Omafimbo omativali
13 Momudo omuti-18 wepangelo lohamba Jerobeam, Abia okwa ninga ohamba yaJuda. 2 Okwa pangela muJerusalem eedula nhatu. Ina oMikaia, omonakadona waUriel, womuGibea. Pokati kaAbia naJerobeam opa li oita.
3 Onghee Abia okwa ya moita pamwe novakwaita ovanaenghono 400 000 va deulwa.* Jerobeam okwe lilongekidila olwoodi e mu lwife pamwe novakwaita ovanaenghono, ovalumenhu va deulwa* 800 000. 4 Abia okwa fikama komhunda Semaraim, oyo i li koshitukulwa shokeemhunda shaEfraim, ndele ta ti: “Alikana, Jerobeam noshiwana ashishe shaIsrael, pwilikinei nge. 5 Mbela kamu shi shii kutya Jehova, Kalunga kaIsrael, okwa pa David ouhamba a pangele Israel fiyo alushe, ye novanamati vaye, okupitila mehangano lomongwa?* 6 Ashike Jerobeam, omonamati waNebat, omupiya waSalomo, omonamati waDavid, okwa fikama, ndele ta ka lwifa omwene waye. 7 Ovalumenhu vongaho novakolokoshi ova twikila okwoongala puye. Ova li va ulika kutya ove na eenghono ve dule Rehabeam, omonamati waSalomo. Rehabeam okwa li omunyasha nokwa li a mbadapala, onghee ka li a dula oku va lwifa.
8 “Mbela paife oto diladila kutya oto dulu okukondjifa ouhamba waJehova, oo u li momake ovanamati vaDavid, molwaashi ashike u li pamwe novanhu vahapu, naashi u na oihongwafano yeenhana doshingoli, oyo ya ningwa kuJerobeam i li ookalunga koye? 9 Mbela ino taataa mo ovapristeri vaJehova, oludalo laAron, nOvalevi, noino linangekela po ovapristeri voye mwene, ngaashi ovanhu vomoiwana imwe? Keshe oo e uya* nondumetana nosho yo eedi deendume heyali ota dulu okuninga omupristeri wookalunga voipupulu. 10 Ndele fye, Jehova oye Kalunga ketu, noinatu mu efa po; ovapristeri vetu, oludalo laAron, otava yakula Jehova, nOvalevi otave va kwafele moilonga. 11 Ohava yambele Jehova omaxwikiloyambo ongula keshe nonguloshi keshe, pamwe noitwiminifo yedimba liwa, nomungome wokutalika ou li koshitaafula shoshingoli elela. Ohava tema eelamba, odo di li koshikwatelwalamba shoshingoli konguloshi keshe, molwaashi ohatu wanifa po oshinakuwanifwa shetu kuJehova, Kalunga ketu; ashike ove owe mu efa po. 12 Taleni, Kalunga kashili oku li pamwe nafye, te tu wilike, pamwe novapristeri ovo ve na okushika omanghuma ve mu londwele shi na sha noita. Akutu, ovalumenhu vaIsrael, inamu lwifa Jehova, Kalunga kooxokulululwa, molwaashi itamu ka pondola.”
13 Ashike Jerobeam okwa tula po vamwe ve va nangele okudja konima. Onghee ovakwaita vaye vahapu ova li komesho yaJuda, ofimbo ovo ve va nangela va li ve va li konima. 14 Eshi ovalumenhu vomuJuda va piluka, ova mona kutya ove na okulwifa ovakwaita ovo ve va li komesho naavo tave va dilile konima. Onghee ova hovela okupula ekwafo kuJehova, ofimbo ovapristeri va li tava shiki omanghuma mokule. 15 Ovalumenhu vomuJuda ova ingida mokule molwoodi, naashi ovalumenhu vomuJuda va ingida mokule, Kalunga kashili okwa finda Jerobeam nOvaisrael aveshe moipafi yaAbia noyOvajuda. 16 Ovaisrael ova faduka po Ovajuda, na Kalunga okwe va yandja momake avo. 17 Abia novanhu vaye ova dipaa ovanhu vahapu neenghono, nOvaisrael ova fya, ovalumenhu va deulwa* 500 000. 18 Pefimbo opo, ovalumenhu Ovaisrael ova li va fifwa ohoni, ndele ovalumenhu Ovajuda ova ulika kutya ove na eenghono, molwaashi ova li ve lineekela* muJehova, Kalunga kooxekulululwa. 19 Abia okwa kala nokutaataa Jerobeam noku mu kufa oilando, ngaashi Betel needoolopa dasho,* Jesana needoolopa dasho, naEfrain needoolopa dasho. 20 Jerobeam ina kala vali e na eenghono pefimbo laAbia; Jehova okwe mu denga, ndele ta fi.
21 Ashike Abia okwa enda ta nghonopala. Mokweendela ko kwefimbo, okwa ka kala e na ovakulukadi 14, nokwa dala ovanamati 22 novanakadona 16. 22 Ondjokonona aishe yaAbia, oilonga yaye neendjovo daye oya shangwa momashangelo omuprofeti Iddo.