Josua

10 Diva eshi Adoni-sedek, ohamba yaJerusalem, a uda kutya Josua okwa kwata ko Ai nokwe shi hanauna po, osho a ningila Ai nohamba yasho ngaashi a li a ningila Jeriko nohamba yasho, nonghee ovakalimo vomuGibeon va ninga ombili naIsrael, nova kala hava di mokati kavo, 2 okwa li a tila neenghono, molwaashi Gibeon osha li oshilando shinene, shimwe shomoilando oyo ya fimana. Osha li shinene shi dule Ai, novalumenhu vamo aveshe ova li ovakwaita. 3 Onghee Adoni-sedek, ohamba yaJerusalem, okwa tuma etumwalaka eli kuHoham, ohamba yaHebron, kuPiream, ohamba yaJarmut, kuJafia, ohamba yaLakis nokuDebir, ohamba yaEglon, a ti: 4 “Ileni mu kwafele nge tu ponokeleni Gibeon, molwaashi osha ninga ombili naJosua nosho yo nOvaisrael.” 5 Opo nee eehamba odo nhano dOvaamori, ohamba yaJerusalem, ohamba yaHebron, ohamba yaJarmut, ohamba yaLakis nohamba yaEglon, oda ongala pamwe nomatangakwaita ado, noda ya, ndele tadi dingilile Gibeon di shi lwife.

6 Ovalumenhu vokuGibeon ova tuma ondjovo kuJosua konhanda i li kuGilgal, va ti: “Ino liteeka* ovapiya voye. Ila diva! Tu amena, ove u tu kwafele! Eehamba adishe dOvaamori da dja koshitukulwa shokeemhunda oda ongala di tu lwife.” 7 Onghee Josua okwa dja kuGilgal pamwe nomatangakwaita aeshe novakwaita ovanaenghono.

8 Opo nee Jehova okwa lombwela Josua, a ti: “Ino va tila, onde va yandja momake oye. Kape na nande oumwe womuvo ta dulu oku ku finda.” 9 Josua okwa enda oufiku aushe okudja kuGilgal, ndele te va ponokele ombadilila. 10 Jehova okwe va ngwangwaneka moipafi yOvaisrael, nOvaisrael ove va dipaela muGibeon nedipao linyanyalifi, ve va taataa fimbo va li tava londo koshikulundudu shaBet-horon, nova enda tave va dipaa fiyo okuAseka nokuMakkeda. 11 Ofimbo va li tava faduka po Ovaisrael, tava londoloka okudja koshikulundudu shaBet-horon, Jehova okwe va lokifila oshikungulu shinene sheemhawe, okudja keulu fiyo okuAseka, node va hanauna po. Vahapu vomuvo ova dipawa keemhawe ve dulife ovo va fya keongamukonda lOvaisrael.

12 Mefiku olo Jehova a finda Ovaamori moipafi yOvaisrael, Josua okwa tya kuJehova moipafi yOvaisrael:

13 Onghee etango ola kanghama, nomwedi inau linyenga fiyo osheshi oshiwana sha handukila ovatondi vasho. Mbela osho kasha li sha shangwa membo laJashar? Efiku olo, etango inali ningina nandenande, ola kala li wetike efiku alishe. 14 Kapa li nande efiku limwe la fa olo, kutya nee ole li tetekela, ile ole ke uya lwanima, eshi Jehova a pwilikina kondaka yomunhu, osheshi Jehova okwa li ta lu ponhele yOvaisrael.

15 Konima yaasho, Josua nOvaisrael aveshe ova shuna konhanda kuGilgal.

16 Mokweendela ko kwefimbo, eehamba nhano oda faduka po, ndele tadi ka hondama mekololo kuMakkeda. 17 Opo nee Josua okwa lombwelwa kutya: “Eehamba nhano oda hangwa da hondama mekololo muMakkeda.” 18 Onghee Josua okwa ti: “Undulilei po omamanya makula poshivelo shekololo, ndele tamu tula po ovalumenhu ve di pashukile. 19 Ndele nye ovo mwa xupa po inamu kanghama. Taataeni ovatondi veni noku va ponokela tamu va dilile konima. Inamu va efa va ye moilando yavo, osheshi Jehova, Kalunga keni, okwe va yandja momake eni.”

20 Konima eshi Josua nOvaisrael va mana oku va dipaa nedipao linyanyalifi, fiyo osheshi va pwa po, kakele kuvamwe ovo va xupa, eshi va faduka po, ndele tava i moilando oyo ya dingililwa komakuma a pama, 21 ovakwaita aveshe ova alukila kuJosua konhanda muMakkeda ve li nawa. Kape na nande omunhu a hetekela vali okuningila omatilifo* Ovaisrael. 22 Opo nee Josua okwa ti: “Yeululei po poshivelo shekololo olo, ndele tamu etele nge mo eehamba odo nhano.” 23 Onghee ove mu etela eehamba edi nhano da dja mekololo: ohamba yaJerusalem, ohamba yaHebron, ohamba yaJarmut, ohamba yaLakis nohamba yaEglon. 24 Eshi va twala eehamba odo kuJosua, okwa ifana ovalumenhu aveshe Ovaisrael, ndele ta ti kovawiliki vomatangakwaita, ovo va ile pamwe navo: “Ileni komesho. Lyateleni eehamba edi pedu komakofi.” Onghee ove uya komesho, ndele tave di lyatele pedu komakofi. 25 Josua okwe va lombwela, a ti: “Inamu kala mwa tila, ile mu mbadapale. Kaleni mu na ouladi nomwa pama, osheshi eshi osho Jehova ta ka ningila ovatondi veni aveshe ovo tamu lwifa.”

26 Opo nee Josua okwe di teta peefingo nokwe di dipaa, ndele te di endjelelifa komiti* nhano, noda kala da endjelela komiti oko fiyo okomatango. 27 Eshi etango tali ningine, Josua okwa yandja elombwelo kutya nadi kufwe ko komiti, ndele tadi umbilwa mekololo omo da li da hondama do vene. Opo nee poshivelo shekololo opa undulilwa omamanya makula, nomamanya oo opo e li fiyo okunena.

28 Josua okwa kwata ko Makkeda mefiku olo, ndele te shi hanauna po neongamukonda. Ohamba yasho novakalimo aveshe* okwe va hanauna po, noina efa mu xupe nande oumwe. Ohamba yaMakkeda okwe i ninga ngaashi a ningila ohamba yaJeriko.

29 Josua nOvaisrael aveshe ova dja muMakkeda nova ya kuLibna, ndele tave shi lwifa. 30 Natango, Jehova okwa yandja Libna pamwe nohamba yasho momake Ovaisrael, ndele tave shi hanauna po nosho yo ovakalimo aveshe* neongamukonda, noinava efa mu xupe nande oumwe musho. Ohamba yasho ove i ninga ngaashi va ningila ohamba yaJeriko.

31 Okudja opo, Josua pamwe nOvaisrael aveshe ova dja muLibna nova ya kuLakis, nova onga onhanda oko, ndele tave shi lwifa. 32 Jehova okwa yandja Lakis momake Ovaisrael, nove shi kwata ko mefiku etivali. Ove shi ponokela, novakalimo aveshe* neongamukonda, ngaashi ashike va ningila Libna.

33 Opo nee Horam, ohamba yaGeser, okwa ya a ka kwafele Lakis, ashike Josua okwe mu dipaa pamwe novanhu vaye, noinapa xupa nande oumwe.

34 Josua nOvaisrael aveshe ova dja mo muLakis va ya kuEglon nova onga onhanda oko, ndele tave shi lwifa. 35 Ove shi kwata ko efiku olo, ndele tave shi hanauna po neongamukonda. Ova hanauna po ovakalimo aveshe* efiku olo, nove shi ninga ngaashi va ningila Lakis.

36 Opo nee Josua nOvaisrael aveshe ova dja muEglon va ya kuHebron, ndele tave shi lwifa. 37 Ove shi kwata ko nove shi hanauna po, ohamba yasho, eedoolopa dasho novakalimo aveshe* neongamukonda, noinava efa mu xupe nande oumwe. Okwe shi hanauna po, novakalimo aveshe,* ngaashi ashike a ningila Eglon.

38 Xuuninwa, Josua nOvaisrael aveshe ova piluka va ye kuDebir, ndele tave shi lwifa. 39 Okwe shi kwata ko, ohamba yasho, needoolopa dasho adishe, ndele tave va dipaa neongamukonda, va hanauna po ovakalimo aveshe,* noinava efa mu xupe nande oumwe. Okwa ningila Debir nohamba yasho, ngaashi ashike a ningila Hebron naLibna nohamba yasho.

40 Josua okwa finda edu alishe lokoshitukulwa shokeemhunda, Negeb, Shefela, omalufilu nosho yo eehamba dayo adishe, noina efa pa xupe nande oimwe; okwa hanauna po oinamufudo aishe, ngaashi ashike Jehova, Kalunga kaIsrael, a popya. 41 Josua okwe va finda okudja kuKades-barnea fiyo okuGasa, nedu alishe laGosen fiyo okuGibeon. 42 Josua okwa kwata ko eehamba adishe odo nedu lado, adishe e di kwata ko pefimbo limwe, molwaashi Jehova, Kalunga kaIsrael, oye a li ta lu ponhele yOvaisrael. 43 Opo nee Josua okwa shuna pamwe nOvaisrael aveshe konhanda kuGilgal.