Samuel omutivali

4 Eshi omonamati waSaul, Isboset, a uda kutya Abner okwa fila muHebron, ka li vali e na ouladi* nosha li sha piyaaneka Ovaisrael aveshe. 2 Opa li ovalumenhu vavali ovo tava pashukile eengudu dovanyeki, odo da li tadi kwatelwa komesho komonamati waSaul: edina laumwe oBaana, nolamukwao oRekab. Ova li ovanamati vaRimmon, Omubeerot, womepata laBenjamin (Ovabeerot navo ova li hava valulilwa kepata laBenjamin. 3 Ovabeerot ova faduka po va ya kuGittaim, nova kala ovanailongo oko fiyo okunena.)

4 Omonamati waSaul, Jonatan, okwa li e na omonamati oo a li a lemana keemhadi. Okwa li e na eedula nhano eshi kwa udika onghundana kutya Saul naJonatan ova fila muJisreel, nomuleli waye okwe mu yambula po, ndele tava faduka po, ashike omuleli okwa li a tila eshi tava faduka po; okaana oke lidenga po noka lemana. Edina lako oMefiboset.

5 Ovanamati vaRimmon, Omubeerot, Rekab naBaana, ova ya keumbo laIsboset moshanga shomutenya, ofimbo Isboset a li ta fuda po. 6 Rekab nomumwaina Baana, ova ya meumbo va fa tava kongo oilya yo-wheat, nova twa Isboset medimo, ndele tava faduka po. 7 Eshi va ya meumbo, ova hanga Isboset a nangala kombete monduda yaye yokunangala, ndele tave mu tu noku mu dipaa. Opo nee ova teta ko omutwe waye. Ova kufa omutwe waye, ndele tava ende oufiku aushe, va ya nondjila oyo ya yuka kuAraba. 8 Ova twala omutwe waIsboset kuDavid puHebron, ndele tava ti kohamba: “Omutwe waIsboset, omonamati waSaul, omutondi woye, oo a li a hala oku ku dipaa, oo ngaha. Nena eli Jehova okwa handukila Saul nosho yo oludalo laye ponhele yoye omwene wange ohamba.”

9 Onghee David okwa nyamukula Rekab nomumwaina Baana, ovanamati vaRimmon, Omubeerot, ta ti: “Ohandi ane medina laJehova Kalunga omunamwenyo, oo a xupifa nge* momaudjuu aeshe. 10 Eshi umwe e uya okulombwela nge kutya, ‘Saul okwa fya,’ okwa li e shii ota lombwele nge onghundana iwa, opo nee onde mu kwata, ndele handi mu dipaele muSiklag. Oyo oya li ondjabi oyo nda pa omutumwa oo. 11 Ovalumenhu ovakolokoshi ovo va dipaela omulumenhu omuyuki meumbo laye pombete yaye itava ka mona tuu oilanduliko ya kwata moiti! Ohandi ke mu handukila, molwaashi omwe mu dipaa.* Omu na okufya.” 12 Opo nee David okwa lombwela ovalumenhu ovanyasha ve va dipae. Ova teta ko eenyala davo neemhadi, ndele tave di leke petale muHebron, nova kufa omutwe waIsboset, ndele tave u pake mombila ponhele opo va paka Abner, muHebron.