Hesekiel
32 Nomomudo omuti-12, momwedi omuti-12, mefiku lotete lomwedi, ondjovo yaJehova oye uya vali kwaame tai ti: 2 “Omona womunhu, imba eimbilokemo* li na sha naFarao, ohamba yaEgipiti, nokutya kuye,
‘Owa li ngaashi onghoshi yonyasha inaenghono* mokati koiwana,
Ashike owa mwenekwa.
Owa li ngaashi oshinamwenyo shinene shomefuta, to wilauka momilonga doye,
Owa dongela omeva neemhadi doye nowa* kakeka omilonga.’
3 Eshi osho Omwene Omunamapangelo aeshe, Jehova, ta ti:
‘Ohandi ka umbila kwoove onete yange okupitila mongudu yoiwana ihapu,
Nohandi ke ku kwata nonete yange yokukwata eeshi.
4 Ohandi ke ku efela kedu;
Ohandi ke ku umbila mehalandjadja.
Ohandi ka ningifa eedila adishe dokeulu di wile kwoove,
Nohandi ka kutifa oifitukuti yokombada yedu alishe nombelela yoye.
5 Ohandi ka umbila ombelela yoye keemhunda,
Nokuyadifa omalufilu noitukulwa yoye oyo ya xupa po.
6 Ohandi ka tutika edu nohonde yoye tai kunguluka fiyo okeemhunda,
Notai ka yadifa omakungulukilo.’*
7 ‘Nongeenge owa dimwa po, ohandi ka uvika eulu* nokulaulika eenyofi dalo.
Ohandi ka uvika etango noilemo,
Nomwedi itau ka minikila vali.
8 Ohandi ka laulika omaminikilo aeshe, oo taa minikile keulu omolwoye,
Nohandi ka uvika edu loye nomulaulu,’ Omwene Omunamapangelo aeshe, Jehova, osho ta ti.
9 ‘Ohandi ka nyikifa oluhodi omitima dovanhu vahapu, eshi handi ka twala eenghwate doye koiwana imwe,
Komadu oko uhe shii.
10 Ohandi ka nyikifa oluhodi omitima dovanhu vahapu,
Neehamba davo otadi ka kakama da tila omolwoye, eshi handi ke va yelulila eongamukonda lange.
Otava ka kala alushe tava kakama, keshe umwe a tila omolwomwenyo waye,
Mefiku lokuteka po kwoye.’
11 Osheshi eshi osho Omwene Omunamapangelo aeshe, Jehova, ta ti:
‘Eongamukonda lohamba yaBabilon otali ke ku hanga.
12 Ohandi ka dipaifa eengudu doye komaongamukonda omatangakwaita omanaenghono,
Aeshe oo omakwanyanya neenghono omoiwana.
Otaa ka tula pedu etumba laEgipiti, neengudu daye adishe otadi ka hanaunwa po.
13 Ohandi ka hanauna po oimuna yaye aishe, oyo i li popepi nomeva aye mahapu,
Nokape na omhadi yomunhu, ile ekondo loshimuna tali ke a dongela vali.’
14 ‘Pefimbo opo, ohandi ka yeleka omeva avo,
Nohandi ka ningifa omilonga davo di kunguluke ngaashi omaadi,’ Omwene Omunamapangelo aeshe, Jehova, osho ta ti.
15 ‘Eshi handi ka ninga Egipiti ombuwa ihe na sha, edu la yelekwa ashishe osho sha li mo,
Eshi handi ka dipaa ovakalimo aveshe vomusho,
Ove na oku ka shiiva kutya aame Jehova.
16 Eli eimbilokemo, novanhu otave ke li imba shili;
Ovanakadona voiwana otave ke li imba.
Otave ke li imbila Egipiti nosho yo eengudu adishe daye,’ Omwene Omunamapangelo aeshe, Jehova, osho ta ti.”
17 Opo nee momudo omuti-12, mefiku eti-15 lomwedi, ondjovo yaJehova oye uya kwaame tai ti: 18 “Omona womunhu, lila omolweengudu dOvaegipiti, noku mu eta medu olo li li koshi, ye novanakadona voshiwana oshinaenghono, pamwe naavo tava i melambo.*
19 “‘Olyelye u dule mewapalo? Inda mo, nokunangala pamwe naavo inava pita etanda!’
20 “‘Otava ka wila mokati kaavo va dipawa keongamukonda. Okwa yandjwa keongamukonda; mu nana po pamwe neengudu daye adishe.
21 “‘Okudja moule wOmbila* ovakwaita ovanaenghono elela otava ka popya naye novakwafeli vaye. Otava ka ya medu shili nokunangala ngaashi ashike ovo inava pita etanda, ovo va dipawa keongamukonda. 22 Assiria oko e li oko nongudu yaye aishe. Eembila davo adishe ode mu dingilila; aveshe ova dipawa keongamukonda. 23 Eembila daye odi li moule welambo,* nongudu yaye oya dingilila ombila yaye; aveshe ova dipawa keongamukonda, molwaashi ova li va etifa outile medu lovanamwenyo.
24 “‘Elami oku li oko pamwe neengudu daye adishe da dingilila ombila yaye; aveshe ova dipawa keongamukonda. Ova ya inava pita etanda medu olo li li koshi, ovo va li va etifa outile medu lovanamwenyo. Paife otava ka humbata elengwa lavo pamwe naavo tava i melambo.* 25 Ove mu ningila ombete mokati kovanhu ovo va dipawa, pamwe neengudu daye adishe da dingilila eembila daye. Aveshe inava pita etanda, va dipawa keongamukonda, molwaashi ova li va etifa outile medu lovanamwenyo; notava ka humbata elengwa lavo pamwe naavo tava i melambo.* Okwa tulwa mokati koonakudipawa.
26 “‘Oko oko Mesek naTubal nosho yo eengudu davo* adishe di li. Eembila davo* adishe ode mu dingilila. Aveshe inava pita etanda, va tyuulwa neongamukonda, molwaashi ova li va etifa outile medu lovanamwenyo. 27 Mbela itava ka nangala pamwe novakwaita ovanaenghono ovo inava pita etanda, ovo va fya, ovo va ya mOmbila* pamwe noilwifo yavo yomoita? Notava ka tula omaongamukonda avo koshi yomitwe* davo, nomatimba avo momakipa avo, molwaashi ovakwaita ovo ovanaenghono ova hepeka edu lovanamwenyo. 28 Ashike shi na sha naave, oto ka nyanyaulilwa mokati kaavo inava pita etanda, noto ka nangala pamwe naavo va dipawa keongamukonda.
29 “‘Edom oku li oko, eehamba daye nomalenga aye aeshe, ovo nonande ove na eenghono dinene, va pakwa mokati kaavo va dipawa keongamukonda; navo otava ka nangala pamwe naavo inava pita etanda nosho yo pamwe naavo tava i melambo.*
30 “‘Oko oko omalenga* aeshe okolundume e li pamwe nOvasidon aveshe, ovo va ya medu va fya ohoni pamwe naavo va dipawa, nonande okwa etifa oumbada omolweenghono davo dinenenene. Otava ka nangala inava pita etanda pamwe naavo va dipawa keongamukonda, notava ka humbata elengwa lavo pamwe naavo tava i melambo.*
31 “‘Farao ota ka mona oinima aishe oyo, nota ka hekelekwa omolwaashishe osho sha ningilwa eengudu daye; Farao nosho yo etangakwaita laye alishe otava ka dipawa keongamukonda,’ Omwene Omunamapangelo aeshe, Jehova, osho ta ti.
32 “‘Molwaashi okwa li a etifa outile medu lovanamwenyo, Farao nosho yo eengudu daye adishe otava ka pakwa pamwe naavo inava pita etanda, pamwe naavo va dipawa keongamukonda,’ Omwene Omunamapangelo aeshe, Jehova, osho ta ti.”