Nahum
2 Omuhanauni okwe ku* pilukila po.
Amena eehotekuma doye.
Pashukila eendjila doye.
Lilongekida* nokunyatipala.
2 Osheshi Jehova ota ka tumbaleka vali Jakob,
Nota ka tumbaleka yo Israel,
Molwaashi ovahanauni ove va hanauna po;
Nova nyonauna oitutumine yavo.
3 Oikelelifo yovakwaita vaye ovanaenghono oya vaekwa noluvala litilyana,
Ovakwaita vaye ova djala oikutu itilyana.
Oivela yomatemba aye oita otai vilima ngaashi omundilo
Mefiku olo te lilongekidile olwoodi,
Novakwaita otava vikaavika monghedi itilifa omaonga a hongwa momiti domidjenipa.
4 Omatemba oita ohaa tondoka meendelelo momapandavanda.
Ohaa kala taa tondauka momapandavanda aaveshe.
Ohaa vema ngaashi eenyika da tema, nohaa shela ngaashi okashelu.
5 Ota ka ifana ovanambelewa vaye.
Otava ka punduka, eshi tava i.
Otava ka tondokela ekuma lasho;
Notapa ka kala eameno filufilu.
6 Oivelo yomilonga otai ka yeuluka,
Nombala otai ka hanauka po.*
7 Okwa tokolwa ngaha: Osha fifwa ohoni,
Osha kufwa po, novapika vasho oukadona otava lili;
Eendaka davo oda fa deenghuti, eshi tave lidenge meenhulo.*
8 Momukokomoko womafiku asho aeshe, Ninive osha li sha fa ondobe yomeva,
Ndele paife otava i onhapo.
Vamwe otava ingida tava ti: “Kanghameni! Kanghameni!”
Ndele kape na oo ta piluka.
9 Nyekei ko oshisilveri, nyekei ko oshingoli!
Omamona itaa pu mo.
Oshi yadi oinima yondilo yomaludi aeshe.
10 Moshilando kamu na sha, osha mbuwapala, osha hanaunwa po!
Omitima davo oda tila neenghono, eengolo davo otadi lidenge kumwe, eenho davo otadi kakama;
Oipala yavo oya mbadapala.
11 Oshike sha ningilwa oshilando osho sha li sha fa ekololo leenghoshi, omo mwa li hamu nyange ounghoshona,
Omo mwa li hamu ende eenghoshi nounghoshona vado,
Nokape na oo a li he di tilifa?
12 Onghoshi ohai tukulile ounghoshona vayo osho ya kwata
Ohai pondele eenghoshi deenghadi oihakanwa.
Ohai kaleke ekololo layo li yadi oihakanwa,
Nomomangade ayo omu yadi oinamwenyo ya dipawa.
13 Jehova womatangakwaita ota ti: “Tala, ohandi ku katukile onghatu.”
“Ohandi ka xwika po omatemba oye oita filufilu,
Neongamukonda otali ka dipaa eenghoshona doye.
Ohandi ka hanauna po oihakanwa yoye kombada yedu,
Neendaka dovatumwa voye itadi ka udika vali.”