Ovatokolipangeli

15 Lwanima, pefimbo leteyo loilya yo-wheat, Simson okwa ya a ka talele po omukulukadi waye, a twaalela okakombo. Okwa tya: “Onda hala okuya komukulukadi wange monduda yokunangala.”* Ashike xemweno ine mu pitika a ye mo. 2 Xemweno okwa tya: “Onda li handi diladila kutya, ‘Owe mu tonda filufilu.’ Onghee onde mu yandja koshinghumbi shoye shimwe. Ondenge yaye kaiwa unene i mu dule? Alikana i kufa po ponhele yaye.” 3 Ashike Simson okwa tya kuvo: “Oshikando eshi itandi ka pewa ombedi kOvafilisti ngeenge onde va ningile owii.”

4 Onghee Simson okwa ya, ndele ta kwata ookavandje 300. Opo nee okwa kufa eenyika nokwa mangela kumwe omishila dookavandje oovavali, nopokati komishila mbali keshe okwa tula po onyika. 5 Opo nee okwa tema eenyika, ndele ta efa ookavandje va ye momapya Ovafilisti omo mu na oilya. Okwa xwika po oinima aishe, okudja ngoo koipandi yoilya, oilya oyo inai teywa, oikunino yomandjebele nomiti deemono.

6 Ovafilisti ova pula va ti: “Olyelye a ninga ngaha?” Ova lombwelwa kutya: “OSimson, oshitenya shOmutimna, molwaashi xemweno okwa kufa omukulukadi waSimson, ndele te mu yandje koshinghumbi shaye shimwe.” Opo nee Ovafilisti ova ya, ndele tava xwike po omukulukadi nosho yo xe. 7 Onghee Simson okwa tya kuvo: “Ngeenge osho tamu katuka ngaha, itandi fi ounye ofimbo inandi mu shunifila owii.” 8 Opo nee okwe va dipaa va shikulafana* edipao linyanyalifi, nokwa ya, ndele ta kala ha di mekololo* lemanya laEtam.

9 Lwanima, Ovafilisti ova ya, ndele tava ongo onhanda muJuda, nova li tava endaenda muLehi. 10 Opo nee ovalumenhu vomuJuda ova tya: “Omolwashike mwe uya oku tu lwifa?” Ova nyamukula va ti: “Otwe uya okukwata* po Simson tu mu ningile ngaashi ye e tu ningila.” 11 Onghee ovalumenhu vomuJuda 3 000 ova ya kekololo* lemanya laEtam, ndele tava ti kuSimson: “Hano ku shi shii kutya Ovafilisti otave tu pangele? Omolwashike we tu ningila ngaha?” Okwa tya kuvo: “Onde va ningila osho va ningila nge.” 12 Ashike ova tya kuye: “Otwe uya oku ku kwata* po tu ku yandje kOvafilisti.” Simson okwa tya: “Anenei nge kutya itamu ka ningila nge owii.” 13 Ova tya kuye: “Ohatu ku mange, ndele hatu ku yandje kuvo, ashike itatu ke ku dipaa.”

Opo nee ove mu manga neengodi mbali dipe, ndele tave mu kufa mo mekololo lemanya. 14 Eshi e uya kuLehi, Ovafilisti ova ingida nehafo, eshi ve mu shakeneka. Opo nee Jehova okwe mu pa eenghono nomhepo yaye, neengodi odo da li komaoko aye oda ninga ngaashi eengodi doliina da pya komundilo nomalyenge oo a li poikesho yaye okwa wa ko. 15 Okwa mona ohamama yondongi* yondume, ndele te i kufa nokwe i dipaifa ovalumenhu 1 000. 16 Opo nee Simson okwa tya:

“Onda dipaa ovatondi nohamama yondongi, ndele handi va ongele eenduba.

Onda dipaa ovalumenhu 1 000 nohamama yondongi.”

17 Eshi a mana okupopya, okwa kupulashi ohamama oyo, ndele ta luku onhele oyo Ramat-lehi.* 18 Onghee okwa li a fya enota neenghono, ndele ta pula ekwafo kuJehova, a ti: “Oove wa pa omupiya woye efindano linene. Ndele mbela oto efa nge ashike ndi fye enota nondi wile momake aavo inava pita etanda?” 19 Onghee Kalunga okwa fitulula ombululu, oyo ya li memanya olo la li muLehi, ndele tamu di omeva. Eshi Simson a nwa, eenghono daye oda aluka,* ndele ta nghonopala vali. Nomolwaasho a luka onhele oyo En-hakore,* oyo i li muLehi fiyo okunena.

20 Okwa kala omutokoli muIsrael, pefimbo lOvafilisti, oule weedula 20.