Samuel omutivali

14 Joab, omonamati waSerua, okwa li a uda kutya ohamba oya djuulukwa Absalom. 2 Onghee Joab okwa tuma kuTekoa ku ka talwe omukainhu omunaendunge, nokwe mu lombwela a ti: “Liningifa wa fa wa nyika oluhodi, nokudjala oikutu yeefya, noino vava omaadi. Lihumbata wa fa omukainhu oo a kala oule wefimbo ta lili eefya. 3 Ndele to i kohamba noku i lombwela osho handi ku lombwele.” Opo nee Joab okwe mu lombwela osho e na oku ka popya.*

4 Omukainhu wokuTekoa okwa ya kohamba, nokwe linyongamena oshipala sha twa pedu, ndele ta nangala eombe, nokwa tya: “Ohamba, kwafele nge!” 5 Ohamba oye mu nyamukula ya ti: “Oshike?” Okwe i nyamukula a ti: “Ame omufiyekadi, omushamane wange okwa fya. 6 Ame, omupiya woye, onda li ndi na ovanamati vavali, nova li tava lu mepya. Kapa li nande oumwe ta dulu oku va anuna, naumwe okwa denga mukwao noku mu dipaa. 7 Paife ovapambele vetu aveshe ova pilukila nge po, notava ti, ‘Tu pa oo a dipaa mumwaina, opo naye tu mu dipae omolwomwenyo wamumwaina oo a dipaa, kutya nee oye aeke omonamati* woye oo a xupa po!’ Otava ka dipaa omonamati wange oo a xupa po, oye aeke nda li nde lineekela.”

8 Ohamba oya tya komukainhu: “Inda keumbo loye, nohandi ka ungaunga noshinima eshi.” 9 Omukainhu wokuTekoa okwa tya kohamba: “Ame neumbo latate ofye tu na ondjo, ashike ove ohamba ku na ondjo nosho yo olukalwapangelo loye.” 10 Opo nee ohamba oya ti: “Ngeenge umwe okwe ku pula vali shi na sha naasho, mu eta kwaame, noite ke ku piyaaneka vali.” 11 Ashike omukainhu okwa ti: “Alikana, ohamba, dimbuluka Jehova Kalunga koye, opo omupuli wohonde aha ningile owii omonamati wange noku mu dipaa.” Ohamba oye mu nyamukula ya ti: “Ohandi ane kuJehova Kalunga omunamwenyo kutya, kape na nande oxwiki imwe yomonamati woye tai ka wila pedu.” 12 Omukainhu okwa tya: “Alikana, pitika omupiya woye a lombwele sha omwene wange ohamba.” Opo nee ohamba oya ti: “Popya!”

13 Omukainhu okwa tya: “Omolwashike wa diladila okuningila ngaho oshiwana shaKalunga? Eshi ohamba ya popya ngaho oye lietela ondjo, osheshi ohamba inai alula omonamati wayo oo a faduka po. 14 Ohatu ka fya shili ngaashi ashike omeva a tilwashi pedu, noitaa dulu okwoongelwa vali. Ashike Kalunga iha kufa po omwenyo, ndele oha kala e na omatomheno okwaalulila kuye omunhu oo a telwaatelwashi. 15 Onde uya okulombwela omwene wange ohamba oshinima eshi, molwaashi ovanhu ova tilifa nge. Onghee omupiya woye okwa ti, ‘Alikana, pitike nge ndi popye nohamba. Pamwe ohamba otai ka dimina eindilo lomupiya wayo. 16 Ohamba nai pwilikine nokuxupifa omupiya wayo meke lomulumenhu oo a hala okuhanauna nge po nosho yo omonamati wange, opo tuha mone efyuululo olo twa pewa kuKalunga.’ 17 Opo nee omupiya woye okwa ti: ‘Eendjovo domwene wange ohamba nadi tulumukife nge,’ osheshi omwene wange ohamba okwa fa omweengeli waKalunga kashili oo ta dulu okutongola pokati kaasho shiwa naasho shii. Jehova Kalunga koye na kale pamwe naave.”

18 Ohamba oya nyamukula omukainhu ya ti: “Alikana, ino holeka nge sha kombinga yaasho handi ke ku pula.” Omukainhu okwa nyamukula a ti: “Alikana, omwene wange ohamba, popya.” 19 Ohamba oye mu pula ya ti: “Joab oye e ku tuma u lombwele nge oinima aishe ei?” Omukainhu okwa nyamukula a ti: “Ngaashi u na omwenyo omwene wange ohamba, osho wa popya oshi li mondjila, osheshi omupiya woye Joab oye a lombwela nge, nokwa tula eendjovo adishe odo mokanya komupiya woye. 20 Omupiya woye Joab okwe shi ninga, opo a lundulule etaleko loye li na sha noshinima eshi, ashike omwene wange oku na ounongo ngaashi omweengeli waKalunga kashili, noku shii ashishe osho tashi ningwa moshilongo.”

21 Ohamba oya tya kuJoab: “Eewa, ohandi ka ninga oshinima osho. Inda u ka tale ko Absalom.” 22 Joab okwe linyongamena oshipala sha twa pedu, ndele ta nangala eombe nokutanga ohamba. Joab okwa ti: “Omwene wange ohamba, nena onda mona kutya owa fila nge onghenda, molwaashi owa nyamukula eindilo lomupiya woye.” 23 Onghee Joab okwa ya kuGesur, nokwa eta Absalom kuJerusalem. 24 Ashike ohamba oya ti: “Na alukile keumbo laye, ndele ita mono oshipala shange.” Onghee Absalom okwa alukila keumbo laye, noina mona oshipala shohamba.

25 MuIsrael ashishe kamwa li mu na omulumenhu a tumbalekwa unene omolweholokepo* laye liwa ngaashi Absalom. Okudja komutwe waye fiyo okoshififinwa shomhadi, ka li e na epuko lasha. 26 Ngeenge ta kulula omutwe waye, ohe shi ningi pexulilo lodula keshe, molwaashi eexwiki daye oda li didjuu. Ondjudo yeexwiki daye oya li i fike peesekeli* 200 she likolelela koshivixa* shemanya olo la li hali longifwa mombala. 27 Absalom okwa li e na ovanamati vatatu nomonakadona umwe, wedina Tamar. Tamar okwa li omukainhu muwa unene.

28 Absalom okwa kala muJerusalem oule weedula mbali, noka li a mona oshipala shohamba. 29 Onghee Absalom okwa ifana Joab, opo e mu tume kohamba, ashike Joab ine uya ko kuye. Opo nee okwe mu tuma a ka ifanwe oshikando oshitivali, ashike natango okwa anya okuuya. 30 Xuuninwa, okwa tya kovapiya vaye: “Epya laJoab ola shaama nolange, noku na mo oilya yo-barley. Indeni mu ke li xwike po.” Onghee ovapiya vaAbsalom ove ke li xwika po. 31 Joab okwa ya keumbo laAbsalom, ndele te mu pula ta ti: “Omolwashike ovapiya voye va xwika po epya lange?” 32 Absalom okwa nyamukula Joab ta ti: “Tala, onde ku tumina etumwalaka tali ti, ‘Ila ndi ku tume kohamba u ke i pule to ti: “Omolwashike nda dila ko kuGesur? Oshixwepo ngeno onda kalele oko. Pitike nge ndi ka mone oshipala shohamba, nongeenge ondi na ondjo, nai dipae nge.”’”

33 Onghee Joab okwa ya kohamba, ndele te i lombwele. Opo nee ohamba oya ifana Absalom, oo e uya, ndele te linyongamene ohamba nokwa nangala eombe, oshipala sha twa pedu. Opo nee ohamba oya xupita Absalom.