Omafimbo omativali
3 Salomo okwa li a hovela okutunga eumbo laJehova muJerusalem, komhunda yaMoria, oko Jehova a li e lihololela xe, David, ponhele oyo David a li a longekida poshipale shaOrnan, Omujebusi. 2 Okwa li a hovela okutunga mefiku etivali lomwedi omutivali, modula onhine yepangelo laye. 3 Ekanghameno, olo la li la dikwa po kuSalomo lokutunga eumbo laKalunga kashili, ola li li na oule womukokomoko womaludimbo 60, nounene womaludimbo 20, she likolelela koshiyelekifo* shonale. 4 Okalupale kokufikila, oko ka li komesho, oka li ke na oule womukokomoko womaludimbo 20, u fike pomutamo weumbo, noule wako wopombada 20;* okwa li e ka vaeka meni lako noshingoli elela. 5 Okwa dengela oiti yomidjenipa meumbo linene, nolwanima okwe ke li vaeka noshingoli shiwa elela, ndele te li feweke nomilunga nosho yo nomalyenge. 6 Natango, okwa li a feweka eumbo nomamanya ondilo mawa; oshingoli osho a li a longifa, oshingoli sha dja kuParvaim. 7 Okwa li a vaeka eumbo, omiti, omakuma ayo nosho yo omivelo dalo noshingoli. Okwa li yo a hokela omafano ovakerubi komakuma.
8 Okwa ninga edimo* mOuyapuki elela; oule walo ou fike pounene weumbo, olo li na omaludimbo 20, nounene walo owa li omaludimbo 20. Okwe li vaeka noshingoli shiwa elela shoitalenti* 600. 9 Ondjudo yoshingoli, osho sha li sha vaekwa keemboxa, oya li eesekeli* 50, nokwa li a vaeka eenduda dopombada noshingoli.
10 Medimo* lomOuyapuki elela okwa hongela mo ovakerubi vavali, nokwe va vaeka noshingoli. 11 Omavava aeshe kumwe ovakerubi okwa li e na omaludimbo 20; evava limwe lomukerubi wotete ola li li na oule womaludimbo atano, nola li la kuma kekuma leumbo, nevava likwao ola li li na oule womaludimbo atano, nola li la kuma evava limwe lomukerubi mukwao. 12 Evava limwe lomukerubi mukwao ola li li na oule womaludimbo atano, nola li la kuma kombinga ikwao yekuma leumbo, ofimbo evava likwao la li li na oule womaludimbo atano, nola li la kuma evava limwe lomukerubi wotete. 13 Omavava ovakerubi ovo okwa li a xwaanana oule womaludimbo 20; ova li ofika, va taalela meni.*
14 Okwa li yo a ninga etukulifolapi la longwa meengodi dimbulau, molududi leedi lipeepela, meengodi ditilyana nosho yo moliina iwa, nokwa li a faneka ko omukerubi.
15 Opo nee okwa dika eengudi mbali komesho yeumbo, di na oule womaludimbo 35, nomutwe wokoxulo yongudi keshe owa li u na omaludimbo atano. 16 Okwa ninga omalyenge a fa oulyenge vomofingo, nokwe a tula koxulo yeengudi, opo nee okwa ninga oiimati yomuti wogranati 100, ndele te i tula komalyenge. 17 Okwa dika eengudi komesho yotembeli, imwe okolulyo* naikwao okolumosho;* oyo i li kolulyo okwe i luka Jakin,* naayo i li kolumosho okwe i luka Boas.*