Hesekiel
5 “Ndele ove, omona womunhu, likufila eongamukonda li na eememo u li longife onga okambi komukululi. Kulula ko eexwiki komutwe woye nosho yo eendjedi doye, opo nee to kufa oiyelekifo u di yeleke noku di tukula. 2 Oto ka xwika po oshititatu shado momundilo meni loshilando, ngeenge omafiku oku shi kondeka a pu ko. Opo nee oto ka kufa oshititatu shimwe shado noku shi tetaulila moshilando* ashishe, noshititatu shaxuuninwa oto ke shi lihanifila momhepo, nohandi ka pweya mo eongamukonda ndi va taatae.
3 “Ou na yo okukufa eexwiki dinini mudo noku di tonyena moshikutu* shoye. 4 Ndele to kufa vali dimwe domudo noku di ekela momundilo noku di xwika po filufilu. Okudja opo, omundilo otau ke lihanena meumbo alishe laIsrael.
5 “Eshi osho Omwene Omunamapangelo aeshe, Jehova, ta ti: ‘Ou oJerusalem. Onde mu tula mokati koiwana, oilongo aishe ye mu dingilila. 6 Ashike okwa tukululila ounashibofa omatokolo ange nosho yo eenghedimhango dange, ta longo oukolokoshi muhapu e dule oiwana noilongo oyo ye mu dingilila. Osheshi ova anya omatokolo ange noinava enda meenghedimhango dange.’
7 “Onghee eshi osho Omwene Omunamapangelo aeshe, Jehova, ta ti: ‘Molwaashi kamwa li hamu udu ko mu dule oiwana oyo ye mu dingilila, noinamu enda meenghedimhango dange, ile mu wanife po omatokolo ange, ashike ponhele yaasho, omwa shikula omatokolo oiwana oyo ye mu dingilila, 8 eshi osho Omwene Omunamapangelo aeshe, Jehova, ta ti: “Aame ou ndi li omhinge naave, oshilando ove, nohandi ka tokola ame mwene mokati koye moipafi yoiwana. 9 Ohandi ka ninga mwoove osho inandi ninga nande onale, noinima oyo itandi ke i ninga vali omolwoilonga yoye aishe itondifa.
10 “‘“Onghee ooxe, ovo ve li mokati koye, otava ka lya po ovanamati, novanamati otava ka lya po ooxe, nohandi ka tokola mokati koye nokuhalakanifila oshixupe sheni ashishe keembinga adishe.”’*
11 “‘Onghee oshili, ofimbo ame ndi na omwenyo,’ Omwene Omunamapangelo aeshe, Jehova, ota ti, ‘omolwonhele yange iyapuki, oyo wa nyateka noikalunga yoye aishe itondifa nosho yo oilonga yoye aishe itondifa, ohandi ke ku efa* yo; eisho lange itali ka fila onghenda, noitandi ka ulika olukeno. 12 Oshititatu shoye otashi ka fya koudu* wolutapo, ile otashi ka xula po mokati koye omolwondjala. Oshititatu shikwao otashi ka wila pedu she ku dingilila omolweongamukonda. Nohandi ke lihanifila oshititatu shaxuuninwa keembinga adishe,* nohandi ka pweya mo eongamukonda noku va taataa. 13 Opo nee ehandu lange otali ka pola, nonya yange, oyo nda li ndi va uditile, otai ka lota, nohandi ka kala nda wanenwa. Notava ka shiiva kutya ame, Jehova, onda popya kutya onda teelela ndi longelwe aame andike, ngeenge onda mane oku va fululukila nehandu lange.
14 “‘Ohandi ke ku ninga onhele yoikulukuma nosho yo oshinima shidinifa mokati koiwana, oyo ye ku dingilila nosho yo momesho akeshe umwe oo ta piti po. 15 Oto ka ninga oshinima shidinifa nosho yo shokushekwa, oshihopaenenwa shelondwelo nosho yo oshinima shihalwifa koiwana oyo ye ku dingilila, eshi handi ke ku tokola mehandu nomonya nosho yo nomahandukilo a kwata moiti. Ame, Jehova, onde shi popya.
16 “‘Ohandi ke va tumina oikuti ya nyika oshiponga yondjala i va hanaune po. Oikuti oyo handi tumu otai ke mu etela ehanauno. Ohandi ke mu pimbilifila ondjala mokuxulifa po odjo yoikulya yeni.* 17 Ohandi ke mu tumina ondjala nosho yo oifitukuti ya nyika oshiponga, notai ka lya po ovana veni. Oudu wolutapo nosho yo etiko lohonde otali ke ku wilila po, nohandi ke ku etela eongamukonda. Ame, Jehova, onde shi popya.’”