Job
5 “Alikana, ifana. Ope na tuu ou te ku nyamukula?
Mbela okovayapuki velipi to ka konga ekwafo?
2 Osheshi onghone otai dipaa elai,
Nondubo otai dipaa oo ehe na eendunge.
3 Onda mona elai li li meameno,
Ndele onhele yalo oya ka fingwa diva.
4 Ovanamati valo ove li kokule neameno,
Ova tyanghaulilwa poshivelo shoshilando, nokape na oo te va xupifa.
5 Osho ta teya otashi liwa po kwaao a fya ondjala,
Nonande ote shi kufa mokati komakiya,
Nomamona avo otave a kufwa.
6 Osheshi oinima, oyo ya nyika oshiponga, ihai twiyuka mondwi,
Noupyakadi ihau mbaduka medu.
7 Osheshi omunhu okwa dalelwa oupyakadi,
Ngaashi ashike eehandje da finda pombada.
8 Ashike ame ohandi pula kuKalunga,
Noshikoya shange ohandi shi twala kuKalunga,
9 Kwaao ha longo oinenelonga noinyengandunge,
Oinima ihapu iwa.
10 Oha lokifile edu odula,
Noha tumine omapya omeva.
11 Oha yelula pombadambada ovadinwa,
Noha yelula pombada ovo va nyika oluhodi va ka xupifwe.
12 Oha ponyifa eemhangela dovakengeleledi,
Opo vaha pondole moilonga yavo.
13 Ovanaendunge ohe va yulile momakoto avo,
Opo eemhangela daavo va lungama diha pondole.
14 Efimbo lomutenya ohava hangwa komulaulu,
Nomoshanga shomutenya ohava kala va fa ovanhu tava kongo oinima momulaulu.
15 Kalunga ohe va xupifa kwaavo ve na eongamukonda momakanya avo,
Ha xupifa omufyoona meke lomunaenghono,
16 Opo ovadinwa va kale ve na eteelelo,
Ashike omakanya aavo vehe fi ovayuki ote a mweneke.
17 Tala, omunelao oye ou ta pukululwa kuKalunga;
Onghee ino liteeka outekuduliko wOmunaenghono adishe.
18 Osheshi oha etifa ouyehame, ashike oha mange oshipute;
Oha teyaula, ndele oha velula nomake aye.
19 Ote ku xupifa koiponga ihamano,
Nokuli noshitiheyali itashi ku ehameke.
20 Pefimbo londjala ote ku xupifa mefyo,
Nokeenghono deongamukonda pefimbo loita.
21 Oto ka kala wa amenwa kongola yelaka,
Noito ka tila ehanauno, eshi tali uya.
22 Oto ka yola ehanauno nosho yo ondjala,
Noito ka tila oifitukuti yokombada yedu.
23 Osheshi omamanya omepya itae ku etele oshiponga,*
Noifitukuti otai ka kala naave nombili.
24 Oto ka shiiva kutya etwali loye ola amenwa,*
Noito ka yongola sha, ngeenge to konakona oulifilo woye.
25 Oto ka hafela ovana vahapu,
Noludalo loye otali ka kala lihapu, ngaashi oimeno yokombada yedu.
26 Oto ka kala natango u na eenghono, eshi to ka ya mombila,
Ngaashi oipandi yoihati ya ongelwa pefimbo layo.
27 Tala, eshi otwe shi konakona, naasho osho shi li ngaho.
Pwilikina, ndele to shi tambula ko.”