Hesekiel
47 Opo nee okwa shunifa nge koshivelo shotembeli, naako onda mona ko omeva taa kunguluka a finda koushilo taa di koshi yoshivelo shotembeli, osheshi oshipala shotembeli osha li sha taalela koushilo. Omeva okwa li taa kunguluka koshi kombinga yokolulyo lotembeli, kolukadi loaltari.
2 Opo nee okwa pitifa nge mo, a yukifa nge koshivelo shokolundume nokwa twala nge kondje, ndele ta yukifa nge koshivelo shokondje, osho sha taalela koushilo, nonda mona omeva taa kunguluka okudja kombinga yokolulyo.
3 Eshi omulumenhu a ya a yuka koushilo e na ongodi yokuyelekifa meke laye, okwa yeleka okudja komuvelo omaludimbo* 1 000, nokwa ningifa nge ndi ende momeva; omeva okwa li a twa peemhando.
4 Opo nee okwa yeleka vali 1 000, nokwa endifa nge momeva, nokwa li a twa peengolo.
Okwa yeleka 1 000 likwao, nokwa endifa nge mo, nomeva okwa li a twa peenho.
5 Eshi a yeleka 1 000 likwao, opa li omeva taa kunguluka neenghono, oo nda li itandi dulu okutauluka, osheshi omeva okwa li a ya moule neenghono, nomunhu okwa li e na okuyowa; omeva mahapu taa kunguluka oo a li itaa dulu okutaulukwa kolupadi.
6 Okwa pula nge a ti: “Omona womunhu, owa mona oshinima eshi?”
Opo nee okwa endifa nge, nokwa shunifa nge komunghulo womakungulukilo. 7 Eshi nda aluka, onda mona kutya komunghulo womakungulukilo okwa li ku na omiti dihapu neenghono keembinga adishe. 8 Opo nee okwa tya kwaame: “Omeva aa otaa kunguluka a finda koshitukulwa shokoushilo, notaa ka kunguluka taa piti muAraba,* nokuya mefuta. Ngeenge okwa i mefuta, omeva amo otaa ka velulwa. 9 Oishitwa* ihapu otai ka dula okukala nomwenyo keshe opo omeva* taa kunguluka. Otaku ka kala eeshi dihapu neenghono, molwaashi omeva aa otaa ka kunguluka oko. Omeva efuta otaa ka velulwa, nakeshe shimwe otashi ka kala shi na omwenyo keshe oko omakungulukilo a yuka.
10 “Ovakwati veeshi otava ka kala ofika polwamba lao okudja kuEn-gedi fiyo okuEn-eglaim, oko taku ka kala oluumbo lokukukutikila eenete dokukwata eeshi. Otaku ka kala eeshi dihapu neenghono domaludi, ngaashi eeshi domEfuta Linene.*
11 “Otamu ka kala eenhele da kaka nosho yo eenhele di na eenhata, neenhele odo itadi ka velulwa. Otadi ka efelwa omongwa.
12 “Omiti domaludi aeshe oikulya otadi ka mena kominghulo domakungulukilo. Omafo ado itaa ka lemba; notadi ka ima alushe oiimati. Omwedi keshe otadi ka ima oiimati ipe, molwaashi omeva ado otaa kunguluka okudja konhele iyapuki. Oiimati yado otai ka kala oikulya, nomafo ado otaa ka velula.”
13 Eshi osho Omwene Omunamapangelo aeshe, Jehova, ta ti: “Eshi osho oshitukulwa osho tamu ka pewa shi li edu lefyuululo lomapata 12 aIsrael, na Josef ota ka mona oitukulwa ivali. 14 Otamu ke shi fyuulula notamu ka mona oitukulwa* i fike pamwe. Onda ana okuyandja edu eli kooxokulululwa, nopaife otamu li pewa* li li efyuululo.
15 “Edi odo eengaba dedu dokombinga yokolundume: Oda dja kEfuta Linene da finda kondjila, oyo ya yuka kuHetlon fiyo okuSedad, 16 Hamat, Beerota naSibraim, odo di li pokati koshitukulwa shaDamaskus nosho yo oshitukulwa shaHamat fiyo okuHaser-hatikon, osho shi li peengaba daHauran. 17 Onghee eengaba otadi ka dja pefuta laHasar-enon da lambalala eengaba daDamaskus, fiyo okolundume nosho yo keengaba daHamat. Edi odo eengaba dokolundume.
18 “Ombinga yokoushilo oya hovela pokati kaHauran naDamaskus noya lambalala Jordan pokati kaGilead nosho yo edu laIsrael. Omu na okuyeleka okudja keengaba fiyo okoushilo wefuta.* Edi odo eengaba dokoushilo.
19 “Eengaba dokolukadi* otadi ka dja muTamar fiyo okomeva aMeriba-kades, opo nee otadi ka ya kEfilu* nosho yo kEfuta Linene. Edi odo eengaba dokolukadi.*
20 “Kombinga yokouninginino oku na Efuta Linene, okudja peengaba fiyo oponhele oyo ya taalelafana naLebo-hamat.* Edi odo eengaba dokouninginino.”
21 “Omu na okulitukulila edu eli mokati komapata 12 aIsrael. 22 Omu na oku li tukula li li efyuululo mokati keni vene nokovanailongo, ovo ve li pamwe nanye, ovo va dala ounona, ofimbo va li mokati keni; notava ka kala ngaashi eedalele daIsrael kunye. Otava ka mona efyuululo mokati komapata aIsrael pamwe nanye. 23 Omu na okupa omunailongo efyuululo moshitukulwa shepata omo a kala ha di,” Omwene Omunamapangelo aeshe, Jehova, osho ta ti.