Hesekiel
29 Momudo omutimulongo, momwedi omutimulongo, mefiku eti-12 lomwedi, ondjovo yaJehova oye uya kwaame tai ti: 2 “Omona womunhu, taalelifa oshipala shoye kuFarao, ohamba yaEgipiti, nokuxunganeka u li omhinge naye nosho yo naEgipiti ashishe. 3 Popya eendjovo edi: ‘Eshi osho Omwene Omunamapangelo aeshe, Jehova, ta ti:
“Ondi li omhinge naave, Farao, ohamba yaEgipiti,
Oshinamwenyo shinenenene shomefuta sha nangala mokati komakungulukilo omulonga waye waNil,*
Osho sha ti, ‘Omulonga waNil owange.
Onde u liningila ame mwene.’
4 Ashike ohandi ka tula eengona meehamama doye, nokuningifa eeshi domulonga woye waNil di kanyatele komapeta oye.
Ohandi ke ku kufa mo momulonga woye waNil pamwe neeshi adishe domomulonga waNil, odo da kanyatela komapeta oye.
5 Ohandi ke ku fiya mombuwa, ove nosho yo eeshi adishe domomulonga woye waNil.
Oto ka wila mehalandjadja, noito ka kufwa po, ile u ongelwe.
Ohandi ke ku yandja u li oikulya koifitukuti yokombada yedu nokeedila dokeulu.
6 Opo nee ovakalimo vomuEgipiti aveshe otava ka shiiva kutya aame Jehova,
Osheshi ihava yambidida vali eumbo laIsrael; eyambidido lavo ola li li dulike kwaalo loshihati.*
7 Eshi va kwata eke loye, owa li wa tekauka,
Nowa teta omapepe avo.
Eshi ve likolelela kwoove, owa li wa teka,
Nowa ningifa omaulu* avo a kakame.”
8 “‘Onghee hano, eshi osho Omwene Omunamapangelo aeshe, Jehova, ta ti: “Ohandi eta eongamukonda kombada yoye, mwoove ohandi ka lefeka mo ovanhu noinamwenyo. 9 Edu laEgipiti otali ka hanaunwa po nokuninga eputu; notava ka shiiva kutya aame Jehova, osheshi owa* ti, ‘Omulonga waNil owange; aame nde u shita.’ 10 Onghee ondi li omhinge naave nosho yo nomulonga woye waNil, nohandi ka ninga edu laEgipiti ombuwa, noku li kukutika, eputu longaho, okudja kuMigdol fiyo okuSiene, fiyo okeengaba daEtiopia. 11 Kape na omunhu, ile oshinamwenyo tashi ka enda mo kolupadi, noitamu ka kaliwa oule weedula 40. 12 Ohandi ka ninga edu laEgipiti ombuwa elela momadu aeshe, noilando yaye otai ka kala ya mbuwapala elela moilando oule weedula 40; nohandi ke lihanifila Ovaegipiti mokati koiwana noku va halakanifila mokati komadu oo.”
13 “‘Osheshi eshi osho Omwene Omunamapangelo aeshe, Jehova, ta ti: “Konima yeedula 40, ohandi ka ongela mo Ovaegipiti okudja movanhu, omo va li ve lihanifilwa; 14 ohandi ka shunifa eenghwate dOvaegipiti kedu laPatros, kedu oko da dile, naako oko tadi ka ninga ouhamba inau fimana. 15 Egipiti ota ka ninipikwa e dule omauhamba makwao, noita ka pangela vali oiwana ikwao, nohandi ke va ninga vanininini, opo vaha dule okukwata ko oiwana ikwao. 16 Ita ka kala vali e lineekelwa keumbo laIsrael, ndele ote ke va dimbulukifa ashike epuko lavo, eshi va li va ka konga ekwafo kOvaegipiti. Nove na oku ka shiiva kutya aame Omwene Omunamapangelo aeshe, Jehova.”’”
17 Paife, momudo omuti-27, momwedi wotete, mefiku lotete lomwedi, ondjovo yaJehova oye uya kwaame tai ti: 18 “Omona womunhu, Nebukadnesar,* ohamba yaBabilon, okwa ningifa etangakwaita laye li ponokele Tirus. Omutwe keshe owa ninga ongwala, nepepe keshe ola pushuka. Ashike ye nosho yo etangakwaita laye inava mona ondjabi omolwoilonga oyo va longela Tirus.
19 “Onghee hano, eshi osho Omwene Omunamapangelo aeshe, Jehova, ta ti, ‘Ohandi yandje edu laEgipiti kuNebukadnesar,* ohamba yaBabilon, nota ka kufa mo oupuna washo nosho yo oixuulwa* ihapu nokunyeka mo oinima yalo; notai ka ninga ondjabi yetangakwaita laye.’
20 “‘Ohandi ke mu pa edu laEgipiti, eshi ve mu* lwifa ponhele yange,’ Omwene Omunamapangelo aeshe, Jehova, osho ta ti.
21 “Mefiku olo, ohandi ka ningifa oluvinga li tutume omolweumbo laIsrael,* nohandi ke ku pa omhito u popye mokati kavo; nove na oku ka shiiva kutya aame Jehova.”