Hesekiel
30 Nondjovo yaJehova oye uya vali kwaame tai ti: 2 “Omona womunhu, xunganeka, ndele to ti: ‘Eshi osho Omwene Omunamapangelo aeshe, Jehova, ta ti:
“Akutu! ‘Lileni; efiku otali uya!’
3 Osheshi efiku oli li popepi, heeno, efiku laJehova oli li popepi.
Otali ka kala efiku loilemo, eufwafimbo loiwana.
4 Eongamukonda otali ke uya li lwife Egipiti, noumbada otau ka hanga Etiopia, eshi oimhu tai ka kala ya napakana muEgipiti;
Oupuna washo owa kufwa ko, nomakanghameno asho okwa ngumaunwa po.
5 Etiopia, Puti, Lud nosho yo ovanhu aveshe va lumbakana,*
Nosho yo Kub pamwe novanamati vomedu lehangano,*
Aveshe otava ka fya keongamukonda.”’
6 Eshi osho Jehova ta ti:
‘Ovayambididi vaEgipiti navo otava ka fya,
Neenghono dasho odo tashi linenepekele otadi ka ninipikwa.’
“‘Okudja kuMigdol fiyo okuSiene otava ka fila medu keongamukonda,’ Omwene Omunamapangelo aeshe, Jehova, osho a popya. 7 ‘Otava ka ningwa ombuwa elela momadu aeshe, noilando yavo vene otai ka kala oilando ya mbuwapala elela. 8 Notai ka shiiva kutya aame Jehova, eshi handi ka tomeka omundilo muEgipiti, naashi ovayambididi vavo aveshe va tyanghaulwa po. 9 Mefiku olo, ohandi ka tuma ovatumwa neeskepa, opo va mbadapaleke oo e lineekela unene muye mwene, Etiopia; otava ka hangwa koumbada mefiku olo tali hange Egipiti, osheshi otali uya shili.’
10 “Eshi osho Omwene Omunamapangelo aeshe, Jehova, ta ti: ‘Ohandi ka xulifa po eengudu daEgipiti neke laNebukadnesar,* ohamba yaBabilon. 11 Ye nomatangakwaita aye, ovo ve li ovakwanyanya neenghono vomoiwana, otava ka etwa mo va hanaune po edu. Otava ka pweya mo omaongamukonda avo va lwife Egipiti, nokuyadeka edu noimhu. 12 Ohandi ka kukutika omikangha* daNil, nohandi ka landifa po edu olo momake ovakolokoshi. Ohandi ka ningifa edu olo nakeshe osho shi li mo shi mbuwapalekwe keke lovanailongo. Ame mwene, Jehova, onde shi popya.’
13 “Eshi osho Omwene Omunamapangelo aeshe, Jehova, ta ti: ‘Ohandi ka hanauna po yo oikalunga itondifa,* nohandi ka xulifa po oikalunga ihe na oshilonga yaNof.* Itapa ka kala vali omuwiliki* okudja medu laEgipiti, nohandi ka tula oumbada medu laEgipiti. 14 Ohandi ka mbuwaleka Patros, nohandi ka tomeka omundilo muSoan, nokutokola No.* 15 Ohandi ka tilila ehandu lange muSin, ohotengulu yaEgipiti, nokuhanauna po ovanhu vomuNo. 16 Ohandi ka tomeka omundilo muEgipiti; na Sin otashi ka kwatwa koumbada, na No otashi ke liteyelwa, na Nof* otashi ka ponokelwa moshanga shomutenya. 17 Ovalumenhu ovanyasha vaOn* novokuPi-beset otava ka fya keongamukonda, noilando otai ka ya moukwatwa. 18 MuTehapanes efiku otali ka laula, eshi handi ka tokaulila oko eesikei* deendjoko daEgipiti. Eenghono daye odo he linenepekele otadi ka xula po, oilemo otai ke mu uvika, needoolopa daye otadi ka ya moukwatwa. 19 Ohandi ka tokola muEgipiti, nove na oku ka shiiva kutya aame Jehova.’”
20 Nomomudo omuti-11, momwedi wotete, mefiku etiheyali lomwedi, ondjovo yaJehova oye uya kwaame tai ti: 21 “Omona womunhu, onda teya okwooko kwaFarao, ohamba yaEgipiti; itaku ka mangwa, opo ku veluke, ile ku mangwe nelapi, opo ku pamekwe, ku dule okukufa eongamukonda.”
22 “Onghee eshi osho Omwene Omunamapangelo aeshe, Jehova, ta ti: ‘Ondi li omhinge naFarao, ohamba yaEgipiti, nohandi ka teya omaoko aye, oko ke na eenghono naako ka teka, nohandi ka ningifa eongamukonda li we mo meke laye. 23 Opo nee ohandi ke lihanifila Ovaegipiti mokati koiwana noku va halakanifila mokati komadu oo. 24 Ohandi ka pameka omaoko* ohamba yaBabilon, nohandi ka tula eongamukonda lange meke laye, nohandi ka teyaula omaoko aFarao, nota ka twa omadima mokule, ngaashi omunhu ta fi moipafi yaye.* 25 Ohandi ka pameka omaoko ohamba yaBabilon, ashike omaoko aFarao otaa ka endjelela; nove na oku ka shiiva kutya aame Jehova, eshi handi ka tula eongamukonda lange meke lohamba yaBabilon, notai ke li longifa li ponokele edu laEgipiti. 26 Nohandi ke lihanifila Ovaegipiti mokati koiwana noku va halakanifila mokati komadu oo, nove na oku ka shiiva kutya aame Jehova.’”