Hesekiel

48 “Aa omadina omapata okuhovela kombinga yokolundume: Oshitukulwa shaDan osha kunghula naHetlon fiyo okuLebo-hamat,* tashi i fiyo okuHasar-enan, sha lambalala eengaba daDamaskus kombinga yokolundume, polwamba laHamat; nosha ya okudja koushilo fiyo okeengaba dokouninginino. 2 Oshitukulwa shaAsser oshi li peengaba daDan, okudja keengaba dokoushilo fiyo okeengaba dokouninginino. 3 Oshitukulwa shaNaftali oshi li peengaba daAsser, okudja keengaba dokoushilo fiyo okeengaba dokouninginino. 4 Oshitukulwa shaManasse oshi li peengaba daNaftali, okudja keengaba dokoushilo fiyo okeengaba dokouninginino. 5 Oshitukulwa shaEfraim oshi li peengaba daManasse, okudja keengaba dokoushilo fiyo okeengaba dokouninginino. 6 Oshitukulwa shaRuben oshi li peengaba daEfraim, okudja keengaba dokoushilo fiyo okeengaba dokouninginino. 7 Oshitukulwa shaJuda oshi li peengaba daRuben, okudja keengaba dokoushilo fiyo okeengaba dokouninginino. 8 Keengaba daJuda, okudja keengaba dokoushilo fiyo okeengaba dokouninginino, onhele oyo mu na okuyandja i li omayambidido, oyo mu na okulikalekela, oi na okukala i na ounene womaludimbo* 25 000 noi fike pamwe noule woitukulwa yomapata makwao, okudja keengaba dokoushilo fiyo okeengaba dokouninginino. Onhele iyapuki otai ka kala mokati kayo.

9 “Onhele oyo i li omayambidido, oyo mu na okulikalekelela Jehova, oi na okukala i na oule womukokomoko womaludimbo 25 000, nounene womaludimbo 10 000. 10 Otai ka kala omayambidido mayapuki ovapristeri. Otai ka kala i na omaludimbo 25 000 kombinga yokolundume, 10 000 kouninginino, 10 000 koushilo nosho yo 25 000 kolukadi. Onhele iyapuki yaJehova otai ka kala mokati kayo. 11 Otai ka ninga yovapristeri, ovo va yapulwa okudja movanamati vaSadok, ovo va kala tava wanifa po oinakuwanifwa yavo omolwange, noinava efa nge po, eshi Ovaisrael nOvalevi va efa nge po. 12 Otava ka kala ve na oshitukulwa shedu, osho shi li omayambidido, osho she likalekelwa shi li oshinima shiyapuki elela keengaba dOvalevi.

13 “Ovalevi otava ka kala ve na oshitukulwa popepi noshitukulwa shovapristeri, shi na oule womukokomoko womaludimbo 25 000 nosho yo ounene womaludimbo 10 000. (Oule aushe wedu otau ka kala u na oule womukokomoko womaludimbo 25 000, nounene womaludimbo 10 000.) 14 Kave na okulandifa, okukumaana, ile okuyandja po oshitukulwa keshe shiwa elela shedu, osheshi oshi li oshinima shiyapuki kuJehova.

15 “Oshitukulwa, osho sha xupa po, osho shi na ounene womaludimbo 5 000 pamwe neengaba domaludimbo 25 000, otashi ka kala shokulongifwa kukeshe umwe moshilando, tashi kala shomaumbo noshoulifilo. Oshilando otashi ka kala pokati kasho. 16 Oshilando osha yelekwa ngaha: Eengaba dokolundume odi na omaludimbo 4 500, eengaba dokolukadi odi na 4 500, eengaba dokoushilo odi na 4 500 neengaba dokouninginino odi na 4 500. 17 Oshitukulwa shoulifilo shoshilando otashi ka kala shi na omaludimbo 250 kolundume, 250 kolukadi, 250 koushilo nosho yo 250 kouninginino.

18 “Oule woshitukulwa, osho sha xupa po, ou na okukala wa faafana naau woshitukulwa, osho shi li omayambidido mayapuki, omaludimbo 10 000 okoushilo nosho yo 10 000 okouninginino. Ou na okukala wa faafana naau woshitukulwa, osho shi li omayambidido mayapuki, noilikolomwa yasho otai ka yandja oikulya kwaavo tava yakula moshilando. 19 Oshitukulwa osho otashi ka longwa kwaaveshe ovo tava yakula moshilando va dja momapata aeshe aIsrael.

20 “Oshitukulwa ashishe, osho shi li omayambidido, omaludimbo 25 000 keembinga adishe nhee di fike pamwe. Omu na oku e likalekelela e li omayambidido mayapuki pamwe nemona loshilando.

21 “Osho sha xupa po keembinga adishe doshitukulwa, osho shi li omayambidido mayapuki nosho yo emona loshilando otashi ka ninga shelenga. Otashi ka kala peengaba, odo di na omaludimbo 25 000 di li koushilo nosho yo kouninginino wonhele oyo ya yandjwa i li omayambidido. Otashi ka kala sha faafana noitukulwa oyo ya kwatafana, notashi ka ninga shelenga. Oshitukulwa, osho shi li omayambidido mayapuki, nosho yo onhele iyapuki yotembeli otai ka kala mokati kayo.

22 “Emona lOvalevi nosho yo emona loshilando otali ka kala pokati kaasho shelenga. Oshitukulwa shelenga otashi ka kala pokati keengaba daJuda nokeengaba daBenjamin.

23 “Shi na sha nomapata oo a xupa po, oshitukulwa shaBenjamin osha dja keengaba dokoushilo fiyo okeengaba dokouninginino. 24 Oshitukulwa shaSimeon oshi li peengaba daBenjamin, okudja keengaba dokoushilo fiyo okeengaba dokouninginino. 25 Oshitukulwa shaIsaskar oshi li peengaba daSimeon, okudja keengaba dokoushilo fiyo okeengaba dokouninginino. 26 Oshitukulwa shaSebulon oshi li peengaba daIsaskar, okudja keengaba dokoushilo fiyo okeengaba dokouninginino. 27 Oshitukulwa shaGad oshi li peengaba daSebulon, okudja keengaba dokoushilo fiyo okeengaba dokouninginino. 28 Eengaba dokolukadi odo di li peengaba daGad otadi ka dja kuTamar fiyo okomeva opuMeriba-kades, fiyo okefilu* nofiyo okEfuta Linene.*

29 “Edu eli olo mu na okutukula li li efyuululo lomapata aIsrael, naayo oyo tai ka kala oitukulwa yavo,” Omwene Omunamapangelo aeshe, Jehova, osho ta ti.

30 “Ei otai ka kala oivelo yokudja mo yoshilando: Ombinga yokolundume otai ka kala i na omaludimbo 4 500.

31 “Oivelo yoshilando otai ka lukwa she likolelela komapata aIsrael. Oivelo itatu, oyo i li kolundume, ope na oshivelo shimwe shaRuben, oshivelo shimwe shaJuda noshivelo shimwe shaLevi.

32 “Ombinga yokoushilo otai ka kala i na oule womukokomoko womaludimbo 4 500, noi na oivelo itatu: oshivelo shimwe oshaJosef, oshivelo shimwe oshaBenjamin noshivelo shimwe oshaDan.

33 “Ombinga yokolukadi otai ka kala i na omaludimbo 4 500, i na oivelo itatu: oshivelo shimwe oshaSimeon, oshivelo shimwe oshaIsaskar noshivelo shimwe oshaSebulon.

34 “Ombinga yokouninginino otai ka kala i na oule womukokomoko womaludimbo 4 500, i na oivelo itatu: oshivelo shimwe oshaGad, oshivelo shimwe oshaAsser noshivelo shimwe oshaNaftali.

35 Oshinano, osho sha dingilila oshilando, otashi ka kala shi na omaludimbo 18 000. Nedina loshilando, okudja mefiku olo, otali ka kala Jehova Omo E Li.”