Hesekiel

46 “Eshi osho Omwene Omunamapangelo aeshe, Jehova, ta ti: ‘Oshivelo shomukala womeni, osho sha taalela koushilo, oshi na okukala sha idila oule womafiku ahamano oilonga, ashike mefiku lEshabata nosho yo mefiku lomwedi mupe, oshi na okuyeululwa. 2 Elenga otali ka ya mo okudja pondje tali pitile poshivelo shokanduda kokufikila, noli na okufikama poshikulo shoshivelo. Ovapristeri ove na okuyamba exwikiloyambo lalo alishe nosho yo omayambo oukumwe alo, notali ke linyongamena poshivelo shomuvelo, ndele tali di mo. Ashike oshivelo kashi na okwiidilwa fiyo okonguloshi. 3 Ovanhu vomoshilongo otave ke linyongamena yo moipafi yaJehova poshivelo shomuvelo oo mOmashabata nosho yo peemwedi dipe.

4 “‘Exwikiloyambo alishe, olo elenga tali ka yandja kuJehova mefiku lEshabata, oli na okukala la fikama po meedjona deendume da koshoka hamano nosho yo modi yondume ya koshoka. 5 Eendjayambo odi na okukala oefa* modi yondume nosho yo keshe osho ta dulu okuyandja meedjona deendume, pamwe nohin* yomaadi noefa keshe. 6 Mefiku lomwedi mupe, eyambo oli na okukala la kwatela mo ondumetana ya koshoka yomoufita, eedjona deendume hamano nosho yo odi yondume; odi na okukala da koshoka. 7 Oku na okuyamba oefa yeendjayambo mondumetana, oefa modi yondume nosho yo keshe osho ta dulu okuyandja meedjona deendume. Noku na okuyamba ohin yomaadi noefa keshe.

8 “‘Ngeenge elenga tali i mo, oli na okuya mo nondjila yoposhivelo shokanduda kokufikila, noli na okudja mo nondjila ya faafana. 9 Nongeenge ovanhu vomoshilongo ove uya moipafi yaJehova pefimbo loivilo, ovo tave uya oku mu longela tava pitile koshivelo shokolundume, ove na okudja mo tava pitile koshivelo shokolukadi, naavo tave uya mo tava pitile koshivelo shokolukadi, ove na okudja mo tava pitile koshivelo shokolundume. Kape na ou e na okushuna nondjila, oyo ya pita moshivelo, osho e uya mo nasho, osheshi ove na okudja mo tava pitile moshivelo, osho sha taalelafana navo. 10 Shi na sha nelenga olo li li mokati kavo, oli na okuuya mo, ngeenge ve uya mo, noli na okudja mo, ngeenge va di mo. 11 Pefimbo loivilo nosho yo pomafimbo oitendele, eendjayambo odi na okukala oefa yondumetana, oefa yodi yondume nosho yo keshe osho tali dulu okuyandja omolweedjona deendume pamwe nohin yomaadi noefa keshe.

12 “‘Ngeenge elenga ola yandje exwikiloyambo alishe, ile omayambo oukumwe e li omayambo ehalo liwa kuJehova, otali ka yeululilwa oshivelo, osho sha taalela koushilo, notali ka yandja exwikiloyambo lalo alishe nosho yo omayambo oukumwe alo, ngaashi ashike hali ningi mefiku lEshabata. Konima ngeenge ola di mo, oshivelo oshi na okwiidilwa.

13 “‘Efiku keshe ou na okuyandja odjona yondume ya koshoka, oyo i li momudo wayo wotete, i li exwikiloyambo alishe kuJehova. Ongula keshe osho u na okuninga ngaha. 14 Ongula keshe, ou na okuyandja pamwe nodjona oshitihamano shoefa shi li eendjayambo pamwe noshititatu shohin yomaadi, oo e na okushashaminwa koufila wa nakwa nawa, u li eendjayambo, odo hadi yandjwa pandjikilile kuJehova. Ei onghedimhango yaalushe. 15 Ongula keshe ove na okuyandja odjona yondume, eendjayambo nosho yo omaadi i li exwikiloyambo alishe olo hali yandjwa pandjikilile.’

16 “Eshi osho Omwene Omunamapangelo aeshe, Jehova, ta ti: ‘Ngeenge elenga ola yandje oshali kukeshe umwe womovanamati valo i li efyuululo, otai ka ninga oshitukulwa shovanamati valo. Oshi li emona lavo pafyuululo. 17 Ashike ngeenge ola yandje oshali okudja mefyuululo lalo kuumwe womovapiya valo, otai ka kala yaye fiyo omomudo wemanguluko; opo nee otai ka shuna kelenga. Efyuululo ashike lovanamati valo tali ka kala lavo fiyo alushe. 18 Elenga kali na okukufa ko efyuululo keshe lovanhu moku va fininika va dje mo moshitukulwa shavo. Oli na okupa ovanamati valo efyuululo okudja moshitukulwa shalo vene, opo paha kale nande oumwe womovanhu vange ta tewaatewa mo moshitukulwa shaye.’”

19 Opo nee okwa eta nge mo nondjila, oyo i li polwamba loshivelo, oyo ya yuka keenhele diyapuki* dokulila dovapristeri, odo da taalela kolundume, naako onda mona ko onhele i li kombinga oyo ya taalela kouninginino. 20 Okwa tya kwaame: “Ei onhele, oko ovapristeri tava ka fulukifila elivelombediyambo nosho yo etimbayambo, naako tava ka yofela eendjayambo, opo vaha kufe mo sha, ve shi twale komukala wokombada nokutandaveleka* ouyapuki kovanhu.”

21 Okwa eta nge pondje komukala wokondje, ndele ta endifa nge meehuke nhee domukala, nonda mona omukala mohuke keshe yomukala wokondje. 22 Meehuke nhee domukala omwa li oumukala vanini, oule womukokomoko womaludimbo* 40 nosho yo ounene womaludimbo 30. Adishe nhee oda li di fike pamwe.* 23 Opa li omingenge* de di dingilila adishe nhee, nokoshi yomingenge okwa li kwa tungwa eenhele dokufulukifila omayambo. 24 Opo nee okwa tya kwaame: “Aa omaumbo omo ovayakuli vomotembeli hava fulukifile omayambo a dja kovanhu.”