Omafimbo omativali
12 Diva eshi ouhamba waRehabeam wa pamenena nokwa ninga omunaenghono, okwa efa po okushikula Omhango yaJehova, nOvaisrael aveshe, ovo va li pamwe naye, osho va ninga. 2 Momudo omutitano wepangelo lohamba Rehabeam, Sisak, ohamba yaEgipiti, okwe uya okulwifa Jerusalem, molwaashi kava li ovadiinini kuJehova. 3 Okwa li e na omatemba 1 200, ovalondinghambe 60 000 nosho yo omatangakwaita itaa dulu okuvalulwa, oo e uya pamwe naye okudja kuEgipiti: Ovalibia, Ovasukki nOvaetiopia. 4 Okwa kwata ko oilando aishe yaJuda ya dingililwa komakuma a pama fiyo a fika kuJerusalem.
5 Omuprofeti Shemaia okwe uya kuRehabeam nokomalenga aeshe aJuda, oo a li a ongala muJerusalem omolwaSisak, ndele ta ti kuvo: “Jehova okwa ti, ‘Molwaashi omwa efa nge po, naame yo onde mu efela momake aSisak.’” 6 Opo nee omalenga aIsrael nohamba ove lininipika, ndele tava ti: “Jehova omuyuki.” 7 Eshi Jehova a mona kutya ove lininipika, ondjovo yaJehova oye uya kuShemaia, tai ti: “Ove lininipika. Itandi va hanauna po vali, nohandi ke va xupifa diva. Itandi ka handukila vali Jerusalem, nomolwaasho Sisak ite uya vali oku shi hanauna po. 8 Ashike otava ka ninga ovapiya vaye, opo va shiive eyooloko pokati kokulongela nge nokulongela eehamba* doilongo imwe.
9 Onghee Sisak, ohamba yaEgipiti, okwe uya okulwifa Jerusalem. Okwa kufa omamona meumbo laJehova, nomamona meumbo* lohamba. Okwa kufa mo oinima, mwa kwatelwa oikelelifo yoshingoli, oyo ya ningwa kuSalomo. 10 Onghee ohamba Rehabeam oya ninga oikelelifo yongopolo, opo i i pingene po, noye i yandja i pashukilwe kovakulunhu vovanangeli,* ovo hava pashukile poshivelo sheumbo lohamba. 11 Ngeenge ohamba tai i keumbo laJehova, ovanangeli ohave uya mo, ndele tava humbata po oikelelifo oyo, nokonima yaasho, ohave i shunifa konhele yovanangeli. 12 Molwaashi ohamba oya li ye lininipika, ehandu laJehova ola dja po puyo, noine va hanauna po filufilu. Shikwao vali, muJuda omwa li mwa hangika oinima imwe iwa.
13 Ohamba Rehabeam oye likongela eenghono dinene muJerusalem, noya twikila okupangela. Rehabeam okwa li e na eedula 41, eshi a ninga ohamba, nokwa pangela oule weedula 17, muJerusalem, oshilando osho Jehova a hoolola momapata aeshe aIsrael shi li onhele yokukala edina laye. Edina laina yaRehabeam oNaama, Omuammoni. 14 Ashike Rehabeam okwa li ha longo osho inashi yuka, noka li a tokola momutima waye okukonga Jehova.
15 Ondjokonona yaRehabeam, okudja kehovelo fiyo okexulilo, mbela inai shangwa meendjovo domuprofeti Shemaia nodaIddo, omumonikokule, meshikulafano londjokonona? Pokati kaRehabeam naJerobeam opa kala alushe oita. 16 Opo nee Rehabeam okwa nangekwa pooxekulululwa, nokwa pakwa mOshilando shaDavid. Omonamati waye, Abia, okwa ninga ohamba ponhele yaye.