppim nOvahuppim* ovanamati vaIr; Ovahusim ovanamati vaAher.
13 Ovanamati vaNaftali ovo: Jakseel, Guni, Jeser naSallum, oludalo* laBilha.
14 Ovanamati vaManasse ovo: Asriel, oo a dalelwa komukulukadi waye wopomunghulo Omusiria. (Okwa dala Makir, xe yaGilead. 15 Makir okwa kongela Huppim naSuppim ovakulukadi, nedina lomumwainakadona oMaaka.) Edina lomutivali oSelofad, ashike Selofad okwa li e na ovanakadona. 16 Maaka, omukulukadi waMakir, okwa dala okaana okamati, ndele te ka luku Peres; edina lomumwainamati oSeres, novanamati vaye ovo: Ulam naRekem. 17 Omonamati* waUlam oBedan. Ovo ovanamati vaGilead, omonamati waMakir, omonamati waManasse 18 nomumwainakadona waye oHamoleket. Okwa dala Ishod, Abieser naMahla. 19 Ovanamati vaSemida ovo: Ahian, Sekem, Likhi naAniam.
20 Ovanamati vaEfraim ovo: Sutela; omonamati waSutela oBered, omonamati waBered oTahat, omonamati waTahat oEleada, omonamati waEleada oTahat, 21 omonamati waTahat oSabad, omonamati waSabad oSutela novanamati vaSutela oEser naElead. Ovalumenhu vokuGat, ovo va dalelwa moshilongo ove va dipaa, molwaashi ova li va ya va ka vake po oimuna yavo. 22 Efraim, xe yavo, okwa kala nokulila omafiku mahapu, novamwaxe ova kala nokuuya ve mu hekeleke. 23 Okudja opo, okwa nangala nomukulukadi waye, nokwa ninga oufimba, ndele ta dala okaana okamati. Ashike okwe ka luka Beria,* molwaashi meumbo laye omwa li oupyakadi, eshi a li mo. 24 Omonakadona waye oSeera, oo a tunga Bet-horon, osho shi li mefilu naasho shi li koshikulundudu, nosho yo Ussen-seera. 25 Opa li yo Refa, omonamati waye, Resef, Tela, omonamati waye, Tahan, omonamati waye, 26 Ladan, omonamati waye, Ammihud, omonamati waye, Elisama, omonamati waye, 27 Nun, omonamati waye, naJosua,* omonamati waye.
28 Edu lavo neenhele davo odo: Betel needoolopa dasho,* nokombinga yokoushilo oNaaran, nokouninginino oGeser needoolopa dasho naSekem needoolopa dasho fiyo okuAyya* needoolopa dasho; 29 popepi noludalo laManasse oBetshan needoolopa dasho, Taanak needoolopa dasho, Megiddo needoolopa dasho naDor needoolopa dasho. Omo omo oludalo laJosef, omonamati waIsrael, la li hali di.
30 Ovanamati vaAsser ovo: Imna, Isva, Isvi naBeria, nomumwainakadona wavo oSera. 31 Ovanamati vaBeria ovo: Heber naMalkiel, xe yaBirsait. 32 Heber okwa dala Jaflet, Somer, Hotam naSua, omumwainakadona wavo. 33 Ovanamati vaJaflet ovo: Pasak, Bimhal naAsvat. Ovo ovanamati vaJaflet. 34 Ovanamati vaSemer* ovo: Ahi, Rohega, Jehubba naAram. 35 Ovanamati vaHelem,* omumwainamati waye, ovo: Sofa, Imna, Seles naAmal. 36 Ovanamati vaSofa ovo: Suah, Harnefer, Shual, Beri, Imra, 37 Beser, Hod, Samma, Silsa, Itran naBeera. 38 Ovanamati vaJeter ovo: Jefunne, Pispa naAra. 39 Ovanamati vaUlla ovo: Arah, Hanniel naRisia. 40 Aveshe ovo ovanamati vaAsser, omitwe domaukwaneumbo omapata avo, va hoololwa, ovakwaita ovanaenghono, omitwe domalenga; omuvalu wavo, oo wa shangwa pashikulafano lomapata avo, owa li ovalumenhu 26 000 metangakwaita, ve lilongekida okuya moita.