Hesekiel
42 Opo nee okwa twala nge komukala wokondje wa taalela kolundume. Nokwa eta nge ketungo leenduda dokulila, olo la li popepi nehalandjadja, kolundume laapo pa shakenena etungo. 2 Oule walo kombinga yoshivelo shokolundume owa li u na omaludimbo* 100, nola li li na ounene womaludimbo 50. 3 Ola li li li pokati komukala womeni, oo wa li u na ounene womaludimbo 20, nosho yo okalupanda komukala wokondje. Omikala dalo oda li da taalelafana, noda li di na eenduda nhatu da londafana okuyuka pombada. 4 Opa li pe na ondjila yokweendela yomeni i na ounene womaludimbo 10, ofimbo ino hanga eenduda* dokulila nosho yo oule womukokomoko* womaludimbo 100, noivelo yado oya li kolundume. 5 Eenduda dokulila dopombada detungo oda li dinini neenghono di dulife odo di li pedu elela nosho yo odo di li pokati da londafana, molwaashi omikala oda kufa po onhele yado ihapu. 6 Osheshi oda li eenduda nhatu da londafana okuyuka pombada, ashike kada li di na eengudi ngaashi eengudi domikala. Nomolwaasho onhele yopedu ihapu ya li ya kufwa po kudo shi dulife okudja pedu nosho yo keenduda odo da londafana dopokati.
7 Ekuma lomamanya lokombada, olo li li popepi neenduda dokulila, la shaama nomukala wokondje, olo la taalela keenduda dikwao dokulila, ola li li na oule womukokomoko womaludimbo 50. 8 Osheshi oule weenduda dokulila, odo da li popepi nomukala wokondje, oda li di na omaludimbo 50, ashike odo da li da taalela konhele iyapuki, oda li di na omaludimbo 100. 9 Eenduda dokulila oda li di na ondjila i li kombinga yokoushilo ya ya fiyo okudo okudja komukala wokondje.
10 Opa li yo eenduda dokulila meni* lekuma lomamanya lomukala, olo la taalela koushilo, popepi nehalandjadja nosho yo netungo. 11 Opa li ondjila yokweendela, ofimbo ino di hanga, ngaashi oyo i li keenduda dokulila dokolundume. Oda li di na oule nomutamo wa faafana, noda li di na oivelo yokudja mo nomitungilo da faafana. Oivelo yado 12 oya li ya fa oivelo yeenduda dokulila, odo da li kombinga yokolukadi. Opa li oshivelo pehovelo londjila, ofimbo ino fika popepi nekuma lomamanya, olo la taalela koushilo, opo umwe a dule okupita.
13 Opo nee okwa tya kwaame: “Eenduda dokulila dokolundume neenduda dokulila dokolukadi, odo di li popepi nehalandjadja, odi li eenduda dokulila diyapuki omo ovapristeri ovo hava i kuJehova hava lile omayambo mayapuki elela. Ohava tula oko omayambo mayapuki elela, eendjayambo, omatimbayambo nomalivelombediyambo, molwaashi onhele oiyapuki. 14 Ngeenge ovapristeri va i mo, kave na okudja mo monhele iyapuki tava i momukala wokondje nopehe na tete okukufa mo oikutu, oyo hava longifa, ngeenge tava yakula, molwaashi oiyapuki. Otava ka djala oikutu imwe, opo va dule okuya peenhele odo da pitikilwa ovanhu.”
15 Eshi a mana okuyeleka onhele yotembeli yomeni,* okwa wilika nge ndi ye nondjila yokoshivelo, osho sha taalela koushilo, nokwa yeleka onhele aishe.
16 Okwa yeleka ombinga yokoushilo nolumbungu lokuyelekifa.* Oya li i na oule womalumbungu 500, she likolelela kolumbungu lokuyelekifa, okudja kombinga imwe fiyo okombinga ikwao.
17 Okwa yeleka ombinga yokolundume, noya li i na oule womalumbungu 500, she likolelela kolumbungu lokuyelekifa.
18 Okwa yeleka ombinga yokolukadi, noya li i na oule womalumbungu 500, she likolelela kolumbungu lokuyelekifa.
19 Okwa ya kombinga yokouninginino. Okwa yeleka oule womalumbungu 500 nolumbungu lokuyelekifa.
20 Okwe i yeleka keembinga nhee. Oya li i na ekuma le i dingilila, olo la li li na oule womalumbungu 500 nounene womalumbungu 500, opo li tukule pokati kaasho shiyapuki naasho tashi longifwa kukeshe umwe.