Ovatokolipangeli
17 Opa li omulumenhu wedina Mika, ha di moshitukulwa shokeemhunda shaEfraim. 2 Okwa tya kuina: “Oto dimbuluka oimaliwa yoisilveri 1 100, oyo wa li wa kufwa, nowa finga oo e i kufa po, we shi popya yo naame ndi udite ko? Oisilveri oyo aame ndi i na. Aame nda li nde i kufa po.” Opo nee ina okwa ti: “Jehova ne ku nangeke noupuna mumati wange.” 3 Onghee okwa shunifa oisilveri 1 100 kuina, ashike ina okwa ti: “Oimaliwa, oyo ya dja meke lange, ohandi i yapulile filufilu Jehova, opo omonamati wange e i longife mokuhonga oshihongwafano, ile mokuhambula oshihongwafano moshivela.* Ohandi i ku shunifile paife.”
4 Eshi a shunifa oisilveri oyo kuina, ina okwa kufa po oisilveri 200, ndele te i yandje komuhambwidi.* Okwa honga oshihongwafano nokwa hambula oshihongwafano moshivela,* ndele ta i tulwa meumbo laMika. 5 Omulumenhu oo Mika okwa li e na eumbo lookalunga, nokwa li a ninga okatetahema nosho yo oihongwafano* yaterafim nokwa nangeka po* umwe womovanamati vaye, a ninge omupristeri waye. 6 Pefimbo opo, muIsrael kamwa li ohamba. Keshe umwe okwa li ha ningi osho sha wapala momesho aye.*
7 MuBetlehem shomuJuda omwa li omulumenhu omunyasha womepata laJuda. Omulumenhu oo okwa li Omulevi, nokwa kala mo efimbo lile. 8 Omulumenhu oo okwa li a dja mo moshilando shaBetlehem shomuJuda a ka konge onhele opo ta kala ha di. Ofimbo a li mondjila, okwa ya moshitukulwa shokeemhunda shaEfraim, peumbo laMika. 9 Opo nee Mika okwa tya kuye: “Oto di peni?” Okwa nyamukula, a ti: “Ame Omulevi nda dja kuBetlehem shomuJuda. Ondi li molweendo handi kongo onhele yokukala.” 10 Onghee Mika okwa tya kuye: “Kala pwaame, opo u kale ngaashi tate* nomupristeri wange. Ohandi ku pe oisilveri omulongo momudo, oikutu noikulya.” Omulevi okwa ya mo. 11 Opo nee Omulevi okwa dimina okukala pamwe nomulumenhu oo. Nomulumenhu oo omunyasha okwa kala ngaashi umwe womovanamati vaye. 12 Natango, Mika okwa nangeka po* Omulevi a ninge omupristeri waye, nOmulevi okwa kala ha di meumbo laMika. 13 Opo nee Mika okwa ti: “Paife ondi shi shii kutya Jehova ota ka ningila nge ouwa, molwaashi Omulevi okwa ninga omupristeri wange.”