Omafimbo otete
18 Lwanima, David okwa lwifa Ovafilisti nokwe va finda, ndele ta kufa ko Gat needoolopa dasho* momake Ovafilisti. 2 Opo nee okwa finda Moab, nOvamoab ova ninga ovapiya vaDavid, nova li ve mu etela eemhale.*
3 David okwa finda Hadadeser, ohamba yaSoba, popepi naHamat, ofimbo Hadadeser a li mondjila a yuka komulonga waEufrat, a ka pameke epangelo laye. 4 David okwa kwata ko omatemba oita 1 000, ovalondinghambe 7 000 novakwaita vokolupadi 20 000. Opo nee David okwa teta omifipa domaulu eenghambe adishe, odo da li tadi nane omatemba oita, ndele ta xupifa eenghambe 100. 5 Eshi Ovasiria vokuDamaskus ve uya okukwafela Hadadeser, ohamba yaSoba, David okwa dipaa Ovasiria 22 000. 6 Opo nee David okwa tula omatangakwaita muSiria shomuDamaskus, nOvasiria ova ninga ovapiya vaDavid nove mu etela eemhale. Jehova okwa kwafela David a findane* keshe apa a li a ya. 7 Natango, David okwa kufa ko oikelelifo yoshingoli kovapiya vaHadadeser, noku i twala kuJerusalem. 8 David okwa kufa ongopolo ihapu muTibhat nomuKun, oilando yaHadadeser. Salomo okwe i longifa mokuninga etemba, eengudi noilongifo yongopolo.
9 Eshi Tou, ohamba yaHamat, a uda kutya David okwa finda etangakwaita alishe laHadadeser, ohamba yaSoba, 10 okwa tuma diva omonamati waye, Hadoram, kohamba David e ke mu pule, ngeenge oku li tuu nawa, noku mu pandula, eshi a lwifa nokufinda Hadadeser (osheshi Hadadeser okwa kala ha lwifa Tou lwoikando), nokwe mu tumina oinima i lili noku lili yoshingoli, yoshisilveri noyongopolo. 11 Ohamba David oya yapulila Jehova oinima oyo, pamwe noshisilveri noshingoli, oyo ya kufa koiwana aishe: kuEdom naMoab, kOvaammoni, kOvafilisti nokOvaamalek.
12 Abisai, omonamati waSerua, okwa dipaela Ovaedom 18 000 mEfilu lOmongwa. 13 Okwa tula omatangakwaita muEdom, nOvaedom aveshe ova ninga ovapiya vaDavid. Jehova okwa kwafela David a findane* keshe apa a li a ya. 14 David okwa twikila okupangela Israel ashishe, nokwa li ta tokola oshiwana shaye ashishe pauyuki. 15 Joab, omonamati waSerua, okwa li ondjai yetangakwaita, Josafat, omonamati waAhilud, okwa li omushangi wondjokonona, 16 Sadok, omonamati waAhitub, naAhimelek, omonamati waAbjatar, ova li ovapristeri, ofimbo Sausa a li hamushanga. 17 Benaia, omonamati waJehoiada, okwa li omuwiliki wOvakereti nOvapleti. Ovanamati vaDavid ova li pondodo yotete va shikula ohamba.