Hesekiel
27 Ondjovo yaJehova oye uya vali kwaame tai ti: 2 “Ndele ove, omona womunhu, imba eimbilokemo* li na sha naTirus, 3 nokutya kuTirus,
‘Ove ou ho di moivelo yefuta,
Ove ou ho shingifile ovanhu vokounhunhu vahapu,
Eshi osho Omwene Omunamapangelo aeshe, Jehova, ta ti:
“Akutu! Tirus, ove mwene owa popya wa ti, ‘Onda wanenena mewapalo lange.’
4 Oitukulwa yoye oi li pokati* kefuta,
Novatungi voye ove ku tunga wa wapala filufilu.
5 Oipilangi yoye aishe ove i ninga momiti domidjenipa dokuSenir,
Nova kufa omusederi kuLibanon ve ku ningile opaala ileile.
6 Ova honga oipungululifo yoye momiti dinene* dokuBasan,
Noxulo yoye oya li ya longwa moiti ya fewekwa nomayoo eendjaba a dja kounhunhu vaKittim.
7 Omalapi oliina omaluvala a twa a dja kuEgipiti, okwa li haa kala onga ofaila yoskepa yoye,
Neefaila doye oda li da longwa meengodi dimbulau nomolududi leedi lipeepela, odo da dja kounhunhu vokuElisha.
8 Ovakalimo vomuSidon novokuArvadi ova li ovashingi voye.
Ovalumenhu voye mwene ovanongo, ove Tirus, ova li ovashingi voye veeskepa.
9 Ovalumenhu vokuGebal, ve na owino* nove na ounongo, ova vandeka omifya doskepa yoye.
Eeskepa adishe domefuta, naavo hava longo mudo ove uya kwoove mu ngeshefe.
10 Ovalumenhu vokuPersia, vokuLudim novokuPuti ova li metangakwaita loye, ovakwaita voye.
Ova leka oikelelifo yavo nomambale avo mwoove, nove ku etela efimano.
11 Ovalumenhu vokuArvadi, ovo ve li metangakwaita loye, ova li va fikama va dingilila omakuma oye,
Novalumenhu omapenda ova londa keeshungongulu doye.
Ova leka oikelelifo yongonga ya dingilila omakuma oye,
Nove ku wapeka filufilu.
12 “‘“Tarsis okwa ngeshefa naave omolwoupuna woye muhapu. Ova kumaana oshisilveri, oshivela shilaula, oshipapa noholo omolwoilandifomwa yoye. 13 Javan, Tubal naMesek ova ngeshefa naave, va kumaana ovapika nosho yo oinima ya longwa mongopolo, omolwoilandifomwa yoye. 14 Eumbo laTogarma ola kumaana eenghambe neenghambe dokulondwa nosho yo omamwili omolwoinima yoye. 15 Ovanhu vokuDedan ova ngeshefa naave; owa kuta ovalandifi kounhunhu vahapu; ova yandja omayoo eendjaba* nosho yo exuku lomiti li li eemhale doye.* 16 Edom okwa ngeshefa naave omolwoilandomwa yoye ihapu. Ova yandja oumanya votekois, olududi leedi lipeepela, oshiyata sha hondjelwa oinima shi na oluvala la twa, oshiyata shiwa elela, eekorali nosho yo oumanya vorubi va kumaana oilandifomwa yoye.
17 “‘“Juda nosho yo edu laIsrael ola ngeshefa naave, la yandja oilya yo-wheat yokuMinnit, oikulya iwa elela, omaadi eenyiki, omaadi nobalsam va kumaana oilandifomwa yoye.
18 “‘“Damaskus okwa ngeshefa naave omolwoilandomwa yoye ihapu nosho yo oupuna woye aushe, a landifa omaviinyu okuHelbon nosho yo olududi leedi lokuSahar.* 19 Vedan naJavan, va dja kuUsal, ova yandja oinima ya longwa moshivela, mokassia* nosho yo mokalmus,* va kumaane omolwoilandifomwa yoye. 20 Dedan okwa ngeshefa naave omalapi* okomitumba deenghambe. 21 Owa kuta Ovaaraba nosho yo omalenga aeshe aKeda, ovo va li hava landifa eedjona nosho yo eedi deendume noikombo. 22 Ovalandifi vokuSheba novokuRaama ova ngeshefa naave; ova yandja omaadi omaludi aeshe edimba liwa elela, omamanya ondilo nosho yo oshingoli, va kumaana oilandifomwa yoye. 23 Haran, Kanne, Eden, ovashingifi vokuSheba, Assur naKilmad ova ngeshefa naave. 24 Momalandifilo oye, ova ngeshefela mo oikutu iwa, eendjafa da longwa moshiyata shimbulau, omalapi a hondjelwa oinima yokufeweka, i na omaluvala a twa, nosho yo omamate e na omaluvala a yoolokafana, aishe ya mangwa, noya amenwa neengodi.
25 Eeskepa dokuTarsis odo da li oyeendifo yoilandifomwa yoye,
Opo u yadifwe nou djuupalekwe* mokati kefuta.
26 Ovapiluli voipungululifo voye ove ku twala momeva mahapu omefuta;
Omhepo yokoushilo oye ku teyaulila mokati kefuta.
27 Oupuna woye, oilandifomwa yoye, oilandomwa yoye, ovanailonga voye vomeeskepa nosho yo ovashingi voye veeskepa,
Ovo hava vandeke omifya deeskepa doye, ovo hava ngeshefa oilandifomwa yoye nosho yo ovalumenhu aveshe vomoita,
Ongudu* aishe, oyo i li mwoove,
Aveshe otava ka ningina mokati kefuta mefiku lokuteka po kwoye.
28 Ngeenge ovashingi voye vomeeskepa ova kuu, ominghulofuta otadi ka kakama.
29 Ovapiluli aveshe voipungululifo yeeskepa, ovalongi vomeeskepa novomefuta
Otava ka dja mo meeskepa davo nokufikama kedu.
30 Otava ka ingida mokule nokulila unene mokule omolwoye,
Eshi tave lifundile ondwi momitwe davo nokwaalangata momute.
31 Otave ke likulula eengwala notava ka djala eeshako;
Otave ke ku lila neenghono* tava lilaana.
32 Omolwokunyika oluhodi kwavo, otava ka imba omaimbilokemo nokulilaana omolwoye tava ti:
‘Olyelye e li ngaashi Tirus, oo paife a mwena mokati kefuta?
33 Eshi oilandifomwa yoye ya li hai uya okudja mokati kefuta, owa li ho palula ovanhu vahapu.
Oupuna woye muhapu noilandifomwa yoye oya punapalifa eehamba dokombada yedu.
34 Paife owa tekela mokati kefuta, mokati komeva,
Noilandifomwa yoye aishe nosho yo ovanhu voye ova ningina mo pamwe naave.
35 Ovakalimo aveshe vokounhunhu otave ke ku tala va kumwa,
Neehamba davo otadi ka dekweta koumbada, oipala yavo otai ka kala ya nyika oluhodi.
36 Ovashingifi, ovo ve li mokati koiwana, otava ka shika omwilwa omolwaasho she ku ningilwa.
Exulilo loye otali ke uya ombadilila notali ka kala litilifa,
Noto ka xula po fiyo alushe.’”’”