Exodus

38 Okwa ninga oaltari yomaxwikiloyambo moiti yomwoonde. Oya li i na eehuke nhee di fike pamwe, oule wayo womukokomoko omaludimbo* atano, ounene wayo omaludimbo atano, noule wayo wopombada omaludimbo atatu. 2 Opo nee okwe i ningila eembinga meehuke dayo nhee. Eembinga dayo oda li oshitukulwa shayo. Okwa li yo e i vaeka nongopolo. 3 Opo nee okwa ninga oilongifo aishe yoaltari, omavela, oixupulo, ouyaxa, omafoloko noikwatelwa yomundilo. Oikwatelwa yayo aishe okwe i longa mongopolo. 4 Okwa ningila yo oaltari odalate yokuyofela yongopolo, koshi yomungenge wayo, i li lwopokati koaltari. 5 Okwa ninga oikongo ine meehuke nhee, odo di li popepi nodalate yokuyofela yongopolo, di li oikwatifo yeepala. 6 Konima yaasho, okwa ninga eepala moiti yomwoonde nokwe di vaeka nongopolo. 7 Okwa tula eepala moikongo, oyo i li momunghulo woaltari, doku i humbatifa. Okwa ninga oaltari i li momutungilo woshipakete sha patuluka kombada nokoshitako.

8 Okwa ninga oshiyaxa shongopolo noshitenda shasho shongopolo oko tashi tenhekwa; okwa longa omasipili* ovakainhu, ovo va li va unganekwa va longe poshivelo shetwali lokwoongalela.

9 Opo nee okwa ninga oshihale. Kombinga yokolukadi loshihale osho, okwa tula ko omalapi a longwa meengodi diwa doliina da hodilwa, a endjelela a taalela kolukadi, oule womaludimbo 100. 10 Okwa li ku na eengudi 20 noikwatelwamhadi 20 yongopolo, nouhakifo veengudi noupatifo* vado ova li voshisilveri. 11 Natango, kombinga yokolundume okwa li omalapi a endjelela e na oule womukokomoko womaludimbo 100. Eengudi dao 20 noikwatelwamhadi yado 20 oya li yongopolo. Ouhakifo veengudi nosho yo oupatifo* vado ova li voshisilveri. 12 Ashike kombinga yokouninginino okwa li omalapi a endjelela oshinano shomaludimbo 50. Okwa li eengudi omulongo noikwatelwamhadi omulongo, nouhakifo veengudi noupatifo* vado ova li voshisilveri. 13 Oshinano shokombinga yokoushilo, oko haku piti etango, osha li shi na omaludimbo 50. 14 Kombinga imwe okwa li ku na omalapi a endjelela, oshinano shomaludimbo 15, neengudi nhatu nosho yo oikwatelwamhadi itatu. 15 Kombinga ikwao yoshivelo shoshihale okwa li ku na omalapi a endjelela oshinano shomaludimbo 15, neengudi nhatu nosho yo oikwatelwamhadi itatu. 16 Omalapi aeshe oo a endjelela a dingilila oshihale okwa li a longwa meengodi diwa doliina da hodilwa. 17 Oikwatelwamhadi yeengudi oya li yongopolo, nouhakifo veengudi nosho yo oupatifo* vado ova li voshisilveri, eexulo dado okwa li e di vaeka noshisilveri, noupatifo veengudi adishe doshihale ova li voshisilveri.

18 Oshiidilifoyata* shoposhivelo shoshihale osha li sha longwa meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa. Osha li shi na oule womukokomoko womaludimbo 20, noule wopombada omaludimbo 5, oule u fike pamwe nomalapi oshihale oo a endjelela. 19 Eengudi dasho nhee noikwatelwamhadi yado ine oya li ya longwa mongopolo. Ouhakifo vado ova li voshisilveri, neexulo dado nosho yo oupatifo* vado ova li va vaekwa noshisilveri. 20 Outenda aveshe vetwalihangano naavo va dingilila oshihale ova li vongopolo.

21 Apa otapa shikula oilongifo yetwalihangano, sha hala okutya etwalihangano omo mu na Oipelende yOumbangi, olo la li la tungwa palombwelo laMoses, osho sha li oshinakuwanifwa shOvalevi, koshi yewiliko laItamar, omonamati womupristeri Aron. 22 Besaleel, omonamati waUri, omonamati waHur, womepata laJuda, okwa ninga ashishe osho Jehova a lombwela Moses. 23 Okwa li naOholiab, omonamati waAhisama womepata laDan, omulongi woilonga yokomake, omuhondji nomutungi ha longifa eengodi dimbulau, olududi leedi lipeepela, oshiyata shitilyana noshiyata shiwa sholiina.

24 Oingoli aishe oyo ya li ya longifwa moilonga aishe yomonhele iyapuki oi fike poshingoli shedungadungifwayambo, oitalenti* 29 neesekeli* 730, she likolelela kosekeli* yomonhele iyapuki.* 25 Oshisilveri osho sha etwa kwaavo ve lishangifa osha li oitalenti 100 nosho yo eesekeli 1 775, she likolelela kosekeli* yomonhele iyapuki.* 26 Omunhu keshe okudja peedula 20 okuyuka pombada, oo a li e lishangifa, okwa li a yandja etata losekeli, she likolelela kosekeli* yomonhele iyapuki* novanhu ovo va li ve lishangifa ova li 603 550.

27 Oikwatelwamhadi oyo ya tulwa monhele iyapuki nosho yo oikwatelwamhadi yetukulifolapi oi fike poitalenti 100; oikwatelwamhadi 100 oi fike poitalenti 100. Keshe oshikwatelwamhadi shimwe oshi na oshitalenti shimwe. 28 Meesekeli 1 775 okwa ninga mo oupatifo veengudi nokwe di vaeka keexulo dado, ndele te di tula kumwe.

29 Ongopolo oyo ya yandjwa* oya li i fike poitalenti 70 neesekeli 2 400. 30 Okwa ninga mo oikwatelwamhadi yoposhivelo shetwali lokwoongalela, oaltari yongopolo nodalate yayo yokuyofela yongopolo noilongifo aishe yoaltari, 31 oikwatelwamhadi ya dingilila oshihale, oikwatelwamhadi yoposhivelo shoshihale nosho yo outenda aveshe vetwalihangano noutenda aveshe va dingilila oshihale.