Omafimbo otete
20 Pehovelo lomudo,* pefimbo opo eehamba da li hadi i komalwoodi, Joab okwa li ta kwatele komesho etangakwaita nokwa hanauna po edu lOvaammoni; okwe uya, ndele ta kondeke Rabba, ofimbo David a fyaala muJerusalem. Joab okwa ponokela Rabba, ndele te shi hanauna po. 2 Opo nee David okwa dula ko oshikoroni, osho sha li komutwe woshikalunga Malkam, nokwa li a mona kutya oshi na ondjudo yoshitalenti* shoshingoli, nomusho omwa li oumanya vondilo; nosha li sha dikwa komutwe waDavid. Moshilando okwa li yo a kufa mo oixuulwa* ihapu neenghono. 3 Okwa kufa mo ovanhu, ovo va li moshilando, ndele te va pe oilonga yokuteta omamanya, yokulonga noivela i na eememo nomakuva. Osho osho David a ningila oilando aishe yOvaammoni. Xuuninwa, David nomatangakwaita aeshe ova shuna kuJerusalem.
4 Konima yaasho, opa li pa holoka oita puGeser, pokati kOvaisrael nOvafilisti. Pefimbo opo, Sibbekai, Omuhusai, okwa dipaa Sippai womoludalo laRefaim, nova li va findwa.
5 Natango, Ovafilisti ova li va hangwa koita, na Elhanan, omonamati waJair, okwa dipaa Lakmi, omumwaina waGoliat, Omugat, oo a li e na eonga li na oshikwatelo shi fike poshiti shovalongi voiyata.
6 Natango, opa li pa holoka oita puGat, opo pa li omulumenhu umwe munene neenghono, e na ominwe 6 konyala keshe, nominwe 6 komhadi keshe, kumwe adishe odi li 24; omulumenhu oo naye okwa li womoludalo laRefaim. 7 Okwa kala ha sheke Israel. Onghee Jonatan, omonamati waSimei, omumwaina waDavid, okwe mu dipaa.
8 Aveshe ovo ova li vomoludalo laRefaim, muGat, nova dipawa kuDavid nokovapiya vaye.