Hesekiel
12 Ondjovo yaJehova oye uya vali kwaame tai ti: 2 “Omona womunhu, oho di meumbo linashibofa. Ove na omesho okumona ko, ashike ihava mono ko, nomatwi okuuda ko, ashike ihava udu ko, osheshi vo ove li eumbo linashibofa. 3 Ashike ove, omona womunhu, longekida eendongelwa dokuya nado moukwatwa. Opo nee, pefimbo lomutenya, ofimbo tava tale, ou na okuya moukwatwa. Inda moukwatwa okudja meumbo loye to i konhele imwe, ofimbo tava tale. Otashi dulika ve ke shi didilike, nokuli nonande ove li eumbo linashibofa. 4 Kufa mo eendongelwa doye da longelwa dokuya nado moukwatwa efimbo lomutenya, ofimbo tava tale, opo nee konguloshi, ofimbo tava tale, ou na okuya wa fa omunhu ta twalwa moukwatwa.
5 “Ofimbo tava tale, ninga ombululu mekuma, nokupitifila mo oinima yoye muyo. 6 Ofimbo tava tale, tula oinima yoye kepepe loye noku i humbata momilaulu. Uvika oshipala shoye, opo uha mone pedu, osheshi ohandi ku ningi edidiliko keumbo laIsrael.”
7 Onda ninga ngaashi naanaa nda lombwelwa. Momukokomoko wefiku, onda kufa mo eendongelwa dange ngaashi eendongelwa dokuya nado moukwatwa, nokonguloshi onda ninga ombululu neke mekuma. Naashi kwa laula, onda kufa mo oinima yange, nde i humbata kepepe lange moipafi yavo.
8 Ondjovo yaJehova oye uya vali kwaame ongula tai ti: 9 “Omona womunhu, mbela eumbo laIsrael, eumbo linashibofa, inali ku pula kutya, ‘Oto ningi shike?’ 10 Va lombwela kutya, ‘Eshi osho Omwene Omunamapangelo aeshe, Jehova, ta ti: “Etokolo eli oli na sha nelenga lomuJerusalem nosho yo eumbo alishe laIsrael olo li li moshilando.”’
11 “Tya, ‘Ondi li edidiliko kunye. Ngaashi ashike nda ninga, osho osho tava ka ningilwa. Otava ka ya moukwatwa, moupongekwa. 12 Elenga, olo li li mokati kavo, otali ka humbata oinima yalo kepepe lalo nokuya momilaulu. Otali ka ninga ombululu mekuma nokupitifila mo oinima yalo. Otali ka uvika oshipala shalo, opo liha mone pedu.’ 13 Ohandi ke li umbila onete yange, notali ka yulwa konete yange yomoukongo. Opo nee ohandi li twala kuBabilon, kedu lOvakaldea, ndele itali ke shi mona; notali ka fila oko. 14 Naaveshe ovo ve li dingilila, ovakwafi valo nosho yo etangakwaita lalo, ohandi ke ve lihanifila keembinga adishe; nohandi ka pweya mo eongamukonda ndi va taatae. 15 Nove na oku ka shiiva kutya aame Jehova, eshi handi ke ve lihanifila mokati koiwana noku va halakanifila mokati koilongo. 16 Ashike ohandi ka xupifa po vanini vomuvo keongamukonda, kondjala nosho yo koudu wolutapo, opo va ka popye kombinga yoilonga yavo aishe itondifa mokati koiwana, oko tava i; nove na oku ka shiiva kutya aame Jehova.”
17 Nondjovo yaJehova oye uya vali kwaame tai ti: 18 “Omona womunhu, ou na okulya omungome woye to kakama nokunwa omeva oye u na omalipulo nosho yo oshisho. 19 Tya kovanhu vomedu olo, ‘Eshi osho Omwene Omunamapangelo aeshe, Jehova, ta ti kovakalimo vomuJerusalem medu laIsrael: “Otava ka lya omungome wavo ve na oshisho nokunwa omeva avo ve na oumbada, osheshi edu lavo otali ka mbuwala filufilu omolwelongifo leenghono laaveshe ovo hava di mulo. 20 Oilando omo mu na ovanhu otai ka hanaunwa po, nedu otali ka ninga eputu; notamu ka shiiva kutya aame Jehova.”’”
21 Nondjovo yaJehova oye uya vali kwaame tai ti: 22 “Omona womunhu, omu na eyeletumbulo muIsrael tali ti: ‘Omafiku otaa i, nemoniko keshe itali wanifwa.’ 23 Onghee tya kuvo, ‘Eshi osho Omwene Omunamapangelo aeshe, Jehova, ta ti: “Ohandi ka xulifa po epopyo olo, noitave ke li longifa vali li li eyeletumbulo muIsrael.”’ Ashike va lombwela kutya, ‘Omafiku oku li popepi, nemoniko keshe otali ka wanifwa.’ 24 Osheshi itapa ka kala vali emoniko loipupulu, ile enyanekelo loshimbweenga* meumbo laIsrael. 25 Osheshi ame, Jehova, ohandi ka popya. Ondjovo keshe handi popi otai ka wanifwa nopehe na okushelelelwa. Pefimbo leni, nye eumbo linashibofa, ohandi ka popya ondjovo noku i wanifa po,” Omwene Omunamapangelo aeshe, Jehova, osho ta ti.’”
26 Ondjovo yaJehova oye uya vali kwaame tai ti: 27 “Omona womunhu, eshi osho ovanhu* vomuIsrael tava ti, ‘Emoniko olo e wete otali ka wanifwa po konima yefimbo lile okudja paife, nota xunganeke kombinga yonakwiiwa elela.’ 28 Onghee tya kuvo, ‘Eshi osho Omwene Omunamapangelo aeshe, Jehova, ta ti: “‘Kape na nande ondjovo imwe yomeendjovo dange tai ka shelelelwa; keshe osho handi popi otashi ka wanifwa,’ Omwene Omunamapangelo aeshe, Jehova, osho ta ti.”’”