Josua
17 Opo nee oshihoololifo osha kwata epata laManasse, osheshi oye a li oshiveli shaJosef. Molwaashi Makir, oshiveli shaManasse, naxe yaGilead okwa li omukwaita, okwa pewa Gilead naBasan. 2 Oludalo laManasse limwe ola pewa oshitukulwa pashihoololifo pamaludi avo, ovanamati vaAbieser, ovanamati vaHelek, ovanamati vaAsriel, ovanamati vaSekem, ovanamati vaHefer novanamati vaSemida. Ovo ova li oludalo laManasse, omonamati waJosef, ovalumenhu pamaludi avo. 3 Ashike Selofad, omonamati waHefer, omonamati waGilead, omonamati waMakir, omonamati waManasse, ka li e na ovanamati, okwa li ashike e na ovanakadona; omadina ovanakadona vaye oo: Mahla, Noa, Hogla, Milka naTirsa. 4 Onghee ova ya komupristeri Eliaser, kuJosua, omonamati waNun, nokomalenga, tava ti: “Jehova oye a li a lombwela Moses e tu pe oshitukulwafyuululo pamwe novalumenhu vomepata letu.” Opo nee okwe va pa oshitukulwafyuululo pamwe novamwaina vaxe ovalumenhu, palombwelo laJehova.
5 Manasse okwa li yo a pewa oitukulwa omulongo pashihoololifo, inamu kwatelwa edu laGilead nolaBasan, oyo ya li kombinga ikwao* yomulonga waJordan, 6 molwaashi ovanakadona vaManasse ova li va pewa oshitukulwafyuululo pamwe novanamati vaye, nedu laGilead ola ninga oshitukulwa sholudalo likwao laManasse.
7 Ongaba yaManasse oya li ya dja kuAsser ya yuka kuMikmetat, osho shi li popepi naSekem, nongaba oyo oya twikila ya finda kolukadi* kedu lovakalimo vomuEn-tappua. 8 Edu laTappua ola ninga laManasse, ashike Tappua osho shi li keengaba daManasse osholudalo laEfraim. 9 Ongaba oyo oya ya ya finda kolukadi lEfilu laKana. Mokati koilando yaManasse omwa li oilando yaEfraim, nongaba yaManasse oya li kolundume lefilu, ndele tai xulile kefuta. 10 Ombinga yokolukadi oyaEfraim, nombinga yokolundume oyaManasse, nefuta olo la li ongaba yaye, nokombinga yokolundume ova* li va twa kuAsser, nokombinga yokoushilo, okuIsaskar.
11 Manasse okwa pewa yo oilando needoolopa dayo* moshitukulwa shaIsaskar noshaAsser, tai landula: Betshan, Ibleam, naDor novakalimo vamo. Okwa pewa yo oilando ya tungilwa koikulundudu itatu, pamwe needoolopa dayo novakalimo vamo, tai landula: En-dor, Taanak naMegiddo.
12 Ashike oludalo laManasse kala li tali dulu okukwata ko oilando oyo; Ovakaanan ova li va anya filufilu okudja mo medu olo. 13 Eshi Ovaisrael va ninga ovanaenghono ova kala tava longifa Ovakaanan oilonga idjuu, ashike kava li ve va taataa mo* filufilu.
14 Oludalo laJosef ola tya kuJosua: “Omolwashike we tu pa* oshitukulwa shimwe ashike shedu? Fye otuvahapu, osheshi Jehova okwe tu nangeka noupuna fiyo opaife.” 15 Josua okwe va nyamukula, a ti: “Ngeenge omuvahapu, indeni mofuka, ndele tamu wapaleke onhele yeni medu lOvaperesi nolOvarefaim, molwaashi oshitukulwa shokeemhunda shaEfraim oshinini kunye.” 16 Opo nee oludalo laJosef ola tya: “Oshitukulwa shokeemhunda inashi tu wanena, nOvakaanan aveshe ovo hava di kedu lokefilu ove na omatemba oita a xwikilwa oivela ya honga komalola,* aveshe ovo ve li muBetshan needoolopa dasho* naavo ve li kEfilu laJisreel.” 17 Onghee Josua okwa lombwela oukwaneumbo waJosef, Efraim naManasse, a ti: “Nye omuvahapu nomu na eenghono dihapu. Itamu pewa ashike oshitukulwa shimwe shedu, 18 ashike oshitukulwa shokeemhunda otashi ningi yo sheni. Nonande oshi li ofuka, otamu ke shi wapaleka, notashi ningi eengaba doshitukulwa sheni. Osheshi nye otamu ka taataa mo Ovakaanan nonande ove na eenghono nomatemba oita a xwikilwa oivela ya honga komalola.”*