Omayeletumbulo
22 Oshiwa okuliningila edina liwa,* ponhele yokulikongela emona lihapu;
Oshixwepo okukala wa fimanekwa* shi dulife okukala noshisilveri nosho yo oshingoli.
2 Oshipuna nosho yo ohepele ova faafana.*
Aveshe ova shitwa kuJehova.
3 Omunaendunge ota mono oshiponga, ndele ta hondama,
Ndele oo ehe na owino ota ehene popepi, ndele ta mono oilanduliko.*
4 Keshe oo e lininipika noha tila Jehova ota ka nangekwa noupuna,
Ota ka fimanekwa nota ka mona omwenyo.
5 Ondjila yomukengeleledi oi na omakiya nosho yo eemwiyo,
Ndele oo a lenga omwenyo ote i kala kokule.
7 Oshipuna otashi pangele ohepele,
Nomweeheli oku li omupiya waao e mu pa.
8 Keshe oo ta kunu okuhenouyuki ota ka teya oupyakadi,
Nodibo oyo ha longifa, ngeenge a handuka, otai ka teyaulwa po.
9 Omunhu oo ha yandje nehalo liwa* ota nangekwa noupuna,
Molwaashi oha tukulilafana oikulya yaye neehepele.
11 Oo e na omutima wa koshoka noha popi eendjovo donghenda
Ota ka kala kaume kohamba.
12 Omesho aJehova otaa amene eshiivo,
Ashike ota xulifa po eendjovo dovanamakoto.
13 Omukwandede ota ti: “Ope na onghoshi pondje!
Ohandi ka dipaelwa mehalandjadja!”
14 Omilungu domukainhu omuhaeli* oda fa elambo lile.
Oo a tokolwa kuJehova ota wile mo.
15 Oulai owa kanyatela momutima wokamati,*
Ndele oshimwati shoku ka pa outekuduliko otashi u kufa mo muko.
16 Ou ta kengelele ohepele a hapupalife emona laye,
Naau ta yandje eeshali koshipuna
Ota ka ninga ohepele.
17 Pakaleka okutwi kwoye u pwilikine keendjovo deendunge,
Opo u tambule ko eshiivo lange nomutima aushe,
18 Molwaashi osha wapala oku di diinina moule womutima woye,
Opo adishe di kale alushe komilungu doye.
19 Ohandi ku pe eshiivo nena,
Opo u lineekele muJehova.
20 Onde ku shangela oinima ihapu,
Opo ndi ku pe omayele neshiivo,
21 Ndi ku honge oshili neendjovo di shii okulineekelwa,
Opo u dule okushuna nehokololo li li mondjila kwaao e ku tuma.
22 Ino nyeka omukwanaluhepo, molwaashi okwa hepa,
Noino fininika omufyoona poshivelo shoshilando,
23 Molwaashi Jehova oye mwene te ke va popila momhangu,
Nota ka dipaa ovo tave va kengelele.
24 Ino endafana nomuhandunhu,
Ile u kale u na ekwatafano naao ha kala a fula onya,
25 Opo uhe lihonge eendjila daye
Nouhe liyule ove mwene.*
26 Ino kala mokati kaavo hava anene nokuminika ovo ve va pa eendjo,
Ovo hava yandje eshilipaleko lokushunifa omikuli.
27 Ngeenge ku na sha shokufuta,
Oto ka kufwa ombete oko ho nangala.
28 Ino lundulula edidiliko longaba ikulu,
Olo la tulwa po kooxokulululwa.
29 Ngeenge omunhu oha longo nounghulungu oilonga yaye,
Ota ka kala ofika moipafi yeehamba;
Ita ka kala ofika moipafi yovanhu vongaho.