Jeremia

52 Sedekia okwa ninga ohamba, eshi a li e na eedula 21, nokwa pangela muJerusalem oule weedula 11. Edina laina oHamutal, omonakadona waJeremia, a dja kuLibna. 2 Okwa twikila okulonga osho shii momesho aJehova, she likolelela kwaashishe osho Jehoiakim a ninga. 3 Omolwehandu laJehova, eshi oinima oyo ya ningwa muJerusalem nomuJuda, fiyo osheshi e i hanauna po koshipala shaye. Na Sedekia okwa tukululila ohamba yaBabilon oshibofa. 4 Mefiku etimulongo lomwedi omutimulongo, momudo omutimuwoi wepangelo laSedekia, Nebukadnesar,* ohamba yaBabilon, okwe uya pamwe netangakwaita laye alishe a lwife Jerusalem. Ova onga onhanda e shi lwife, nokwa tunga ekuma lekondeka le shi dingilila. 5 Noshilando osha kala sha dingililwa fiyo omomudo omuti-11 wepangelo lohamba Sedekia.

6 Mefiku etimuwoi lomwedi, momwedi omutine, ondjala oya li ya kwata moiti moshilando, novanhu moshilongo kava li ve na oikulya. 7 Xuuninwa, Ovakaldea ova li va mbonyona ekuma loshilando, novakwaita aveshe ova faduka po oufiku va dja mo moshilando, va pita moshivelo osho shi li pokati komakuma avali, popepi noshikunino shohamba, ofimbo Ovakaldea va li va dingilila oshilando; nova twikila okuya nondjila, oyo ya finda kuAraba. 8 Ashike etangakwaita lOvakaldea ola shikula ohamba, ndele tali pitilile Sedekia momaluhaela aJeriko, netangakwaita layo alishe ole lihana. 9 Opo nee ova kwata po ohamba, ndele tave i twala kohamba yaBabilon, kuRibla, medu laHamat, ndele tai i tokola. 10 Nohamba yaBabilon oya dipaa ovanamati vaSedekia moipafi yaye. Noya dipaela yo omalenga aeshe aJuda oko kuRibla. 11 Opo nee ohamba yaBabilon oya twiyula Sedekia omesho, ye mu manga nomalyenge ongopolo, ye mu twala kuBabilon, noye mu kaleka modolongo, fiyo osheshi a fya.

12 Mefiku etimulongo lomwedi, momwedi omutitano, sha hala okutya momudo omuti-19 wepangelo laNebukadnesar,* ohamba yaBabilon, Nebusaradan, elenga lovanangeli, oo a li omuyakuli wohamba yaBabilon, okwe uya muJerusalem. 13 Okwa xwika po eumbo laJehova, eumbo* lohamba nosho yo omaumbo aeshe omuJerusalem; okwa xwika po yo omaumbo ovanhu ovo va fimana. 14 Nomakuma, oo a li a dingilila Jerusalem, okwa mbonyaunwa po ketangakwaita alishe lOvakaldea, olo la li pamwe nelenga lovanangeli.

15 Nebusaradan, elenga lovanangeli, okwa twala moukwatwa ovadinwa vamwe novanhu aveshe, ovo va li va fyaala moshilando. Okwa kufa yo ovo ve liyandja kohamba yaBabilon nosho yo oovene aveshe vovahambwidi. 16 Ashike Nebusaradan, elenga lovanangeli, okwa fiya mo ovanhu vamwe, ovo va hepa neenghono, moshilongo, opo va kale tava longo moikunino yomandjebele nosho yo oilonga youpika.

17 NOvakaldea ova teyaula eengudi dongopolo deumbo laJehova moipambu, outemba nosho yo Efuta longopolo, olo la li motembeli yaJehova, ndele tava twala ongopolo aishe kuBabilon. 18 Ova kufa yo oikwatelwa, oixupulo, oidimifo yomundilo, ouyaxa, oukopi nosho yo oilongifo aishe yongopolo, oyo hai longifwa moilonga yomotembeli. 19 Elenga lovanangeli ola kufa oiyaxa, oikwatelwa yomundilo, ouyaxa, oikwatelwa, oikwatelwalamba, oukopi nosho yo ouyaxa va longwa moshingoli elela nomoshisilveri. 20 Ondjudo yongopolo, oyo ya longifwa mokuninga eengudi mbali, efuta, eengobe 12 dongopolo odo di li koshi yEfuta nosho yo outemba, ovo va ningwa kohamba Salomo vomeumbo laJehova, kaya li tai dulu okuvalulwa.

21 Shi na sha neengudi, ongudi keshe oya li i na oule wopombada womaludimbo* 18, ongodi yokumetifa yomaludimbo 12 otai dulu oku i dingilila, ounene wayo owa li u fike pomutamo wominwe* nhee, noya li i na omututu. 22 Nomutwe, oo wa li koxulo yongudi, owa li wa longwa mongopolo; omutwe wongudi ou na oule wopombada womaludimbo atano nosho yo okanete noiimati yogranati, oyo ya dingilila omutwe wongudi, aishe oya li ya longwa mongopolo. Ongudi onhivali oya li ye i fa nosho yo oiimati yogranati. 23 Mominghulo omwa li oiimati yogranati 96; kumwe aishe, oiimati yogranati, oyo ya li ya dingilila okanete, oya li 100.

24 Elenga lovanangeli ola kufa yo Seraja, omupristeri omukulunhu, Sefania, omupristeri omutivali, nosho yo ovapashukili vopoivelo vatatu. 25 Nola kufa moshilando elenga lomombala, olo la li tali pashukile ovakwaita, ovalumenhu vaheyali, ovo va li popepi nohamba, ovo va hangika moshilando, nosho yo hamushanga wondjai yetangakwaita, oo a li ha ongele ovanhu moshilongo, nosho yo ovalumenhu 60, va dja movanhu vongaho vomoshilongo, ovo va hangika moshilando. 26 Nebusaradan, elenga lovanangeli, okwe va kufa, ndele te va twala kohamba yaBabilon, kuRibla. 27 Ohamba yaBabilon oye va dipaela kuRibla, moshilongo shaHamat. Ovajuda osho va ya moukwatwa ngaho, va dja moshilongo shavo.

28 Ava ovo ovanhu ovo Nebukadnesar* a twala moukwatwa: momudo omutiheyali, Ovajuda 3 023.

29 Momudo omuti-18 waNebukadnesar,* ovanhu* 832 ova li va kufwa muJerusalem.

30 Momudo omuti-23 waNebukadnesar,* Nebusaradan, elenga lovanangeli okwa twala Ovajuda moukwatwa, ovanhu* 745.

Aveshe kumwe, ovo va twalwa moukwatwa, ovanhu* 4 600.

31 Opo nee momudo omo Evil-merodak, ohamba yaBabilon, a ninga ohamba, okwa mangulula mo* Jehoiakin, ohamba yaJuda, modolongo. Osha li omomafiku 25 omwedi 12, momudo omuti-37 woukwatwa waJehoiakin. 32 Okwa popya naye nonghenda, ndele olukalwapangelo laye te li ningi linene li dule omalukalwapangelo eehamba dikwao, odo da li pamwe naye muBabilon. 33 Onghee Jehoiakin okwa dula mo oikutu yaye yomodolongo, nokwa kala alushe ha li pamwe naye onghalamwenyo yaye aishe. 34 Okwa kala alushe ha pewa oikulya tai di kohamba yaBabilon efiku keshe, onghalamwenyo yaye aishe, fiyo efiku olo a fya.