Hesekiel

26 Momudo omuti-11, mefiku lotete lomwedi, ondjovo yaJehova oye uya kwaame tai ti: 2 “Omona womunhu, molwaashi Tirus okwa popya e li omhinge naJerusalem a ti, ‘Aha! Omuvelo wovanhu owa tekauka po! Oinima aishe otai ke uya kwaame, nopaife, ohandi ka ninga oshipuna, eshi a hanaunwa po’; 3 onghee hano, eshi osho Omwene Omunamapangelo aeshe, Jehova, ta ti: ‘Paife, ohandi ke ku lwifa, ove Tirus, nohandi ke ku tumina oiwana ihapu i ku lwife, ngaashi ashike efuta tali wilaula omakufikufi alo. 4 Otava ka hanauna po omakuma aTirus nokuteyaula po eeshungongulu daye, nohandi ka komba po edu, noku mu ninga emanya tali vema, lihe na sha. 5 Ota ka ninga oluumbo lokukukutikila eenete dokukwata eeshi mokati kefuta.’

“‘Osheshi ame mwene onde shi popya,’ Omwene Omunamapangelo aeshe, Jehova, osho ta ti, ‘nota ka nyekwa oinima koiwana. 6 Noitukulwa* yaye yokomikunda otai ka dipawa keongamukonda, novanhu otava ka shiiva kutya aame Jehova.’

7 “Osheshi eshi osho Omwene Omunamapangelo aeshe, Jehova, ta ti: ‘Paife ohandi tumu Ohamba Nebukadnesar* yaBabilon i lwife Tirus kolundume; oye ohamba yeehamba, e na eenghambe, omatemba oita, ovalondinghambe nosho yo etangakwaita lovakwaita* vahapu. 8 Ota ka hanauna po oitukulwa yoye yokomikunda neongamukonda, nota ka tunga ekuma le ku dingilila, noku ku ningila ekondeka le ku dingilila nosho yo oku ku yelulila oshikelelifo shinene. 9 Ota ka denga omakuma oye noilongifo yaye yokungumauna po,* nota ka teyaula po eeshungongulu doye nomakuva* aye. 10 Eenghambe daye otadi ka kala dihapu neenghono, tadi ke ku uvika nondwi, nomaweelelo ovalondinghambe, omalola nosho yo omatemba otaa ka kakamifa omakuma oye, eshi taa piti moivelo yoye, ngaashi ovalumenhu tava mbobolokele moshilando shomakuma a teka po. 11 Omakondo eenghambe daye otaa ka lyataula omapandavanda oye aeshe; ota ka dipaa ovanhu voye neongamukonda, neengudi doye dinaenghono otadi ka ngumaukila pedu. 12 Otava ka kufa ko omaliko oye, tava ka nyeka ko oilandifomwa yoye, tava ka ngumauna po omakuma oye, nokuhanauna po omaumbo oye mawa; opo nee omamanya oye, oiti yoye nedu loye otave ke i kupula momeva.’

13 “‘Ohandi ka xulifa po eweelelo lomaimbilo oye, noitapa ka udika vali ewi louxumbafeta voye. 14 Nohandi ke ku ninga emanya tali vema lihe na sha, noto ka ninga oluumbo lokukukutikila eenete dokukwata eeshi. Ito ka tungululwa nandenande, osheshi ame mwene, Jehova, onde shi popya,’ Omwene Omunamapangelo aeshe, Jehova, osho ta ti.

15 “Eshi osho Omwene Omunamapangelo aeshe, Jehova, ta ti kuTirus: ‘Mbela ounhunhu itava ka kakama komalinyengo okuteka po kwoye, eshi ovo* tava fi tava keme, eshi edipao tali ningwa mokati koye? 16 Ovapangeli* aveshe vefuta otava ka dja ko komalukalwapangelo avo, nokudula mo oikutu* yavo, nokudula mo oikutu yavo, ya hondjelwa oinima yokufeweka, notava ka kwatwa* koumbada. Otava ka kala omutumba pedu notava ka kakama alushe, noku ku tala va kumwa. 17 Notave ke ku imbila eimbilokemo,* ndele tava ti kwoove:

19 “Osheshi eshi osho Omwene Omunamapangelo aeshe, Jehova, ta ti: ‘Ngeenge onde ku hanauna po ngaashi oilando oyo ihai kalwa, ngeenge onde ku uvike nomeva taa ndwafuka, nongeenge omeva omanaenghono okwe ku tuvikile, 20 ohandi ke mu twala, ove nosho yo ovo tava i melambo,* kovanhu vonalenale; ohandi ke ku ningifa u kale ho di monhele i li pedu elela, ngaashi eenhele donale odo da hanaunwa po, pamwe naavo tava i melambo, opo uha dule okukaliwa. Opo nee ohandi ka tumbaleka* edu lovanamwenyo.

21 “‘Ohandi ke ku etela ehanauno ombadilila, noito ka kala po vali. Otave ke ku konga, ashike ito ka monika vali nandenande,’ Omwene Omunamapangelo aeshe, Jehova, osho ta ti.”