Samuel wotete
14 Efiku limwe, Jonatan, omonamati waSaul, okwa lombwela omupiya waye, oo a li a humbata oilwifo yaye, ta ti: “Natu tauluke tu ye ketangakwaita lOvafilisti kombinga ikwao yomulonga.” Ashike ina lombwela xe. 2 Saul okwa li a onga onhanda popepi naGibea momuti wogranati muMigron, nokwa li pamwe novalumenhu 600 lwaapo. 3 (Ahia, omonamati waAhitub, omumwaina waIkabod, omonamati waPinehas, omonamati waEli, omupristeri waJehova muSilo, okwa li a humbata okatetahema.) Ashike ovanhu kava li ve shi shii ngeenge Jonatan okwa dja po puvo. 4 Opo Jonatan a li ta kendabala okupitila, opo a ye ketangakwaita lOvafilisti, opa li pe na emanya la fa eyoo kombinga imwe, nemanya la fa eyoo kombinga ikwao. Edina lemanya olo la ama kombinga imwe oBoses, nedina lemanya likwao oSene. 5 Emanya limwe, olo la fa eyoo, ola li kolundume ngaashi ongudi, la taalela kuMikmas, nalikwao ola li kolukadi, la taalela kuGeba.
6 Onghee Jonatan okwa lombwela omuhumbati woilwifo yaye ta ti: “Natu tauluke tu ye ketangakwaita lovalumenhu ovo inava pita etanda. Otashi dulika Jehova a katuke onghatu ponhele yetu, molwaashi kape na osho tashi dulu okwiimba Jehova e tu xupife kutya nee otuvahapu, ile otuvanini.” 7 Opo nee omuhumbati woilwifo yaye okwa tya kuye: “Ninga keshe osho omutima woye tau ku lombwele. Inda keshe apa wa hala, nohandi ka ya pamwe naave keshe apa to i.” 8 Onghee Jonatan okwa ti: “Ohatu tauluka tu ye kovalumenhu ovo, ndele hatu ve lihololele. 9 Ngeenge ove tu lombwele kutya, ‘Kanghameni, fiyo hatu uya kunye!’ ohatu ka fikama opo tu li, noitatu ka ya kuvo. 10 Ndele ngeenge ova ti, ‘Ileni mu tu lwife!’ ohatu i, molwaashi Jehova ote ke va yandja momake etu. Olo olo tali kala edidiliko letu.”
11 Onghee aveshe ove lihololela etangakwaita lOvafilisti. Ovafilisti ova tya: “Taleni, Ovaheberi otava di ko komikwena, oko va li va hondama.” 12 Ovalumenhu vometangakwaita olo ova tya kuJonatan nokomuhumbati woilwifo yaye: “Ileni kufye nohatu ke mu honga oshilihongomwa!” Jonatan okwa lombwela diva omuhumbati woilwifo yaye ta ti: “Shikule nge, osheshi Jehova ote va yandje momake aIsrael.” 13 Opo nee Jonatan okwa londa te likoko pamwe nomuhumbati woilwifo yaye, e mu shikula. Okwa ponokela Ovafilisti, nomuhumbati woilwifo yaye, oo a li e mu li konima, okwa dipaa vamwe vomuvo. 14 Eshi Jonatan nomuhumbati woilwifo yaye ve va ponokela oshikando shotete, ova dipaa ovalumenhu 20 lwaapo, moule ashike woshinano shinini.*
15 Ovakwaita aveshe ovo va li monhanda, etangakwaita alishe naaveshe ovo va li va tumwa va ka ponokele Israel ova li va kwatwa koumbada. Edu ola li la hovela okukakama, na Kalunga okwa li a tilifa Ovafilisti. 16 Ovanangeli vaSaul, ovo va li muGibea shaBenjamin, ova li va uda omaweelelo tae linyenge keembinga adishe.
17 Saul okwa lombwela ovanhu ovo va li puye a ti: “Alikana, valuleni ovanhu mu tale kutya olyelye ehe po pufye.” Eshi va valula, ova mona kutya Jonatan nomuhumbati woilwifo yaye kave po. 18 Opo nee Saul okwa lombwela Ahia a ti: “Eta Oshikefa shaKalunga kashili popepi.” (Oshikefa shaKalunga kashili osha li kOvaisrael pefimbo opo.*) 19 Ofimbo Saul a li ta popi nomupristeri, omaweelelo oo a li monhanda yOvafilisti okwa li taa hapupala neenghono. Onghee Saul okwa tya komupristeri: “Efa osho to ningi.”* 20 Saul novanhu aveshe ovo va li pamwe naye ova ongala, ndele tava i molwoodi, nova hanga Ovafilisti ve lipilukila po nomaongamukonda. Ovafilisti ova li va ngwangwana unene. 21 Natango, Ovaheberi, ovo va li nale va ama kombinga yOvafilisti nove uya pamwe navo monhanda, ova li tava ame kOvaisrael koshi yepashukilo laSaul naJonatan. 22 Ovalumenhu aveshe Ovaisrael, ovo va li va hondama moshitukulwa shokeemhunda shaEfraim, eshi va uda kutya Ovafilisti ova faduka po, ova hovela oku va taataa ve va lwife. 23 Onghee Jehova okwa xupifa Ovaisrael mefiku olo, nova lwa fiyo okuBet-aven.
24 Ndele ovalumenhu Ovaisrael ova li va loloka neenghono mefiku olo, molwaashi Saul okwa li a ningila ovanhu eano, a ti: “Omufingwa omunhu oo ta li omungome* ofimbo inaku toka, nofimbo inandi handukila ovatondi vange.” Onghee kape na nande oumwe womovanhu ovo a li a lya sha.
25 Ovanhu aveshe* ova ya mofuka, nomwa li omaadi eenyiki, e li pedu. 26 Eshi va ya mofuka, ova mona omaadi eenyiki taa ndoda, ashike kape na nande oumwe womuvo e a lya, molwaashi ova li va tila omolweano. 27 Ndele Jonatan ka li a uda xe, eshi ta ningile ovanhu eano, onghee okwa yelula neke laye odibo oyo a li e kwete meke, ndele te i tu meshila lomaadi eenyiki. Eshi e a makela, okwa li a mona eenghono.* 28 Opo nee umwe womovanhu ovo okwa ti: “Xo okwa ningila ovanhu eano la kwata moiti a ti: ‘Omufingwa omunhu oo ta li omungome nena,’ nomolwaashi ovanhu va loloka neenghono.” 29 Ashike Jonatan okwa ti: “Tate okwa etela oshilongo oupyakadi.* Tala nghee omesho ange mayela, molwaashi nda makela kanini omaadi eenyiki. 30 Ngeno ovanhu ova lile nena oixuulwa yovatondi vavo, ngeno ova dipaa Ovafilisti vahapu neenghono.”
31 Ova taataa Ovafilisti mefiku olo, okudja kuMikmas fiyo okuAijalon, novanhu ova li va loloka unene. 32 Ovakwaita ova hovela okulihakana oixuulwa, ndele tava kufa eedi, eengobe noutana, nove i dipaa, ndele tava li ombelela pamwe nohonde. 33 Onghee Saul okwa li a lombwelwa kutya: “Tala, ovanhu ova nyona kuJehova, eshi va lya ombelela pamwe nohonde.” Opo nee okwa ti: “Eenghatu deni oda ulika kutya kamu na eitavelo. Undulileni diva kwaame emanya la kula.” 34 Saul okwa ti: “Indeni mokati kovanhu, ndele tamu va lombwele kutya, ‘Keshe umwe womunye na ete ongobe yaye yomhedi nodi yaye, noku di dipaela apa, ndele te di li po. Inamu nyona kuJehova mokulya ombelela pamwe nohonde.’” Onghee keshe umwe womuvo okwa eta ongobe yaye yomhedi onguloshi oyo, ndele te i dipaele opo. 35 Opo nee Saul okwa tungila Jehova oaltari. Oyo oyo ya li oaltari yotete a tungila Jehova.
36 Lwanima, Saul okwa ti: “Natu shikuleni Ovafilisti oufiku, ndele hatu va ponokele, nokunyeka ko oinima yavo fiyo ongula. Itatu xupifa po nande oumwe.” Opo nee ova ti: “Ninga keshe osho tashi ku wapalele.” Opo nee omupristeri okwa ti: “Natu puleni ekwafo kuKalunga kashili apa.” 37 Saul okwa pula Kalunga a ti: “Nandi shikule ngoo Ovafilisti? Oto va yandje ngoo momake aIsrael?” Ashike Kalunga ine mu nyamukula. 38 Onghee Saul okwa ti: “Omalenga amushe, ileni oku, mu tale enyono olo la ningwa nena. 39 Ohandi ane medina laJehova Kalunga omunamwenyo, oo a xupifa Ovaisrael, kutya nonande omonamati wange, Jonatan, oye a nyona, oku na okufya.” Ashike kape na nande oumwe e mu nyamukula. 40 Onghee okwa tya kOvaisrael aveshe: “Nye otamu kala kombinga imwe, ofimbo fye nomonamati wange, Jonatan, hatu kala kombinga ikwao.” Opo nee ovanhu ova tya kuSaul: “Ninga keshe osho tashi ku wapalele.”
41 Saul okwa tya kuJehova: “Kalunga kaIsrael, nyamukula okupitila muTummim.” Konima yaasho, Jonatan naSaul ovo va li va hoololwa, onghee ovanhu vakwao kava li ve na ondjo yasha. 42 Saul okwa ti: “Tu umbileni oshihoololifo fye nomonamati wange, Jonatan, ku talike ou a nyona.” Jonatan oye a li a hoololwa. 43 Opo nee Saul okwa tya kuJonatan: “Lombwele nge, oshike wa ninga?” Jonatan okwe mu nyamukula a ti: “Onda makela ashike omaadi eenyiki manini koxulo yodibo ei ndi kwete. Aame ou, onde lilongekida okufya.”
44 Onghee Saul okwa ti: “Kalunga na handukile nge unene ngeenge owa kala ino fya, Jonatan.” 45 Ashike ovanhu ova tya kuSaul: “Osha yuka ngoo Jonatan, oo a etela Israel efindano* linene, a fye? Itashi shiiva. Ohatu ane medina laJehova Kalunga omunamwenyo kutya, nokuli nokomutwe waye inaku wa nande oxwiki imwe, osheshi Kalunga oye e mu kwafela a katuke onghatu oyo nena.” Kungaho ovanhu ova xupifa* Jonatan, onghee ina fya.
46 Opo nee Saul okwa efa okushikula Ovafilisti, nOvafilisti ova ya koshitukulwa shavo.
47 Ohamba Saul oya ninga inaenghono muIsrael, noya lwifa ovatondi vayo aveshe keembinga adishe: Ovamoab, Ovaammoni, Ovaedom, eehamba daSoba nOvafilisti, nakeshe apa ohamba Saul ya ya, oye va finda. 48 Saul okwa lwa nouladi nokwa finda Ovaamalek, ndele ta xupifa Ovaisrael momake ovatondi vavo.
49 Ovanamati vaSaul ova li Jonatan, Isvi naMalkisua. Okwa li yo e na ovanakadona vavali. Edina laau a kula oMerab, nolaau munini oMikal. 50 Edina lomukulukadi waSaul ola li Ahinoam, omonakadona waAhimas. Edina londjai yetangakwaita laye ola li Abner, omonamati waNer, xekulu yaSaul. 51 Kish oye a li xe yaSaul, na Ner, xe yaAbner, okwa li omonamati waAbiel.
52 Eshi Saul a li ta pangele, opa li alushe hapa kala olwoodi la kwata moiti pokati kaye nOvafilisti. Ngeenge Saul a mono omulumenhu omunaenghono noku na ouladi, ohe mu kutu metangakwaita laye.