Omafimbo otete
26 Eengudu dovapashukili vopoivelo odo ngaha: mOvakora oMeselemia, omonamati waKore, womovanamati vaAsaf. 2 Meselemia okwa li e na ovanamati ava: oshiveli oSakaria, omutivali oJediael, omutitatu oSebadia, omutine oJatniel, 3 omutitano oElami, omutihamano oJohanan nomutiheyali oEliehoenai. 4 Obed-edom okwa li e na ovanamati ava: Shemaia, oshiveli, omutivali oJosabad, omutitatu oJoa, omutine oSakar, omutitano oNetanel, 5 omutihamano oAmmiel, omutiheyali oIsaskar nomutihetatu oPeulletai, molwaashi Kalunga okwa li e mu nangeka noupuna.
6 Omonamati waye, Shemaia, okwa dala ovanamati, ovo va li ovapangeli vomaukwaneumbo epata lavo, osheshi ova li ovanaenghono, ovalumenhu ovadiinini. 7 Ovanamati vaShemaia ovo: Otni, Refael, Obed naElsabad; ovamwaina vaye, Elihu naSemakia, ova li yo ovalumenhu ovadiinini. 8 Aveshe ovo ovanamati vaObed-edom; vo, ovanamati vavo novamwaina ova li ovalumenhu ovadiinini nova li va wana okulonga oilonga. Oilyo youkwaneumbo waObed-edom oya li 62. 9 Meselemia okwa li e na ovanamati novamwaina, ovalumenhu ovadiinini 18. 10 Hosa, womovanamati vaMerari, okwa li e na ovanamati. Shimri oye a li omutwe, osheshi nonande haye a li oshiveli, xe oye a li e mu hoolola e li omutwe, 11 omutivali oHilkia, omutitatu oTebalia nomutine oSakaria. Ovanamati novamwaina vaHosa aveshe ova li 13.
12 Meengudu dovapashukili vopoivelo, ovawiliki ova li ve na oinakuwanifwa ngaashi ashike ovamwaina, va yakule keumbo laJehova. 13 Onghee ova umbila oivelo ya yoolokafana oihoololifo, okudja kwaao munini fiyo okwaao a kula pamaukwaneumbo omapata avo. 14 Opo nee oshihoololifo shokoushilo osha kwata Selemia. Ova umbila oihoololifo omonamati waye, Sakaria, omuyandjimayele omunaendunge, noshihoololifo shaye osha wila kolundume. 15 Obed-edom shaye osha li kolukadi, novanamati vaye ova li va nangekwa po va pashukile eemhungulilo. 16 Oihoololifo yaSuppim naHosa oya li kouninginino, popepi noshivelo Salleket, mondjila oyo ya ya fiyo okotembeli; ongudu yovanangeli ya taalelafana nongudu ikwao yovanangeli; 17 koushilo okwa li Ovalevi vahamano; kouninginino vane efiku keshe, nokolukadi vane efiku keshe; peemhungulilo ovapashukili vavali va taalelafana novapashukili vakwao vavali; 18 mondjila ya kula, oyo i li pokatala, oko ka ama kouninginino, omwa li vane, nopokatala opa li vavali. 19 Odo oda li eengudu dovapashukili vopoivelo da dja movanamati vOvakora novOvamerari.
20 Shi na sha nOvalevi, Ahia oye a li omupashukili weemhungulilo deumbo laKalunga kashili noweemhungulilo doinima oyo ya ningwa iyapuki.* 21 Ovanamati vaLadan, sha hala okutya, ovanamati vOvagerson, ovo va dja muLadan, omitwe domaukwaneumbo omapata, ovo va dja muLadan, Omugerson, oJehieli, 22 novanamati vaJehieli, oSetam nomumwaina Joel. Ova li tava pashukile eemhungulilo deumbo laJehova. 23 MOvaamram, mOvaishar, mOvahebron nomOvausiel, 24 Sebuel, omonamati waGersom, omonamati waMoses, oye a li omuwiliki weemhungulilo. 25 Shi na sha novamwaina, oludalo laElieser, opa li Rehabia, Jesaya, Joram, Sikri naSelomot. 26 Selomot novamwaina ova li tava pashukile eemhungulilo adishe doinima, oyo ya ningwa iyapuki, oyo ohamba David, omitwe domaukwaneumbo omapata, omalenga taa pashukile omayovi nomafele nomalenga etangakwaita va ninga iyapuki. 27 Oinima oyo ya dja moita nomoixuulwa,* ove i ninga iyapuki, opo va kaleke po eumbo laJehova. 28 Ova li yo tava pashukile oinima aishe oyo Samuel, omumonikokule, Saul, omonamati waKish, Abner, omonamati waNer, naJoab, omonamati waSerua, va ninga iyapuki. Keshe osho keshe umwe a ninga shiyapuki, osha li sha tulwa mepashukilo laSelomit novamwaina.
29 MOvaishar, Kenania novanamati vaye ova li va pewa oinakuwanifwa kondje yeumbo laKalunga, ve li ovawiliki novatokoli vaIsrael.
30 MOvahebron, Hashabia novamwaina, ovalumenhu ovadiinini 1 700, ova li tava pashukile Israel moshitukulwa shokouninginino womulonga waJordan omolwoilonga aishe yaJehova noyohamba. 31 MOvahebron, Jeria oye a li omutwe wOvahebron pamusholondodo woludalo loukwaneumbo wepata lavo. Momudo omuti-40 wepangelo laDavid, opa li pa ningwa omakonakono, nomokati kavo omwa li mwa hangwa ovalumenhu ovanaenghono novadiinini, muJaser shomuGilead. 32 Ovamwaina ova li ovalumenhu ovadiinini 2 700, omitwe domaukwaneumbo omapata. Onghee ohamba David oye va nangeka po va pashukile Ovaruben, Ovagad netata lepata laManasse, moshinima keshe shi na sha naKalunga kashili nosho yo moshinima shi na sha nohamba.